Архивы Республика көне - Tatar Today - татар яңалыклары.

Коронавирусның икенче дулкынын көтәргәме? [видео]

Рамиля Валиахметова — Mon, 31 Aug 2020 20:07:34 +0000

// Татар тудей // Татар бүген //

Роспотребнадзор башлыгы Анна Попова Россиядә COVID-19ның икенче дулкыны барлыкка килү мөмкинлеген бәяләде.

Хәзер ни генә булса да, әзер булып торырга кирәк. “Әмма барлык кирәкле кагыйдәләр үтәлсә, икенче дулкын булмаска да мөмкин”, дип билгеләп үтте Попова.

Бүген Татарстанның Кулланучылар хокукларын яклау һәм кеше иминлеге өлкәсендә күзәтчелек федераль хезмәтендә хәбәр итүләренчә, Республика көнен бәйрәм иткәннән соң коронавирус белән авыручылар санының артканмы, юкмы икәнен бер атнадан соң гына белергә мөмкин булачак.

Чыганак: Реальное время

Запись Коронавирусның икенче дулкынын көтәргәме? [видео] впервые появилась Tatar Today - татар яңалыклары..

АКШта шарлавык Татарстан әләме төсләренә керә [фото]

Alfia — Sat, 31 Aug 2019 15:08:39 +0000

Канада белән АКШ чигендә урнашкан Ниагара шарлавыгы 30 августта Татарстан суверенитеты көненә багышлап Татарстан әләме төсләрендә яктыртылды.

Бу хакта Канаданың Монреаль шәһәре татарлары җәмгыяте рәисе Марат Сәлахетдинов Ниагара шарлавыгы идарәсе белән алдан килешкән иде.

Әлеге вакыйга Татарстанга һәм бар татар халкына Канада татарларының бүләге булды.

Оештыручыларның берсе, Монреальдән килгән Алимә Сәлахетдинова Азатлыкка белдерүенчә, шарлавык янына Оттава, Торонто, Монреаль, Баффоло, Коламбус шәһәрләреннән барлыгы 50ләп татар жыелган, Лондоннан килгән татарлар да булган. Кайбер гаиләләр балалары белән килгән иде дип сөйләде ул.

“Бик яхшы яктыртылган иде, төсләре матур булды. Бу табигать могҗизасының Татарстан әләме төсләрендә булуы безнең өчен бик зур вакыйга булды, аңлата алмаслык күтәренке хисләр кичердек. Бер абый республика корылганда нинди хисләр бар иде, бүген дә шул хисләр барлыкка килде дип әйтте. Горур яшә, Татарстан!” дип тә өстәде Алимә.

Бу хәлне шарлавыкны карарга килгән күпсанлы туристлар да күргән. “Мин үзем генә дә 30-лап туристка Татарстанның нинди республика булуын, кайда урнашуын сөйләп аңлаттым һәм башкалар да шулай эшләде. Йөзләрчә кешегә бу бәйрәм турында аңлаттык”, диде ул.

Ярты сәгать дәвам иткән чара бәйрәм салюты һәм “Туган тел” җыры белән тәмамланган.

Шарлавык янына җыелган татарлар һәр елның 30 августында Татарстан әләмнәре белән биредә җыелырга дип килешеп таралышкан. Алар башка илләрдә яшәүче татарларны да Татарстан суверенитеты көнен искә алу өчен шундый чаралар уйлап табарга чакыра. “Сабантуйлар белән генә чикләнмичә, 30 августны да, шуның аша Татарстанны да дөньяга танытырга кирәк”, ди Алимә.

Мәгълүмат чит ил агентлыгыннан

Запись АКШта шарлавык Татарстан әләме төсләренә керә [фото] впервые появилась Tatar Today - татар яңалыклары..

Казанда “Уйнагыз гармуннар” бәйрәме ничек үткән? [фотогалерея]

Редактор1 editor1 — Tue, 30 Aug 2016 18:47:42 +0000

30 август Камал театры каршында “Уйнагыз гармуннар” бәйрәме булып узды.

