Казан табиблары бассейнда батканнан соң могҗиза белән исән калган ике яшьлек кызны комадан чыгарганнар.
Бу хәл Мамадыш районында алты көн элек булган иде. Күп балалы ана Түбән Камадан туганнарына кунакка килгән. Бакчада эшләп йөргәндә, гадәттән тыш хәл була. Ике яшьлек бала бассейнга егылып төшә һәм аны йөзтүбән суга капланган килеш табалар. Зәңгәрләнгән сабыйга беренче ярдәмне әнисе күрсәтә.
Ашыгыч ярдәм килгәнне көтмиләр, үзләре юлга чыгалар. Машинада барганда сабыйдан бик күп су чыга. Аннары кычкырып җибәрә һәм күзләрен ача. Трассада барганда ашыгыч ярдәм машинасын очраталар. Балага кислород бирәләр һәм шул рәвешле реанимациягә барып җитәләр.
Сабыйны теге дөньядан кире кайтарганнар дисәң дә була. Бала хәзер элекке хәленә кайткан, элеккечә шар белән уйный, елмая.
чыганак: https://vatantat.ru/2023/08/119188/