Бер хатын яңа туган кызының аяклары кәкрәеп туганын күргәч, аны бәби табу йорты тәрәзәсеннән атып бәргән.
Бу җинаятен яшерер өчен, хатын бераздан чит бер кыз баланы да тәрәзәдән аска ташлый.
“Фергана” агентлыгы мәгълүматларына ярашлы, вакыйга 9 сентябрь төнендә Үзбәкстанның Нагаман өлкәсендә булган.
Медицина персоналы бермәл җан-фәрманга нәни кызларны эзли башлый һәм якынча бер сәгатьтән генә роддом бинасы тәрәзәләре астыннан авыр җәрәхәтләр алган балаларга тап булалар. Балаларны тиз арада операциягә алып кереп китәләр, ләкин… табиблар тырышуы юкка булып чыга.
Ике мәрхүм сабый да бер үк көнне туган һәм палатада әниләре белән бергә ятканнар дип хәбәр итәләр.
Бу вакыйга буенча 2 җинаять эше ачканнар. Берсе хатынга карата “Алдан уйланылган үтерү” маддәсе буенча, икенчесе роддом хезмәткәрләренә каршы — вазифаларын тиешенчә башкармаганнары өчен.
Юньсез ананы гомерлеккә ирегеннән мәхрүм итәргә мөмкиннәр, ә бала табу йорты хезмәткәрләренең 8 елга рәшәткә артына эләгүләре ихтимал.
Сораулар күп инде, бер карасаң. Тәҗрибәле табиблар бала тапкан ананың психологик халәтен тиз сизеп-тоеп кала. Мәсәлән, мин бәби табу йортында бер әни белән яттым палатада. Һәм ул үзен бик сәер тота иде. Даими рәвештә телефоннан кемгәдер шалтырата, елый, бер дә юкка истерикага бирелә иде. Шуннан гына бер шәфкать туташы бу яшь ананың бәби тапкач, бераз акылдан язуын әйткән иде. Монысы – бер. Икенче яклап, нишләп тәрәзәләр ирекле ачылган? Беләм, бу төрмә түгел, ләкин шулай да. Әнә бит – ике бер гаепсез сабыйларның гомере кыелган…
Чыганак:Өмет