Эшләүче россиялеләрнең пенсиясе 2025 елның 1 августыннан 2024 ел өчен пенсия балларын исәпкә алып артачак һәм өстәмәнең максималь күләме 437,07 сум тәшкил итәчәк. Икътисад фәннәре кандидаты, РФ Хөкүмәте каршындагы Финанс университетының иҗтимагый финанслар кафедрасы доценты Игорь Балынин шулай дип белдерде.
«Шуны искәртергә кирәк, 2025 елның августында эшләүче пенсионерларны пенсиягә тагын бер өстәмә — 2024 елда формалашкан пенсия балларын исәпкә алып иминият пенсиясе күләменә автомат рәвештә төзәтмә кертү – көтә», — дип искәртте икътисадчы. Моннан тыш, белгеч билгеләп үткәнчә, 1 апрельдән социаль пенсияләр 14,75 процентка индексацияләнәчәк. Быел социаль пенсияләрнең уртача күләме 15,5 мең сум тирәсе тәшкил итәр дип көтелә.
1 гыйнвардан хәрби пенсияләр, социаль пенсияләр кебек үк, 9,5 процентка артты. Биредә отставкадагы хәрбиләрнең түләүләрен өстәмә рәвештә арттыру хакында сүз бара, ә 4,5 процентка планлаштырылган индексация 1 октябрьгә билгеләнгән, дип өстәде Балынин.
2025 елның 1 гыйнварыннан эшләмәүче пенсионерлар өчен дә, эшләүчеләре өчен дә иминият пенсияләре 7,3 процентка арттырылды. Әмма 2024 елда фактик инфляция, Росстат мәгълүматлары буенча, 9,52 процентка тигез булды. Шунлыктан Россия Президенты Владимир Путин күрсәтмәсе белән 1 февральдән 40тан артык социаль түләү һәм пособиеләр индексацияләнде. Ил Хөкүмәтенең шул хактагы карарын РФ Премьер-министры Михаил Мишустин имзалады.
Чыганак: https://vatantat.ru/2025/02/161625/ ТАТАР ТУДЕЙ ТЕЛЕГРАМ КАНАЛЫ - https://t.me/tatartoday