Бәйрәмдә катнашучыларны яңгыр да куркытмады. Йөзләрчә гармунчылар моңлы көйләрен сузды. Ансамбльләрнең чыгышы да килгән кунакларның кәефен күрде.

Запись Казанда “Уйнагыз гармуннар” бәйрәме ничек үткән? [фотогалерея] впервые появилась Tatar Today - татар яңалыклары..

Фәндәс Сафиуллин: “20 елдан Идел-Урал республикасы төзелер, бәлки” [видео]

Редактор1 editor1 — Tue, 30 Aug 2016 07:20:12 +0000

Татарстан суверенитеты өчен көрәшүче, милләтпәрвәр, хәрбилектән сәясәткә килгән Фәндәс Сафиуллин 20 елдан Татарстан территориясе киңәер, дип уйлый. Быел Фәндәс ага 80 яшен тутырды. //Азатлык радиосы//

Татарстанның мөстәкыйльлек турында Декларацияне кабул итү – күп шәхесләрнең көрәш нәтиҗәсе. Шул шәхесләрнең берсе – Фәндәс Сафиуллин. Татарстанның бәйсезлеге, кешеләрнең хокуклары, милли университет, латин имласы өчен көрәшкән депутат бүген дә җәмәгать эшләре белән мәшгуль.

Артык актив түгелмен, ди үзе хакында, әмма чынында сәяси мәйданда барган вакыйгаларны барысын да күзәтә. Фәндәс ага интернетта бик актив, татар мәнфәгатенә кагылышлы мәсьәләләрдә тел яшеренеп калмый. Даими Азатлык радиосын күзәтеп бара. Бакчасында мәш килә, йөзү белән шөгыльләнә, табигатьнең матур мизгелләрен фотога төшереп, рәсемнәрне туплый. Татар сәнгатенә гашыйк кеше ул.

Татарстанның мөстәкыйльлеге турында Декларацияне мөнбәрдән уку, бу мөһим документ текстын зарыгып көткән халыкка ирештерү дә Фәндәс Сафиуллинга насыйп була.

– Фәндәс ага, компьютерыгызның эш өстәлендә – туган авылыгыз күренеше. Сезнең туган нигезегез исәнме? Азнакай районың Мәлбагыш авылына кайтып йөрисезме?

– Туган нигез инде юк. Без өч бала туганбыз. Әмма бертуганнарым яшьли үлгән. Бер бала булып үстем. Кадерле бала булдым дип әйтә алмыйм. Ул вакытта берсе дә үчтикиләнеп, иркәләнеп үсә алмады. Алты яшемдә сугыш башланды. Әти сугышка китте, без әнинең авылына яшәргә кайттык.

Әтинең хатлары миндә саклана. Минем өчен алар – кадерле ядкарь

Әтинең сугышка китүен сәгате-минутына кадәр хәтерлим. Бу – Сабан туе көне. Бәйрәменең кызган чагы. Ерактан берәү атта чаба. Ул: “Сугыш! Сугыш башланды!” дип кычкырып килде. Авыл халкы бу хәбәргә кычкырып еламады, кайгылы хәлне ишетү белән барысы да шым гына таралашты. Әтинең сугышка китүе – үзе бер вакыйга. Ике тапкыр китте ул. Беренчесеннән ике-өч көннән әйләнеп кайтты. Икенче китүендә без аны Әлмәткә кадәр сигез чакрым озата бардык. Әни белән яугирләр колоннасы яныннан атлап бардык. Бер ел дәвамында хатлар алдык. Әтинең хатлары барысы да миндә саклана. Минем өчен алар – бик кадерле ядкарь. 1942 елда әти һәлак була. Ул Ленинград янында канлы сугышта юк була. Кабере юк, алар барысы да туганнар каберендә җирләнгән.

– Фәндәс абый, ә хәрбилеккә ник киттегез? Балачак хыялы идеме әллә?

