Махсус хәрби операциядә катнашучы мобилизацияләнгән хәрбиләрнең ротациясе Мәскәү шартларында тынычлык килешүен имзалаганнан соң гына мөмкин. Бу хакта «NEWS.ru» порталына хәрби эксперт, запастагы беренче ранг капитаны Василий Дандыкин белдергән.
Аның сүзләренчә, хәзерге вазгыять ротация процессына булышлык итми. Моннан тыш, мобилизацияләнгән сугышчылар РФ Хәрби Көчләренең хәрби ядрәсенең мөһим өлеше булып тора.
«Каты сугыш хәрәкәтләре бара. Бу мәсьәлә, ничек кенә булмасын, күтәрелә, әмма, минем уйлавымча, бу – без тынычлык турында килешү төзегәндә булачак, 30 тәүлеклек килешү турында түгел, ә безнең шартларда ирешелгән конкрет тынычлык турында», – дигән Дандыкин.
Кичә Россия Президенты Владимир Путин Украинадагы хәрби операция зонасында хәрбиләрне ротацияләү мәсьәләсен «кискен» дип атады. Аның сүзләренчә, хәрби хәрәкәтләр вакытында мобилизацияләнгәннәрнең күбесе профессиональ хәрбиләргә әверелгән, әмма ротация мәсьәләсендә хакимият фронттагы чынбарлыктан чыгып эш итәчәк.
чыганак: https://intertat.tatar/news/maxsus-xarbi-operaciyada-katnasucy-mobilizaciyalangan-xarbilar-kaican-rotaciya-utacak-5871925 ТАТАР ТУДЕЙ ТЕЛЕГРАМ КАНАЛЫ - https://t.me/tatartoday
