//Tatar today//
Ләйсән Сөнәгәтова күптән түгел өченчегә әни булды. Шушы көннәрдә ул сабыена беренче фотосессия ясаган. Җырчы Инстаграмында яңа туган баланы фотога төшерү мизгеленнән видео урнаштырган.
«Һәр бала белән барысын да эшләп өлгерәсе килә. ️Без «ньюборн» стилендә фотосессия ясарга булдык… Фотосессиядә баланы тынычландыру, йоклату, берничә минут эчендә фотосурәтләр ясауның нинди авыр хезмәт булуын аңладым.
Безнең модель бөтенләй йокларга теләмәде. Сәгать ярым без кызымны йоклатырга теләдек, мин үзем йоклап китәргә әзер идем. Әмма якынча ике сәгатьтән ниһаять без моны эшләдек.
Шәп фотолар чыксын өчен, фотога төшерүче тимердәй сабырлыкка, яшь модельләргә карата зур мәхәббәткә ия булырга тиеш икәнлегенә инандым. Бу әти-әниләр һәм балалар өчен киләчәктә зур истәлек», дип уртаклашкан Ләйсән Сөнәгәтова.
«Туганнан ничә көн булды Сезгә, Ләйсән? Әйтәләр бит, 10 көнгә иң яхшы вакыт», дип сораганнар җырчыдан. «10 көн эчендә җитешмәдек шул. Чынлап та 10 көнгә кадәр алар бик озак йоклый», дип җавап кайтарган Ләйсән Сөнәгәтова.
«Кадерлеләрем, видеода минем сабыем түгел. Үземнекен мин әлегә күрсәтмим. Бу видеоны фотога төшерүче рөхсәте белән куйдым», дип ачыклык керткән җырчы.