Архивы Камал - Tatar Today - татар яңалыклары.

“Миннән бертуктаусыз тир ага башлады” – Камал артисты Фәнис Җиһанша коронавирус белән авырганын сөйли [видео]

Рамиля Валиахметова — Wed, 05 Aug 2020 14:19:40 +0000

Азатлык күптән түгел генә коронавирус белән авырып чыккан Камал театры артисты Фәнис Җиһанша белән әлеге авыру, табиблардан тест ясату, вирустан саклану чаралары турында сөйләште.

“Минемчә” студиясендә без, гадәттә, тел, тарих, үзаңны саклау кебек проблемнарны яктыртып барсак та, көндәлек тормыш булганнарына өстәп башкаларын да чыгарып тора – мисал өчен, икътисади кризис, акчасызлык, Украина, Путинның мәңгелек президентлыгы, Америкадагы хәлләр һәм башка шундый мавыктыргыч нәрсәләр. Шушы елның мартыннан боларның барысын да өр-яңасы, бөтенләй көтелмәгәне, башка да килмәгәне каплады – аның исеме инде һәркемгә дә таныш, ул да булса коронавирусгалиҗанәпләре.

Болай зурлап әйтү үзен аклыйдыр, ни дисәң дә, төзелеше белән ул таҗны хәтерләтә бит. Алай да башта күпләр әлеге вирусны зур куркынычка санамады, кайберәүләр хәтта “ул – юк, уйдырма” дип килде, “ел да гади грипп белән авырыйбыз, быел да шулай булыр” дип үзен дә, тирәдәгеләрне дә тынычландырырга тырышты. Ләкин бер мәлне әле бер танышы, әле икенчесе сәер авыру белән интегә башлагач, хастаханәләргә эләккәч, кайбер очракларда эш хәтта ки үлемнәр белән тәмамлангач, бигрәк тә берәр белгән кешесе дөнья куйгач, халык бу зәхмәтнең чыннан да зур куркыныч икәнен абайлый башлады.

Бүген “Минемчә” тапшыруында коронавирус зәхмәтен кичергән шундый кунак. Шөкер, ул чирне якынча җиңел кичергән, әмма аның шушы тәҗрибәдән калган тәэсирләре шактый көчле. Алар белән ул Азатлык тамашачылары белән уртаклаша, ә тамашачылар белән ул үзе гомере буе аралаша. Кунагыбыз – Казандагы Камал театрының күренекле артисты Фәнис Җиһанша.

— Сиңа чын мәгънәсендә “Исәнме, саумы?” дибез инде, синең очракка бу бик туры килә. Син хәзер бу коронавирус белән бар дөнья буйлап барган сугышның үзенә күрә бер ветераны. Фәнис Җиһаншаның шушы зәхмәткә каршы шәхси сугышы нәрсәдән башланды?

— Беләсезме, без инде март аенда ук, карантин игълан ителгәннән соң, туры эфирларга чыгып, дөньяның төрле почмакларында яшәгән милләттәшләр белән анда барган вазгыять белән халыкны таныштыра идек, үзебез дә таныша идек. Минем әзерлек чаралары шулай иртә, яздан ук башланды дип әйтә алам. Шуңа моңа бик әзерлекле килдем, симптомнар сизелә башлауга ук үземә чаң суктым, башкаларны да әлеге хәлләргә игътибар итәргә өндәдем.

— Нинди симптомнарга карап син үзеңдә коронавирус дип уйладың?

— Аның симптомнарын инде белә идем: коры ютәл, температура күтәрелә, тән авырая, хәл бетә һәм башкалар. Миндә аларның берсе дә юк иде, бары тик тамак кына авырта башлады. Шуңа аңа бик игътибар бирмәдем, төрле үләннәр белән тамагымны чайкый башладым. Гади салкын тию булса, гадәттә, өченче көнгә авырту бетә, ә монда, дүртенче көнне бик каты баш авырта башлады. Әйтерсең лә, күз алмаларын бәрәңге кебек әрчегәннәр дә, кире урынына тыгып куйганнар диярсең. Ләкин минем һаман шул зәхмәт дип ышанасы килми, гел температура үлчим, ул 36,6 дип күрсәтә. Әллә градусник ватылдымы дип тә уйладым.

“Температурагыз югары булмагач, сулышыгыз әйбәт булгач, соңрак килербез”

Баш авыртуы бер-ике көннән соң бетте, тик аңарчы ашыгыч ярдәмгә заявка калдырып өлгергән идем. Заявкалары бик күп, иртүк шалтыраткач, алар мине “температурагыз югары булмагач, сулышыгыз әйбәт булгач, соңрак килербез” дип кисәттеләр. Табиб чыннан да килде, ләкин ул ашыгыч ярдәмнән түгел, ә мин беркетелгән сырхауханәдән булды. Япь-яшь кыз, арып беткән, кичке якта гына килде. Үзем дә жәлли башладым, кайдан икәнен сораша башладым. “Мин мондагы сырхауханәдән, иртәдән бирле йөрибез, чабабыз”, диде.