– Анысы уйламаганда килеп чыкты. Язмыш, күрәсең. Мин мәктәпне Бөгелмәдә тәмамладым. Яхшы укыдым, әмма кайда барырмын, кем булырмын дип әллә ни уйланмаганмын, күрәсең. Һәрхәлдә үземне ниндидер бер һөнәр иясе булырмын дип хыял белән җенләнгәнемне хәтерләмим. Унынчы сыйныфны тәмамлаганда урамдагы бер коймада белдерү күрдем. Анда “Продолжается набор в военное училище” дип язылган иде. Белдерү адресы белән кердем дә шунда 5 минут эчендә минем киләчәгемне хәл иттеләр дә куйдылар. Совет армиясендә 34 ел дәвамында хезмәт иттем. Уйлануга бер минут та булмады, ә армиядә 34 ел буе буталып йөрдем.

Хезмәтем тәмамланганчы безнең юлыбыз дөрес, әмма бу имансызлар аркасында сазлыкка батып киләбез, дигәнне аңлый идем. Еллар узып дәүләт системы никадәр черегәненә төшендем. Барысы да ачык күренде. Дәүләт системы үзгәрергә тиеш иде. Кешеләрне дә күмәк хуҗалыклар дип алдадылар, колбиләүчелек системы авыл кешесен фәкыйрьләндерде. Бездә һәрвакыт феодолизм булды. Моңа түзәрлек хәл юк иде. Армиядән соң мин Казанга кайттым, мине бер белмәгән килеш халык депутат итеп сайлады. Миңа һәм башка халык депутатларына тормышны яхшы якка үзгәртергә мөмкинлек бирелде.

Парламентка миллионер булмаган, әмма халык мәнфәгатен өстен куючылар сайланды

Әле дә хәтердә: “Вечерняя Казань” газетасында 15 дүрткел сантиметрлы белдерү бастырыр өчен бер айлык хезмәт хакы кирәк иде. Телевидениедә ике минут чыгыш ясаган өчен зур сумнарны чыгарып салуны сорадылар. Уул чакта парламентка миллионер булмаган, әмма халык мәнфәгатен өстен куйган кешеләр депутат итеп сайланды. Шуңа күрә парламентта ирек иде.

Сайлангач, һәркайсы йөкләмәләреннән алынган тәкъдимнәрен кертә башлады. Беркемнең дә тәкъдиме үтмәде. Ә минеке узды. Мин барлык сессияләр, утырышлар радио-телевидение аша тапшырылып барырга тиеш дидем. Элеккеге номенклатура кешеләре каршы төште. Аларга бу ят нәрсә, чөнки барысын да халыктан яшереп эшләделәр. Яңа заманда яңача эшләү рәвеше дип без аны гамәлгә ашырдык. Кешеләр депутатларның эшчәнлеген күзәтеп торырга тиеш. Парламентта беренче башкарган эшем шул булды.

Фәндәс Сафиуллин Татарстан Югары советы сессиясендә. 1990 ел

– Тормышыгызда иң истәлекле вакыйга дип сорасак та, җавабыгызны беләбез. Ул – Татарстаның мөстәкыйльлеге турында Декларация текстын мөнбәрдән уку. Шулай да ник шобага сезгә төште? Башкалар да теләгәндер бит?

– Кызык булды ул хәл. Декларация тексты озак әзерләнде, бик күп бәхәсләр булды. Барысы да ошатырлык текст булырга тиеш иде. Килештерү комиссиясе төзелде. Шул утырышларның берсендә ТАССР урынына Татарстан республикасы дип язарга тәкъдим иттем, әмма исемне үзгәртүгә Миңтимер Шәймиев: “Әле бит социализм вакыты, заманасы шул, ашыкмыйк”, дип басыйм ясап үзгәрттермәде. Проект караламасында ТАССР дип калды. Танылган мәрхүм режиссер Дамир Сираҗиев тапкырлыгы белән тарихи документка “ТССР – Татарстан республикасы” дип, ягъни А (автономияле) хәрефсез генә кереп китте. Машинисткалар янына мине ияртеп килде дә хәйләләде: “Кызлар, ике урында ялгышлык киткән бит”, дип каләм белән шушы ике сүзне өстәп куйды.

