Ялларда Татарстанда салкынайта, киләсе атна башында кырау төшәргә мөмкин. Бу хакта Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.
Бүген республикада +25 градус җылылык көтелә, җилнең тизлеге секундына 17 метрга кадәр җитәргә мөмкин.
Шимбә көнне яңгыр, яшен һәм көчле җил фаразлана, җилнең тизлеге секундына 15-18 метрга кадәр җитәр диелә. Төнлә һава температурасы +8..+13 градус, көндез +13..+18 градус, көнчыгыш районнарда +24 градуска кадәр көтелә.
7 майда төбәккә төньяк киңлекләрдән салкын һава килә башлый. Төнлә +1..+6 градус, урыны белән +10 градуска кадәр җылы була. Көндез һава температурасы +8..+13 градустан артмаячак. Җилнең тизлеге секундына 15 метрга кадәр көтелә, урыны белән җепшек кар яварга мөмкин.
«8 һәм 9 майда республикада салкынайтачак. Явым-төшем ихтималы аз. Төнлә һава температурасы 0..+3 градус һәм урыны белән туфракта -3 градуска кадәр кырау көтелә. Көндез һава температурасы +9..+15 градус», диелгән Гидрометеорология һәм әйләнә-тирә мохитне күзәтү үзәгенең якынча фаразларында.
чыганак: https://vatantat.ru/2023/05/111733/