Беренче соравы: коронавируслы кеше белән элемтәдә булдыгызмы? Юк, дидем, танышлар авырса да, алар белән элемтәдә булган юк, дидем. Бу очракта алар мазок ала алмыйлар икән, табибә миңа антибиотиклар, антивирус даруларын калдырды, шуларны эчәргә кушты.

— Ягъни, бу кагыйдәдә шулай каралганмы? Кешегә аңарчы авыруны йоктырган кеше белән очрашкан вакытта гына тестны ясыйлармы?

— Аңлавымча, әгәр дә кешенең симптомнары юк, кеше йөткерми, сулый ала, тыны кысылмый, температурасы юк икән, һәм коронавируслы кеше белән элемтәгә кермәгән икән, бу очракта тест ясалмый. Әгәр дә коронавирус расланган кеше белән элемтәгә керсә, аны инфекцион хастаханәгә алып китәләр, анда мазок алалар, үпкәләләрне тикшертәләр. Анда тулы тикшерү үткәреп, хастаханәләргә җибәрәләр.

— Ә син үзеңдә коронавирус барлыгын ничек белдең?

— Табиб дарулар алырга кушкач, мин даруханәгә чыктым. Үземә “кара әле, мин бит чыктым, йөрим, бәлки безнең җиденче сырхауханәгә үзем барыйм” дигән фикер килде. Артистларны сәхнә дә дәвалый бит, сәхнәгә 40 температурасы белән чыгып, 36,6 белән кайткан чаклар да булганы бар.

Сырхауханәгә бару өчен алдан язылырга кирәк. Тик бу юлы, Ходайның рәхмәте, урамга чыкканда ук сайтка кереп, язылыйм дигәндә, яшел тәрәзә чыкты да, шунда ук талонны алдым һәм сырхауханәгә керә алдым. Температурамны үлчәделәр, кулларга антисептикны сиптерделәр һәм табибка керттеләр. Коридорда кеше юк, күрәсең, махсус шулай көйләнгән, һәр кеше үз вакытында килә. Бүлмәләрне җилләтәләр, ишек тоткычларын да антисептик белән эшкәртәләр.

Үпкәләремне тикшертергә кирәк дип кат-кат әйтеп тордым

Өченче катка менгәнче, нык тирләп чыктым, су кебек ага, ни икәнен дә аңламадым. Тыным да кысылды, “кара әле, организм мине врачка керүгә шулай әзерлиме әллә” дип көлеп тә куйдым әле. Табиб үпкәләремне тыңлады, сулышыгыз каты диде, аны үзем сизмәдем. Үпкәләремне тикшертергә кирәк дип кат-кат әйтеп тордым. Кислородны да тикшертте, ул да нормада булмады. Күп кенә дусларымның хастаханәдә булуын әйттем, “мазок” алыгыз дип сорадым. Борыннан, авыздан мазок алдылар да, чыгарып җибәрделәр. Компьютер томографиясен ясатыр өчен җитәкчегә дә кереп чыккан идем. Симптомнар булгач, мине томографиягә җибәрделәр.

Берничә көннән соң миңа шалтыраттылар, COVID-19га уңай нәтиҗә булуын әйттеләр. Моңа әзер булсам да, мондый белдерүгә югалып калдым.

— Вируска юлың озак булган икән. Синнән мөмкин кадәр күбрәк детальләрне сөйләтергә тырышуымны аңлыйсыңдыр – бу дистәләрчә, йөзләрчә кешеләргә ярдәм итә ала, синең башыңнан үткәннәрең белән уртаклашу, калганнарга әлеге чирдән сакланырга, йоктырган очракта да вакытында тиешле чаралар күреп, зыянны минимальләштерүгә булыша ала. Шул да бар – коронавирус җәелә башлаган башлангыч чорда илдәге сәламәтлек саклау системы моңа бөтенләй әзер түгел иде, табиблар үзләре дә нишләргә белмәде. Нәтиҗәдә йоктыручылар һәм авыруны катлаулы рәвештә кичерүчеләр саны кинәт кенә артты. Бу Русиядә генә түгел, дөньяның башка илләрендә дә шулай булды. Италия, Испания, Франция, Америка, Бразилиядәге хәлләрне телевизордан күреп беләбез. Ә Казанда ничек булды бу? Синең тәҗрибә нинди?

