Татарстанда ике түләүле юл – Вознесение трактының икенче өлеше һәм Алексеевск – Әлмәт юлыннан йөрү бәясе билгеле булды. Бу хакта Татарстан Рәисе матбугат хезмәте җитәкчесе Лилия Галимова әйткән.
“Искәртеп узабыз: кайбер мәгълүмат чаралары моңарчы юл бәясе турында хәбәр иткән саннар, бу уңайдан кабул ителгән соңгы карарга тәңгәл килми”, – дигән ул.
Лилия Галимова сүзләренә караганда, әлеге мәсьәләдә үткәрелгән анализ Рөстәм Миңнехановка тапшырылган.
Аерым алганда, җиңел машина йөртүчеләр (I категория) өчен Вознесение трактыннан хәрәкәт итү – 90 сум, ә хәрәкәт күп булган вакытта (6.30–9.00 һәм 17.00–19.30 сәгатьләрдә) – 150 сум тәшкил итәчәк. II категория йөртүчеләр өчен, вакытына карамастан – 150 сум, III категория өчен – 250 сум, III категория өчен – 350 сум тәшкил итәчәк.
Алексеевск – Әлмәт юлыннан хәрәкәт итүнең һәр чакрымы өчен җиңел машина хуҗаларына (I категория) – 4,50 сум түләргә туры киләчәк. II категория йөртүчеләр өчен – 6,75 сум, III категория өчен – 9 сум, III категория өчен – 18 сум.
Җиңел машина хуҗаларына Алексеевск – Әлмәт юлыннан узу 653 сумга төшәчәк.
Чыганак: https://vatantat.ru/2024/12/159009/ ТАТАР ТУДЕЙ ТЕЛЕГРАМ КАНАЛЫ - https://t.me/tatartoday
