«Айфара» төркеменең 25 еллык юбилеен билгеләп үткәч, билгесез сәбәпләр аркасында, солистлар сәхнәдә күренми башлады. Бу көннәрне төркемнең солисты Алмаз Шәрифуллин үзенең Instagram челтәрендә чангы шуу мизгелләре белән бүлеште. Әллә инде җырчы спортка бирелгәнме? //Tatar today//
— Алмаз, спорт шөгыле җырчы булуга алмашка килде инде әллә?..
— Спорт белән балачактан дус, аерылган да юк, дисәм була. Үземне гел формада тотарга тырышам. Буш вакытларда сәхнәдәш дусларым белән, җыелышып, футбол уйныйбыз. Январь аенда Сабада чангыда шуу марафоны узды, февральдә – Чаллыда. Икесендә дә катнаштым. Чыннан да, көч җыеп кайткандай, хис иттем үземне. Март аенда Зеленодольскийга юл тотарга исәп. Спорт белән бергә атларга кирәк. Ул безнең яшәү рәвешебезгә әйләнергә тиеш дип уйлыйм.
— Узышлар синең өчен уңышла тәмамландымы?
— 15 чакрым юлны 1 сәгать тә 30 минут эчендә үттем. Чаллыда исә прогресс сизелде: 1 сәгать тә 17 минут.
— Сәхнәдә бик күренмисез бу араларда. Буш вакытның пәйда булуы шуңа бәйледер?
— Гастрольләр белән йөргәндә дә спортка вакыт таба идем. Үземне бер дә буш вакыты булмаган популяр җырчы дип санамадым. Сәхнәдән киттем дип тә әйтә алмыйм. Алдагы тормышта ни буласын беребез дә белми. Бәлки, кире әйләнеп кайтып та булыр…
— Спорт белән профессиональ дәрәҗәдә шөгыльләнә башларга уйламыйсызмы?
— Юк, бу бары тик минем балачак хыялым гына. Хәзер инде иллегә таба үрмәлим. Тик шулай да туктарга исәп юк. Алга таба да актив катнашырга телим. Май аенда марафон Казанда үтәчәк. Анда да барырга кирәк булыр.
— Төп эшегез нинди?
— Ниндидер бер өлкәдә эшлим дип әйтә алмыйм. Акча ягына килгәндә, тир түгелмичә калмады бит, җитә Аллага шөкер.
— Гаиләгез булмагач, ул яктан җиңелрәктер?..
— Әйе, мин бер дә өйләнмәдем. Һаман егет булып йөрим(көлә).
Алинә АЙДАРОВА