Уфаның Калинин районы судында 54 яшьлек педофилны үтерү эше каралганын хәбәр иткән идек.
Ике баланы ерткыч тырнагыннан коткарган Владимир Санкин җинаять эше арытаба тикшерелгәнче ике ай йорт шартларында тотылачак. Судта ул педофилны үтерергә теләмәгәнлеген, балаларны гына яклаганлыгын белдерде.
Интернеттан файдаланучылар Владимир Санкинга ярдәм йөзеннән бик күп комментарийлар калдырган. Битараф булмаган гражданнар аны эзәрлекләүдән азат итүне таләп иткән петиция дә булдырырга өлгергән. Петициягә 2 меңнән артык кеше кул куйган.
Ирнең хатыны Полина Наумова да ире яклы.
— Без шок хәлендә. Мин тулысынча аның яклы. Ул бала яныннан үтеп китмәгән, киресенчә, аның үтенеченә колак салган һәм булдыра алганча ярдәм иткән. Ул ярдәмгә ташланмаса, арытаба ни булырын күз алдына да китерү куркыныч, — ди ул.
— Ул — яхшы, ярдәмчел, гадел кеше. Эшли, спорт белән шөгыльләнә. Аның ягыннан бернинди конфликтлар, яки тәртипсез гамәлләр булганы юк. Яхшы егет, язмышы арытаба ничек булыр, барыбыз да борчылабыз, — ди дусты Рөстәм Рәҗәпов.
Санкинның адвокаты да, суд балаларны җинаятьчедән коткарган кешегә артык каты җәза бирмәс, дигән фикердә.
Мәгълүмат Кызыл Таң Фото Bashnius.ru