Замирә Рәҗәпова инстаграм битендә тормышын төрле яклап яктыртып, язылучыларын сөендереп тора. Ул фотолар гына куеп калмый, хис-кичерешләре белән уртаклаша. Һәрвакыттагыча аны яклаучылар да, яманлаучылар да табыла. Бу юлы ул үзенә карата әйтелгән начар сүзләргә әнисенең ни дип җавап бирүен әйтте.
«Безнең әни инстаграмда минем адреска язылган җыен негатив язмаларны укый да, шак ката. Аннары үз алдына сөйләнеп йөри: «Әй, бу кешене әшәкелегенә шаклар катам. Ничек кеше баласына шулай теләсә нәрсә язып буа микән ул? Ул хатыннарның балалары юк микәнни соң әллә? Бәндәдән курыкмасалар, Алладан куркмыйлар, әй Аллам. Алар белмиләр инде синең тәүлегенә 3-4 сәгать йоклап, көн-төн эшләгәннәреңне, нинди хакка бу уңышларыңа ирешкәнеңне…»
Баласына хаксызга язылган әшәке сүзләр өчен, әни кешенең шулай күңеле әрни күрәсең. Аннары, мин каты итеп жавап бирсәм, «Ил авызына иләк каплап булмый, кеше алдындагы кешене сөйлиләр инде, әрәм итмә вакытыңны нәрсәдер исбатлап», ди… ә үзе хаман хайран калып йөри. Табигать кочагында, шәһәрдән ерак урнашкан, таулар, урманнар кочагында утырган авылда гомер иткән, чиста күңелле кешеләр арасында яшәгән, гап-гади авыл хатыны андый кешеләр дә барлыгына гаҗәпкә калып йөри… үз алдына «Аллам, балаларны явыз кешеләрдән сакла», дип авыз эченнән сөйләнә», дип язган Замирә Рәҗәпова.
«Ләйсән Гыймаева, без синең белән», дип тә өстәгән. Ә Ләйсән Гимаева үз чиратында: «Рәхмәт бик зур, Замирә. Безнең броня көчле инде хәзер, тик менә Әниләр генә… мин уземнекенә укымаска кушам…», дип җавап кайтарган.
«Кемнең кулыннан бер нәрсә дә килми, шулар тел чарлап ята инде, андыйлар белән сүз көрәштереп торма, Замирә. Тилеләр белән талашып та торма, ди иде безгә картый, алар шулай энергия җыя. Иң яхшысы җавапсыз калдыру аларны, вот интегәләр аннан. Синең нинди уңган икәнеңне беләбез, молодчина! Земфира апага рәхмәт шундый булган кызлар тәрбияләгәне өчен», дигән фикерләр калдырганнар әлеге фото астында.