Декларация текстын татар кешесе укырга тиеш диелде

Декларация текстын Шәймиев урынбасары Нефедов укырга тиеш иде. Әмма Дамир монда да өлгер булып чыкты. Ул Декларация текстын татар кешесе укырга тиеш дип, комиссия әгъзалары белән аерым сөйләшеп, күндерде. Аннары ул депутатлар текстны Фәндәс Сафиуллин укуны сорый дип белдерде. Шәймиев: “Ә Нефедов?” дип аптырап сорады. Аңа барыбер булуын аңлагач, Шәймиев кулын селтәп миңа карап: “Ярар, син укырсың”, диде. Менә шулай хәл ителде бу вакыйга. Декларацияне уку минем өчен, чыннан да, тормышымның иң кадерле вакыйгасы.

– Фәндәс абый, Сез гел мөнбәрдә идегез. Һәрвакыт нидер тәкъдим яңгырата идегез, ризасызлык белдерә идегез. Гаделлек өскә калкып чыксын өчен көрәш барды. Көрәшнең уңай яклары да бик күп, без аны күрәбез, бәялибез. Татарстан башкалардан аерылып тора, ныклы аякта басып тора. Тик шулай да хокукларның бертигез булуы өчен көрәштә халык оттырды бит. Кемдер Forbes исемлегендә, күпчелек тормышын очын очка бәйли. Табышлар гадел бүленсен өчен, халык мәнфәгатьләре өстенлек итсен өчен буын алмашынырга тиешме?

– Суверенитет өчен көрәшкәндә, Татарстанны оҗмах оясы итеп күрмәдек. Максат – гаделлек урнаштыру. Татар халкы бер халыктан да ким түгел, әмма үзебезне дөньяга күрсәтер өчен мөмкинлекләр булмады. Совет берлеге матрешка кебек иде. Кайбер халыклар, берләшеп, союздаш республика төзи ала иде, ә кемдер бары тик автоном дәрәҗәсендә генә калды. Дәрәҗәгә карап, хокуклар да төрле. Дөрес, табигатьтә дә тигезлек юк, әмма гаиләдә тигез хокуклык бар. Ил дәрәҗәсендә фикер йөрткәндә дә, аерым халыкның санына карамастан, барысы да тигез хокуклы булырга тиеш. Мин шушы хокук өчен көрәштем.

– Фәндәс абый, Русиядә, федератив мөнәсәбәтләрне саклап, Татарстанның бәйсезлеген алга сөрүче, сезнең кебек шәхесләрнең эшен дәвам итүчеләр булырмы? Милли кадрларны әзерләргә кирәкме?

Берәр очрак килеп чыкса, яшьләр ялт итеп калкып чыгачак

– Андый кадрларны беркем дә әзерләми. Яшьләр арасында бар андый шәхесләр, бәлки, барысын да күреп бетермибездер дә. Әмма иманым камил, берәр очрак килеп чыкса, яшьләр ялт итеп калкып чыгачак. Кеше тарихыбызны, уңыш яки ялгышларыбызны күреп, чынбарлыкны аңлап, үсә икән, көрәшче булып өлгерә ул. Мәсәлән, ул ни сәбәпле безнең татар мәгариф системасы бетерелә, кем безне упкынга этәрә, кайсы депутатлар халык мәнфәгатен уйлап эш итә, кемнең дәшми-тынмый татарга, кешеләргә каршы эшләүче кануннар өчен тавыш биргәнен күрә икән, артабан нишләргә икәнлеген үзе аңлый. Монда матбугатның тәэсире бик зур. Алар да аңлату эшен алып барырга тиеш. Кайда кара, кайда ак икәнен аңлату да мөһим. Күпләр: “Мин сәясәт белән кызыксынмыйм, кирәге юк”, дип әйтә. Син берничек тә сәясәткә катнашмый кала алмыйсың. Мин сәясәт белән кызыксынмыйм дигән сүз – үзе бер сәясәт. Тик бу – бик куркыныч сәясәт.

