Хәзер инде кредитка да өмет юк! Россия Үзәк банкы төп ставканы 20 процентка кадәр арттыргач, күпләр әнә шулай дип көрсенде. Бу аңлашыла да. Шушы яңалыкка бәйле рәвештә банклар барлык төр кредит ставкаларын ике тапкыр арттырып куйды. Шул рәвешле бик күп проблемаларны чишәргә ярдәм иткән кредит рәсмиләштерү дә хәзер күпләрнең көченнән килми. Ай саен кредит түләп яшәүчеләрнең исә – үз кайгысы. Алга таба бурычымны вакытында түләп бара алырмынмы, моңа кадәр рәсмиләштергән кредитларның да cтавкасын арттырып куймаслармы, дип борчыла алар.
Дөрес, бу көннәрдә күпләрнең күңелен юатырлык яңалык ишетелде әле үзе. Россия Президенты Владимир Путин кредит каникулы турында яңа закон имзалады. Ул килеп туган вазгыять аркасында матди авырлык кичергән кешеләрнең кредит буенча айлык түләвен 6 айга кадәр кичектереп тору яки аның күләмен киметүне күздә тота. Бу быел 1 мартка кадәр рәсмиләштерелгән барлык төр кредитларга кагыла. Аннан пандемия чорында кредит каникулы алган кешеләр дә файдалана ала.
Кемнәргә бирелә?
– Гади халык, кече һәм урта эшмәкәрлек тармагы вәкилләре.
Нинди кредитларга кагыла?
– 2022 елның 1 мартына кадәр рәсмиләштерелгән барлык төр (ипотека, куллану, автокредит) кредитларга.
Пандемия чорында кредит каникулыннан файдаланган булсаң нишләргә?
– Яңа кредит каникулыннан андый кешеләр дә файдалана ала
Күпме вакытка алып була?
– 6 айга бирелә. Аны иртәрәк тә тәмамларга була. Моның өчен банкка мөрәҗәгать итәргә кирәк.
Нидән гыйбарәт?
– Кредит буенча айлык түләүне вакытлыча туктатып тору яки берничә айга аның күләмен киметү. Моны банк түгел, кредит түләүче кеше үзе сайларга тиеш. Уйламаганда мөмкинлекләр килеп чыкса, каникул вакытында да кредитны тулысынча ябарга яки аның бер өлешен капларга мөмкин.
Аны алу өчен нинди шартлар үтәлергә тиеш?
– Кредит каникулы бирүне сорап мөрәҗәгать иткән көнгә бер ай кала кешенең айлык керемнәре, ким дигәндә, 30 процентка кимегән булырга;
– кредит күләме билгеләнгән максималь чиктән артмаска;
– кеше исемендә түләнеп бетмәгән башка кредитлар булмаска тиеш.
Нинди максималь чик билгеләнгән?
– Ипотека кредиты – 2 миллион сум;
– автокредит – 600 мең сум;
– шәхси эшмәкәрләр өчен куллану кредиты – 300 мең сум;
– физик затлар өчен куллану кредиты – 100 мең сум;
– физик затларның кредит карталары буенча – 100 мең сум.
Кая мөрәҗәгать итәргә?
– Үзең кредит алган оешмага.
Кайчан мөрәҗәгать итәргә?
– 2022 елның 1 мартыннан 30 сентябренә кадәр.
Нинди документлар кирәк?
– 2021–2022 ел өчен 2-НДФЛ белешмәсе;
– Мәшгульлек үзәгеннән эшсез дип тану турында белешмә;
– «больничный» кәгазе (1 айдан күбрәк срокка);
– айлык керемнәр кимүне раслаган башка документ.
Минуслары бармы?
– Кредит каникулы вакытында айлык түләү туктатылып торса да, банклар кредит өчен процентлар исәпләүне дәвам иттерәчәк. Аларны каникул тәмамлангач түләргә туры киләчәк. Димәк, кредит буенча артык түләнгән сумма (переплата) да артачак дигән сүз. Кредит каникулы гамәлдә булган айлар хисабына кредитның түләү вакыты да озаячак.
Чыганак: https://vatantat.ru/2022/03/76595/