Мөслим районында бер хәрби үзенә махсус операция зонасына хат җибәргән кыз бала белән очрашкан. Бу хакта «Татар-информ» мәгълүмат агентлыгы хәбәрчеләре яза.
Ир-ат туган ягына ике атналык ялга кайткан һәм аңа рухи таяныч биргән хат авторы белән очрашкан. Кыз 4 нче сыйныфта укый икән. Хәрбине хатта язылган түбәндәге сүзләр бигрәк тә канатландырган:
«Калган ир-атлар качу юлын сайлаганда, сез безнең илебезне сакларга карар кылгансыз. Сезнең батырлыгыгыз, каһарманлыгыгыз — безнең өчен үрнәк. Исән-сау әйләнеп кайтуыгызны көтәбез. Җиңү безнеке булачагына ышанабыз!», — дип язылган була хатта.
Хәрби кызга рәхмәт әйтеп, аңа бүләкләрен тапшырган. Шулай ук ул мәктәп укучылары, хезмәт ветераннары белән Җиңү паркында 100 агач та утыртуда катнашкан.