– Сез һәм татар зыялылары хыялланган Милли университет милләтпәрвәр элитаны тәрбияли аламы? Милли университет турында мәгълүматны, бәлки, Татарстан президенты Рөстәм Миңнеханов белмидер дә. Гадәттә, бездә мәсьәләне бер кеше хәл итә бит.

– Әлбәттә! Милли университет студенты безнең тарихны, сәясәтне, гореф-гадәтләрне, мәдәниятны өйрәнәчәк. Милли элита университетта тәрбияләнә. Чит илләрдә бит шулай. Фикерле, татар карашлы, Татарстан яклы кешеләр кирәк.

Милли университет идеясын тормышка ашырмау – иң зур үкенеч

Милли университет идеясын оныттыру, аны тормышка ашырмау – иң зур үкенечләрнең берсе. Ел саен укытучыларның август киңәшмәләре уза. Ник шунда бер укытучы Милли университет хакында басып сүз кузгатсын? Юк, кирәкле җирдә кул чабалар да, таралышалар. Әгәр дә без бер кешегә – президентка гына өметләнәбез икән, бер әйбер дә килеп чыкмаячак. Әгәр халык үзе борчылмаса, хакимият тә селкенмәячәк. Башлап җибәрүче кирәк. Шунда инде иярүчесе дә табылыр. Мин инде хәзер башлап җибәрүче дә, иярүче дә, күзәтүче дә түгел. Мин үземне татар ватандашы дип саныйм.

– Шундый күренеш бар: әдипләр, сәнгатькарьләр, тел өчен көрәшүчеләрнең гадәттә балалары ана телен белми, урысча сөйләшә. Сездә бу мәсьәлә ничегрәк?

– Армиядә хезмәт иткәндә төрле шәһәрләрдә яшәргә туры килде, анда мохит урыс телле булды. Үзем дә Казанга урыслашып кайткан идем. Балалар, коммунналь фатирларда торып, татар яшьтәшләрен күрмичә урыс балалар бакчасында тәрбияләнеп үсте. Кызганычка, тел мәсьәләсе авыр. Ә оныгыбыз Ильяс, шөкер, татарча матур гына сөйләшә! Соңга калдык без Казанга кайту белән, шуңа күрә балаларның телләре татарча ачылмады, милли мохит кирәк.

– Бүген татарның хәле нинди? 20 елдан Татарстанны ничегрәк күрәсез?

Татар халкы бетмәячәк

– Нинди генә шартлар булмасын, татар киләчәктә дә үзенең сыйфатын югалтмас дип ышанам. Татар халкы бетмәячәк. Дөнья бетсә дә, без бетүчеләрнең соңгыларыннан булырбыз. Бетерә алмаслар безне.

2036 елны күзаллау авыр, чөнки хәзер дөнья бик зур тизлектә үзгәрә. Фаразлау авыр. Шулай да, бәлки, ул вакытка Татарстанның чиге киңәер, исеме дә башка төрле булыр. Татар-башкорт, яки Идел республикасы исеме астында көчле республика барлыкка килергә мөмкин. Әмма мин ул вакытка безнең халкыбыз аңы, белеме, мәдәнияты бермә-бер үсәр дип өметләнәм. Киләчәгебез өметле булсын өчен татарлар Русия халыклары арасында әхлак ягыннан да, белем ягыннан да беренчелеккә омтылырга тиеш. Киләчәк өметне без бүген әзерләргә тиеш.

Запись Фәндәс Сафиуллин: “20 елдан Идел-Урал республикасы төзелер, бәлки” [видео] впервые появилась Tatar Today - татар яңалыклары..

Рөстәм Миңнеханов татарстанлыларны республика көне белән котлый [видео]

Редактор1 editor1 — Tue, 30 Aug 2016 05:08:58 +0000

Татарстан Республикасы Президенты Рөстәм Миңнехановның Республика көне уңаеннан мөрәҗәгате:

«Хөрмәтле татарстанлылар!

Татарстанның дәүләт бәйрәмнәреннән иң әһәмиятлесен – Республика Көнен быел егерме алтынчы тапкыр билгеләп үтәбез.

