Коронавируска биргән анализ күрсәткечләре нәрсәне аңлата?

-- Лейла

Шөкер, антитәнчекләргә анализ тапшырып, иммунитет торышын белү мөмкинлеге бар хәзер. Ләкин анализ нәтиҗәләрен дөрес укый белүчеләр генә әз. Сораулар күп килгәнлектән, сәламәтлеккә багышланган тапшыру алып баручы табиб – Коронавирус вазгыятен мониторинглау буенча мәгълүмат үзәге җитәкчесе Александр Мясников бу хакта тәфсилләп аңлатты.

Антитәнчекләр (икенче төрле – иммуноглобулиннар) – организмга нинди дә булса инфекция (шул исәптән CoV-2) эләккәч, шуңа каршы иммун система тарафыннан эшләп чыгарыла торган махсус аксымнар ул. Алар вирусны ачыклый, зарарсызландыра һәм аның турында мәгълүматны истә калдыра. Иммуноглобулиннар бик күп төрле булса да, COVID-19га бәйле рәвештә ике тибын аерып карыйлар: IgM һәм IgG.

  1. IgM – кискен фаза антитәнчекләре. Гадәттә, алар, чир башлангач, якынча 5 нче көндә күренә башлый һәм бер атнадан алып бер айга кадәр саклана. Галимнәр коронавирус очрагында IgMның 3 айга кадәр дә саклана алуын ачыклаган. Антитәнчекләрнең концентрациясе 1 мл/бер һәм аннан артыграк булса, анализ уңай дип санала.
  2. IgG – чир кабат йогудан озак вакытка саклый һәм үзләре дә озак яши торган антитәнчекләр. Иммунитет аларны 15 – 20 көннән соң, ягъни IgMнан соңрак эшләп чыгара. IgGны 10 мл/бер һәм аннан артыграк концентрациядә тапсалар, тест уңай дип санала.

Анализ нәрсәне аңлата?

Тест күрсәткечләре нигезендә өч төрле нәтиҗә булырга мөмкин.

1 нче нәтиҗә. IgM<1 һәм IgG<1: тест тискәре. Ягъни пациент яки коронавирус эләктермәгән, яки COVID-19ны кичергән, ләкин җитәрлек антитәнчекләр барлыкка килмәгән. Бу – COVID-19га каршы иммунитет юк дигән сүз. Андый кешеләр битлек, пирчәткә киеп йөрергә һәм башка төрле саклану чараларын да күрергә тиеш.

2 нче нәтиҗә. IgM≥1 һәм IgG – теләсә нинди сан: иммун системаның коронавируска җавап бирү стадиясе. Ягъни организм көрәшә: пациент чирли яисә сәламәтләнеп килә. Чыннан да COVID-19мы икәнне раслау өчен ПЦР  диагностикасын да уздырырга (борын куышлыгыннан һәм йоткылыктан мазок алырга) кирәк. ПЦР-диагностика тесты хәтта инкубация чорын да күрсәтә.

3 нче нәтиҗә. IgM<1 һәм IgG≥10: пациент вирус белән контактта булган. Яки элегрәк чирләгән, яки үзендә вирус йөртә. Мондый нәтиҗәне COVID-19га каршы иммунитет дип бәялиләр. Ләкин әгәр пациентның организмында вирус бар икән, ул башкалар өчен куркыныч. ПЦР-диагностика нәтиҗәсе тискәре булу гына вирус юклыгын аңлата. Бу очракта кеше антитәнчекләр доноры була ала.

Чыганак: Ватаным Татарстан
Загрузка...

Бәйле

Добавить комментарий