Тимер юлында башы өзелгән хәлдә табылган егетне руханилар кануннарга ярашлы күмәдән баш тарта. Фаҗигале рәвештә һәлак булган яшь егетнең якыннары чиркәүдән ярдәм өмет итә.
Мәрхүмне 9 июньдә иртәнге сәгать 11дә Чишмә станциясендә шәһәр яны поезды киткәннән соң табалар. Анатолий һәлак булган урыннан ерак түгел яши, аны барысы да тормыш сөючән, яхшы егет буларак белә.
«Мин яраткан абыемны җирләдем, ул тормышны яратты һәм үзенә кул салырдай кеше түгел, тик бу беркемне дә борчымый. Мин үзем Раевкада яшим, аны табутта гына күрдем. Анда нәрсә булган, ахырына кадәр билгеле түгел, ә кем нәрсә тели, шуны сөйли», — ди аның туганы.
Аның сүзләренә караганда, Анатолий белән туган көннәре бер үк көнне, 6 июньдә. Үлеменә өч көн кала аңа 33 яшь тулган. Егет, гадәттәгечә, аңа шалтыратып, туган көне белән котлаган, тавышы буенча фикер йөрткәндә, барысы да яхшы булган, аның үз-үзенә кул салу мөмкинлеген үз алдына да китереп булмый.
«Ул өйләнергә җыена иде. Кәләше белән безне таныштырырга да өлгермәде. Инсульт кичергән әнигә дарулар сатып алырга булышу өчен ике эштә эшләде. Без көн саен шалтыратышып тордык», — дип сөйли кыз.
Танышлары Анатолийның мәрхәмәтле, ярдәмчел егет булуын, һәрвакыт һәркемгә ярдәм итәргә әзер булуы турында сөйлиләр.
Анатолийның туганнары беркемнән дә ярдәм сорамый, мәрхүмнең дуслары җирләүдә булышкан, ә калганнары белән гаилә үзе аңлашачак. Хәзерге вакытта якыннары үкенгән бердәнбер нәрсә — чиркәүдә үлем характеры аркасында һәлак булган кешене догалар белән озатырга рөхсәт итмиләр.
Уфа епархиясе вәкилләре фикеренчә, суицид — зур гөнаһ, шуңа күрә Анатолийга гыйбәдәт гамәлләре кылырга ярамый. Туганнарга тынычланырга кирәк, бу җәһәттән алар ярдәмгә килергә әзер.
Чыганак: Кызыл Таң