Яман шеш белән көрәшүче Алинә Миньязова: Хәлем бик авыр булды. Исән калмам дигән идем

Казанда яшәүче Алинә Миньязовада табиблар яман шеш табалар. Сызланулары гыйнвар аенда ук башлана аның. Башта бөтен сөякләре авырта, аннан соң тән температурасы күтәрелә. Табиблар да сөяк авыруы дип уйлый. Әмма тикшеренә торгач, берни табылмый. Февраль аенда Алинәнең куллары күтәрелми башлый. Шул вакытта аның күңеле сизә. Ул үзендә яман чирдер дип уйлый.

–  Умрау сөягем янында шеш күреп алдым. Шуннан соң онкологка барырга уйладым. Анда баргач, УЗИдан карадылар. Тик начар әйбер күренмәде. Бары тик анализлар әзер булгач кына, миндә яман шеш икәне беленде. Күңелем белән әзер идем инде. Шуңа да кабул итү авыр булмады. Шәфкать туташы да булып эшләгәч, чирнең ни икәнен яхшы беләм, – ди ул.

Алинәгә операция ясыйлар. Ә аннары 2 атна химия терапиясе ала. Инде бар да яхшырган кебек була. Тик март аенда ул коронавирус йоктыра. Үпкәләренә 75 процент зыян килә.

– Хәлем бик авыр булды. Исән калмам дигән идем. Ике балам хакына Аллаһы Тәгалә мине бу чирдән арындырды. Хәзер яңадан химия терапиясе алуымны дәвам итәм. Аны бетергәч, нурланыш үтәсе бар. Табиблар күңелемне күтәрә – терелүгә өмет зур. Бар да үземнән тора. Ә минем яшәү теләгем көчле. Кызыма – 13, кечкенә улыма 2 яшь кенә бит әле. Аларны ничек ташлап китәсең? Бик тә яшисем килә, – ди ул.

Алинә – Балык Бистәсе районы кызы. Ире Илшат белән бер мәктәптә укыганнар. Кечкенәдән дус булып йөргәннәр. Аннары дуслыклары мәхәббәткә әйләнеп, гаилә корганнар. Хатыны авырып киткәч, тормыш авырлыклары Илшатка өелеп кала.

– Иремә рәхмәтлемен. Әгәр аның җылысын тоймасам, ничек яшәр идем. Улыбыз авырып киткәч тә, хастаханәдә ул ятты. Ничек тә хәлемне җиңеләйтергә тырыша. Миңа күрсәтмәсә дә, бик борчылганын сизәм. Барысын да уйлыйдыр инде, – ди Алинә. – Ике яктан да әниләребез генә исән. Әтиләр юк инде. Йөгереп эшләп йөргәндә, берәү дә авыру килер дип уйламый бит. Без дә ипотекага фатир алып куйган идек. Менә хәзер ирем генә эшләгәч, авыр хәлдә калдык. Җитмәсә, миңа да гел дарулар алып торырга кирәк. Аларсыз булмый. Әмма күңелемне төшермим. Авыруны җиңәргә дип яшим. Барысы да яхшы булыр дип өметләнәм. Гаиләм хакына бу чирне җиңәсе иде.

Ярдәм итәргә теләүчеләр өчен Алинә Илгиз кызы Миньязова исемендәге Саклык банкы картасы номеры:

5469 6200 3420 1978.

Тинькоф картасы номеры: 5536 9140 0587 3538.

Карталар 89179106070 телефон номерына беркетелгән.

Чыганак: https://vatantat.ru/2021/09/62382/
Загрузка...

Бәйле

Добавить комментарий