Татарстанның хәзерге тарихы шушы зур вакыйгадан башланып китте, ул хезмәт сөюче, күпмилләтле Россиянең һәм туган республикабызның традицияләренә хөрмәт белән караучы, күңелендә ватанпәрвәрлек хисләре саклаган барлык татарстанлыларны берләштерде.

Икътисадның заманга ярашлы итеп яңартылуы һәм җитештерүдә төрлелеккә ирешү, Иннополис югары технологияләр шәһәрен төзү, Россиядәге иң уңышлы эшләүче дип танылган «Алабуга» махсус икътисадый зонасының егәрен даими арттыра килү, федераль әһәмияткә ия булган, гаять зур «ИнноКам» кластерын булдыру, инвестицияләр җәлеп итү һәм яңалыклар үзләштерүдә актив эшләү – болар барысы да Татарстан Республикасының киләчәктә уңышлы үсешенә юл ача.

Татарстанның яңа дәүләтчелеге урнашканнан бирле кешеләрнең тормыш сыйфатын яхшырту икътисадый үсешнең төп максаты булып тора һәм бу аеруча зур кыйммәткә ия. Бүген республикада социаль яктан бик әһәмиятле утыздан артык программа эшли.

Торак төзелеше актив алып барыла, мәгариф, спорт һәм мәдәни объектлар торгызыла, фельдшерлык-акушерлык пунктлары ачыла, эшкуарларга, фермер хуҗалыкларына, шәхси хуҗалыкларга ярдәм буларак комплекслы чаралар күрелә. Паркларны, шәһәр бакчаларын, су саклау зоналарын төзекләндерү, матурлау белән бәйле проектлар кешеләр өчен уңайлы тирәлек булдыруга юнәлтелгән.

Татарстанлылар бу үзгәрешләрне хуплый, программалар һәм проектларны гамәлгә ашыруда иҗтимагый үсешкә йогынты ясау омтылышы белән шәхсән катнашырга теләүчеләрнең саны арта, бу исә – соңгы елларда ирешелгән уңай эш нәтиҗәләренең берсе.

Милләтара һәм динара мөнәсәбәтләрнең каршылыксыз үсеше – җәмгыятьтә урнашкан дуслык-татулыкның мөһим бер факторы. Гаять зур ике проект – Болгар ислам академиясен төзү һәм Казан Мәрьям Ана иконасы соборын торгызу – Татарстанда төп ике конфессиянең киләчәктәге хезмәттәшлеге өчен ышанычлы нигез тәшкил итә. Төрле халыкларның бер бәйләмдәге мәдәни җәүһәрләре, диннәр арасындагы татулык – чиксез хәзинәбез, конкурентлыкта шик астына куелмый торган өстенлегебез.

Икътисад өлкәсендәге казанышларыбыз, социаль-сәяси тотрыклылык җиденче чакырылыш Дәүләт Думасы депутатларын сайлауны Татарстанда уңышлы уздыру өчен уңай алшартлар тудыра. Депутатлыкка кандидатлар арасында үзләренең профессионаллыгын эше белән раслаган, Россия Федерациясенең законнар чыгаручы югары органында республика вәкиле булып эшчәнлек алып барырга сәләтле татарстанлылар аз түгел.

Кадерле дуслар! Бердәмлек рухы, берләшеп эшли белү – Татарстанның һәм татарстанлыларның көчле ягы. Бу исә үз алдыбызга амбицияле бурычлар куярга, аларны күмәк хезмәт, иҗадилык, зур ышаныч һәм күркәм үҗәтлек белән башкарып чыгарга һәрчак мөмкинлек бирде һәм киләчәктә дә шулай булачак. Болар барысы да безгә көч бирә, киләчәккә ышанычыбызны арттыра.

Татарстан Республикасы Дәүләт Советы һәм Хөкүмәте исеменнән, шәхсән үз исемемнән сезгә иминлек, тыныч, якты тормыш, барлык уй-ниятләрегезнең чынга ашуын, бәхет һәм күңел күтәренкелеге телим.

