Зәй районының Кушъелга авылында гомер итүче 44 яшьлек Гөлнара Йосыповага ярдәм кирәк. Түбән Биш авылының балалар бакчасында пешекче, Кушъелга авылында хат таратучы булып эшләүче Гөлнараның бер елга якын нинди авырудан интеккәнен ачыклый алмыйлар.
Туганнары чаң суга – якын кешеләрен ничек тә яшәтәсе иде. Гөлнараның өч баласы әнисенең савыгуын көтә. Олы баласына – 23, иң кечесенә 10 гына яшь әле. Әнә шул нәние, әнине яшәтәсем килә, дип өзгәләнә.
– Сеңлем быелның гыйнвар аенда, кар көрәгәндә авырып киткән. Башта биле сызлый. Берничә ай узса да, авыруы чигенми, киресенчә, көчәеп, инде аякларына да төшә. Көч-хәл белән йөри башлагач кына, түләүле клиникага барып, табибларга күренде. Алар дарулар язып биргәч, хәле яхшырып киткәндәй булды. Барыбыз да сөенеп куйган идек. Әмма озак та тормады, Гөлнараның кан басымы күтәрелә башлады, – дип сөйли апасы Венера. – Кая гына йөртмәдек. Калкансыман бизен дә тикшерттек, лимфа төеннәре зурайган иде.
Гөлнараны онкологка җибәрәләр. Әлмәт, Зәй, Чаллы, Казан табиблары барысы да бер нәтиҗәгә килә: яман чир юк. Төгәл диагнозны ачыклар өчен биопсия анализын Санкт-Петербургка да җибәреп карыйлар. Алардан да яман чир юк дигән хәбәр килә. Әмма организмында ниндидер инфекция барлыгын ачыклыйлар. Лимфа төеннәренә операция ясыйлар.
– Гөлнараны РКБга салдылар. Анда дәваланды. Әмма алга китеш булмады. Аптырадык инде. Йөрәк әрнеде. Туганымның күзгә күренеп хәле начарлана. Чирен төгәл әйтүче булмады. МКДЦга да мөрәҗәгать итеп карадык. Алар сеңлемнең арка миенә зыян килүен ачыкладылар. Авыру неврологиягә бәйле диделәр, – ди Венера. – Төгәл диагноз куелмагач, Гөлнарага инвалидлык та бирмиләр. Хәтта документлары да әзерләнмәгән әле. Арка миенә килгән зыянны бары тик кыйммәтле дарулар белән генә дәвалап була икән. Әле менә шушы көннәрдә 10 мең сумлык анализ бирдек. Ничек тә дөрес дәва аласы килә. Әлегә без хастаханәдә ятабыз. Онкологлар яңадан җыелышып, сеңлемнең авырулары турында сөйләшәчәк. Лимфа төеннәрен кабат тикшермәкчеләр. Бер авыру икенчесенә комачаулый, диләр. Нишләргә дә белгән юк. Кайбер табиблар коронавирусның бер төре дә булырга мөмкин, диләр. Билгесезлек бик авыр.
Әлегә Гөлнараның диагнозлары ачыкланып бетмәсә дә, табиблар иммунитетны күтәрә торган дәвалау кирәк, диләр. Ә ул бик кыйммәт икән. Арка миенә килгән зыян организмның башка өлешенә дә йогынты ясамасын өчен дарулар эчәргә кушканнар. Анысы өчен дә акча кирәк.
Гөлнарага ярдәм итүебезне Кушъелга авылында яшәүчеләр сорады. Алар үзләре 380 мең сум акча җыйган инде. Тагын 700 мең сум акча кирәк, диләр. Шуңа да алар мәрхәмәтле кешеләрдән булышуларын сорый.
Ярдәм итәргә теләүчеләр өчен Гөлнара Заһир кызы Йосыпованың 89274920564 телефон номеры Саклык банкы картасына беркетелгән.
чыганак: https://vatantat.ru/2023/10/124143/ ТАТАР ТУДЕЙ ТЕЛЕГРАМ КАНАЛЫ - https://t.me/tatartoday