Юлда барганда машинадан төшеп калган

Бүген Белорет районы трассасында үлем очрагы теркәлгән.

Республика ЮХХДИ мәгълүматларына караганда, иртән Уфа – Инҗәр – Белорет трассасының 208нче чакрымында «Шевроле Нива» автомобиле бәлагә тарыган. Руль артында – 70 яшьлек ир, пассажир утыргычында 32 яшьлек хатын булган.
Бер мизгелдә автомобиль салоны ишеге ачылып киткән һәм пассажир кыз машина барышында егылып төшкән.

“Алынган җәрәхәтләрдән хатын ашыгыч медицина ярдәме килгәнче үлгән”, – ди юл инспекторлары.

Кайбер чыганаклар буенча, хатын үзе, каешын ычкындырып, ишекне ачкан һәм юлга сикергән. Ул спиртлы эчемлекләр кулланган булган.

Бу хәл тикшерелә.

Чыганак: https://kiziltan.ru/articles/donja/2022-01-27/yulda-barganda-mashinadan-t-shep-kalgan-2670251