Бәйрәм котлы булсын! Республика Көне белән!

Татарстан Республикасы Президенты Рөстәм Миңнеханов».

Фото: rusisworld.com

Запись Рөстәм Миңнеханов татарстанлыларны республика көне белән котлый [видео] впервые появилась Tatar Today - татар яңалыклары..

Республика көне уңаеннан нинди бәйрәм чаралары көтелә? [программа]

Редактор1 editor1 — Tue, 30 Aug 2016 04:56:01 +0000

Республика көне уңаеннан, 30 августта башкалабызда төрле бәйрәм чаралары узачак.

Ял көнендә кая барыйм икән дип, баш ватучыларга бәйрәм көннең программасын тәкъдим итәбез:

10.00-14 сәг. – Камал театры каршындагы мәйданда “Уйнагыз, гармуннар” фестивале.

10.00 сәг. – Горький исемендәге ял паркында спорт бәйрәме башланып китә.

Җиңү проспекты урамы, 56 йорт каршында – ишегалды бәйрәме.

11.00-15.00 сәг. – Горький исемендәге ял паркында – балалар бәйрәме.

11.00 сәг. – Урицкий паркы ачылышы.

12.00-15.00 сәг. – Җиңү паркы күлендә – спорт ярышлары.

12.00 – Иске татар бистәсе “Иске татар бистәсе кунаклар чакыра” бәйрәме.

13.00-16.00 – Казанның Меңъеллык мәйданында, авто-мотошоу «Kazan city racing».

14.00 сәг – МКСК «Казань», ат спорты бәйрәме.

10.00-11.45 сәг – “Казан” гаилә үзәге янында – Хәрби тынлы оркеср чыгышлары.

11.45-17.30 сәг – “Казан” гаилә үзәге янында – “Мәдәният бизәкләре” фестивале.

13.45-15.45 сәг. – “Казан” гаилә үзәге янында- “Татар радиосы”нан бәйрәм программасы.

19.00-22.00 сәг – “Казан” гаилә үзәге янында- Зур бәйрәм концерты.

20.00 сәг. – Игенчеләр сарае каршында – опера сәнгате фестивале “Казан көзе” ( Казанская осень)

22.00 – бәйрәм салюты.

Төп фото: tripsmile.ru

Запись Республика көне уңаеннан нинди бәйрәм чаралары көтелә? [программа] впервые появилась Tatar Today - татар яңалыклары..

Республика көнендә салютның каян атылачагы билгеле булды

Редактор1 editor1 — Mon, 22 Aug 2016 11:39:10 +0000

30 августта Казан каласында республика көне билгеләп үтелә. Гадәттәгечә, бәйрәм салют белән тәмамлана. Быел ул нинди вакытта булачак һәм каян атылачак соң?

Казан Башкарма комитеты җитәкчесенең беренче урынбасары Дамир Фәттахов сүзләренчә, салют 22.00 сәгатькә планнаштырылган.

“Төрле елларда салют төрле мәйданчыклардан була иде. Су мәйданы казанлыларга һәм шәһәр кунакларына салют матурлыгына соклану өчен иң уңай урын”, диде Дамир Фәттахов.

Димәк, бәйрәм фейервергы Кремль яр буеннан һәм “Казан” гаилә үзәге яныннан яхшы күренәчәк.

Запись Республика көнендә салютның каян атылачагы билгеле булды впервые появилась Tatar Today - татар яңалыклары..

Шәһәр һәм республика көне уңаеннан, Тинчурин театры иң яхшы спектакльләренә чакыра

Редактор1 editor1 — Thu, 18 Aug 2016 10:55:53 +0000

Шәһәр һәм республика көне уңаеннан, 24-29 августта Кәрим Тинчурин театры казанлыларга һәм башкала кунакларына иң яхшы алты спектаклен тәкъдим итә. Шуларның дүртесе – узган сезон премьералары.

