Баклажанлы салат рецепты

Редактор1 editor1 — Wed, 10 Aug 2016 19:57:58 +0000

Баклажанлы салат

Кирәк булачак:

шакмаклап туралган 3 кг баклажан,

озынча итеп туралган ½ кг болгар борычы,

угыч аша чыгартылган ½ кг кишер,

ваклап туралган 2 башлы суган,

изелгән сарымсак,

1 бал кашыгы кара борыч,

1 бал кашыгы тоз,

1 бал кашыгы паприка,

4 аш кашыгы шикәр комы,

100-150 г уксус,

100-150 көнбагыш мае.

Әзерләү тәртибе:

2 литр суга тоз салып кайнатып чыгарырга.

Суга баклажаннарны салып, 5 минут кайнатырга. Соңыннан, дуршлагка салып, сыркытырга.

Зур савытка барлык ингредиентларны салып болгатырга, суынган баклажаннарны да кушарга. Салатны бер тәүлеккә суыткычка куеп торырга.

Икенче көнгә тәмле салат әзер!

Баклажанлы рулет рецепты

Редактор1 editor1 — Sat, 06 Aug 2016 08:27:26 +0000

Кирәк булачак: 800 г баклажан, 200 г помидор, 100 г укроп, 1 йомырка, чеснок, тоз, сыр, көнбагыш мае.

Пешерү тәртибе:

Баклажаннарны юарга, чистартырга һәм 0,5-2 см итеп буйга кисәргә. Баклажан кисәкләрен тозлы суга салып ярты сәгатькә калдырырга.

Помидорларны юка телемләп кисәргә, укропны вакларга.

Чеснокны ваклап кисәргә, сырны угычтан чыгарырга. Укроп янына сыр,чеснок кушып яхшылап болгатырга. Эчлек әзер.

Йомырканы чәнечке ярдәмендә яхшылап болгатырга.

Баклажаннарны сөлгегә куеп киптереп алырга һәм йомыркага манырга. Шуннан соң, майлы табада ике яктан кыздырырга.

Әзер баклажан кисәгенә бер телем помидор, бер бал кашыгы эчлек салып рулет итеп төрергә.

Әзер рулетларны бераз суыткычка куеп алырга.

Ашларыгыыз тәмле булсын!