Кем генә ашарга яратмый да, тәмле ризыклар пешерми икән? Җырчылардан да әлеге сорауга җавап алырга булдык. Кем, кайда, нинди милли ризык татып караган. Ул аңа нәрсәсе белән тәэсир иткән? Хәзер белербез! //ТМТВ//
Мөнир Рахмаевның ризыкка карата бернинди критерияләре дә юк. Билгеле ул тәмле булырга тиеш, ә менә нинди милләтнеке булуы миңа бик тәэсир ясамый, диде ул.
Дамир Зиннатуллинның әлегә зур сәяхәтләргә чыкканы юк. «Мине барысы да алда көтә», — дип елмайды егет. Ә менә Оренбург өлкәсендә кунак булганда егеткә ат иттеннән ясалган казылык ашатканнар. Аның тәмлелеген белсәгез, дип уртаклашты Дамир. Аннан соң җырчының бака ашыйсы килә икән. Арагызда баканы тәмле пешерүче булса, Дамирны сыйларга онытмагыз.
Ә менә шәп итеп пицца пешерергә өйрәнәсегез килсә, Рамил Закировка мөрәҗәгать итегез. Ул бу эштә «ас»! Рамил Закиров италия кухнясын бик ярата икән. Хәтта үзе пицца, төрле пасталар пешерә ала. «Якыннарым әлеге сыйфатымны белеп, еш кунакка киләләр, һәм пиццаның төрлеләренә заказ да бирәләр әле», — дип көлде Рамил.
Артур – Марат дуэтына да тукталып узыйк. Егетләр темпераментлары буенча бер-берсенә бик охшаган булсалар да, аш-суга карата фикерләре төрлерәк. Марат пешерергә, тәмле ашарга бик ярата, ә Артур исә, тәмле ашарга яратса да, аш-су бүлмәсенә ашарга гына керә икән. «Әгәр дә Марат ресторан ачса, мин анда гына ашап йөрер идем. Ул бик тәмле пешерә»,- дип өстәде Артур.
Татар эстрадасының танылган җырчыларның берсе — Гүзәл Уразова быел Кытайда ял итеп кайткан. «Андагы милли ризыклар дөрестән дә селкенә» -көлеп сөйләде Гүзәл. Ләкин җырчы андыйларын урап узган. Дөге, балык, роллыларга ошаган ризыклар белән генә тукланган.