24 августта тамашачылар К. Тинчуринның “Назлы кияү” спектаклен карый ала. Театр сәхнәсендә 2 ел дәвамында уйналган әлеге спектакль тамашачы тарафыннан шактый җылы кабул ителә. 1915 елда иҗат ителгән әсәрдә күтәрелгән мәсьәләләр бүген дә актуальлеген югалтмый. Бай кияү өйләнергә җыенуын белдерә. Күңеленә хуш килгән кәләшне табып биргән кешегә исә алтын бизәнү әйбере вәгъдә итә. Вакыйгалар төенләнеше шуннан гыйбарәт. Спектакльне сәхнәгә театрның баш режиссеры РФның атказанган артисты, ТРның атказанган сәнгать эшлеклесе Рәшит Заһидуллин куйган.25 августта тамашачыларга узган сезон премьерасы – “Чулпан” спектакле тәкъдим ителә. Күренекле татар драматургы Шәриф Хөсәенов әсәре буенча куелган әлеге спектакль сәхнәдә чын хисләрнең шаһиты булырга мөмкинлек бирә. Иртәме-соңмы, беренче мәхәббәт һәммәбезгә дә килә. Күпләр өчен ул алдагы мөнәсәбәтләрнең асылына әйләнә, ә кайберәүләр өчен упкынга әверелә… “Чулпан” мелодрамасын тамаша кылганнар моңа инанмый калмас кебек. Спектакльнең режиссеры – Резеда Гарипова.26 августта узган сезонның чираттагы премьерасы – Шамил Фәрхетдиновның “Эх, алмагачлары!” спектакле була. Комедия жанрындагы әлеге спектакль 6 яшьтән өлкәнрәк тамашачыга исәпләнгән, шуңа да аны бөтен гаилә белән килеп карарга мөмкин. “Эх, алмагачлары!” юмор, кешелеклелек белән сугарылган, ул кәефне күтәрә һәм күңелдә уңай тәэсирләр калдыра. Спектакльне сәхнәгә куючы режиссер — Рәшит Заһидуллин.27 августта күренекле драматург Хәй Вахит әсәре буенча куелган “Кияүләр” музыкаль комедиясе тәкъдим ителәчәк. Туй алдыннан гына егет белән кыз арасыннан кара мәче уза. Туйга күпме ризык әзерләнгән, күпме кунак чакырылган! Авылдан әби белән бабай да килеп җиткән! Дөрес, әлегә аларның кияүне күргәннәре юк. Инде нишләргә? Кунаклар һәм әби-бабай киткәнче генә туйда икенче берәүне кияү итеп утыртып торудан башка чара юк… Театрның баш режиссеры Рәшит Заһидуллин сәхнәгә куйган җырлы-биюле әлеге спектакль көлкеле вакыйгалар аша җитди мәсьәләләр күтәрә.28 августта тамашачыларның “Әллә язмыш, әллә ялгыш” спектаклен карау мөмкинлеге була. Спектакль Наталья Нестерованың “Выйти замуж” дигән проза әсәренә нигезләнеп иҗат ителгән. Режиссер Резеда Гарипова шуның буенча драма әсәре, ягъни инсценировка эшләгән, аны Илфак Хафизов тәрҗемә иткән. Сюжет исә бик гади. Төп герой — Люция, барлык кешеләр кебек үк, бәхетле булырга тели һәм гомер буе шуңа омтыла. Ул чиста, намуслы, самими. Шул сыйфатлары аркасында, төрле маҗараларга юлыга, әмма могҗизаларга ышанудан туктамый.

29 августта узган сезондагы тагын бер премьера – драматург Илһам Гали пьесасы буенча куелган “Беренче мәхәббәт” спектакле тәкъдим ителә. Мәңгелек мәхәббәт темасы, аталар белән балалар арасындагы каршылык, гармонияле актерлар ансамбле һәм режиссер Рәшит Заһидуллинның осталыгы спектакльне уңышлы һәм халыкчан итеп танытырга өлгерде.

Спектакльләргә рәхим итегез!

Билетларны театрның сайтыннан да алып була.

Запись Шәһәр һәм республика көне уңаеннан, Тинчурин театры иң яхшы спектакльләренә чакыра впервые появилась Tatar Today - татар яңалыклары..