Районнарга аеруча авыр, томография өчен Казанга килергә кирәк

— Мин үзем сәламәтлек саклау системыннан канәгать. Беренчедән, табибларга чын күңелдән рәхмәтлемен. Алардан баштан ук игътибар булмаса, дөрес дарулар бирелмәсә, мин ахыры ничек булачагын әйтә дә алмыйм. Бөтен җирдә шулай: кешенең кәефе әйбәт, симптомнары әллә ни юк икән, аны хастаханәгә салмыйлар, өйдә генә калырга кушалар. Хастаханәләргә иң авыр хәллеләрне генә алып киләләр. Авылларда, районнарда аеруча бик авыр, анда томографияләр юк бит, аның өчен Казанга килергә кирәк, бу күпме вакыт ала. Кешедә вирус булса, аны машина белән озаталар, машиналар да җитми.

Мин белгән кайбер башка дәүләтләр, төбәкләр белән чагыштырганда бездә хәл яхшырак. Танышым Рамил хәзрәт Казакъстанда яши, ул миңа вакыт-вакыт сөйләп тора: анда даруханәләрдә хәтта дару да юк, хастаханәләргә ятуларны әйтәсе дә юк, даруларны кешеләрдән алып килергә сорыйлар.

— Андый хәлләр Русиядә дә булды. Мисал өчен коронавирус симптомнары булган чирләрне пневмония дип яздыруларны күп сөйлиләр, Уфада республика хастаханәсе дә ябылып торды, чөнки табиблар күпләп авырды һәм башка очраклар күп булды анысы.

— Мин Русияне әйтә алмыйм, Татарстанда яшим. Казандагы хәлләрдән чыгып кына фикер йөртә алам. Миңа килгән табиб әйтте: борчылма, без гади авырулар, салкын тидерү очракларында да коронавирустан тиешле дәвалауны бирәбез. Күрсәтмәләре шундый.

— Татарстанда коронавирусны рәсми төстә 6 меңгә якын кеше йоктырган дип санала. Син дә шуларның санында булырга тиешсеңдер. Син рәсми статистикага ышанасыңмы?

— Статистиканың дөреслеген берничек тә әйтә алмыйм. Коронавирус белән авырган бер танышым сөйләде, ул сырхауханәгә барып, исемлектә үз исемен күргән. Барып карарга кирәк әле, кызык өчен генә, мин дә бар микән анда.

— Син милләткә шактый билгеле кеше, халык сине ярата һәм дә хөрмәт итә. Шуңа да синең сүзең үтемлерәк, абруйлы була ала. Бу COVID-19 уңаеннан, башыңнан кичергәннәр тәҗрибәсеннән чыгып башкаларга нинди киңәшләр, үгет-нәсихәт бирер идең?

— Әлбәттә, кешенең үз башында булмаса, үгет белән генә керми инде ул. Кеше ышанмаса, вирусны уен, сәясәт дип кенә уйлый икән, аны ышандыру бик авыр. Шул ук вакытта ышанучылар, паникага бирелүчеләр дә күп. Үземнең авыруымны социаль челтәрләргә чыгаргач, бик күп кеше шалтырата башлады. Сезне генә караганнар, безне карамаслар инде, без үләрбез инде, дип әйтүчеләр дә булды.

Безгә ел әйләнәсендә имун системны ныгытырга кирәк

Ләкин бит кешене коронавирус үзе үтерми. Коронавирус ул авыруларны китереп чыгаручы гына. Медицина телендә ул цитокиновый шторм дип атала, ул иммун системына бәйле. Беренче чиратта, безгә ел әйләнәсендә иммун системын ныгытырга кирәк. Дөрес яшәү рәвешен алып барырга , зыянлы ризыклар ашамаска. Бакчаларда җиләк-җимешләр өлгерә, С витамины тулып ята. Физик күнегүләрне ясарга кирәк, мин үзем Стрельникованың тын алу күнегүләрен ясыйм, аларның да үземә файдасы булгандыр дип уйлыйм.

Пляжларда кеше өстендә кеше ята, урын юк. Нинди битлекләр, бармакчалар турында сүз бара ала? Мин үзем дә коронавирус белән авыруымны белмәс тә идем, тест кына күрсәтте. Мин шул ук транспортка битлексез утырган булсам, яныма үпкә авыруы булган кеше утырса, мин бит аңа зыян китерә алам. Ә ул үлеп китсә? Кешеләр менә шуны аңламый, битлексез йөри.

Йөргән чакта битлек тә кияргә, 1,5 метр араны да тотарга кирәк

Шуңа кеше булган җирләрдә, кибетләрдә битлек кияргә кирәк. Хәзер сәүдә үзәкләре ачылды, андагы чиратларны күреп шаккатым. Кеше өстендә кеше, балалары белән киләләр, күбесенең битлекләре дә юк. Кинотеатрлар ачыла башлый, хәзер халык анда агыла башлый. Барган чакта, йөргән чакта битлек тә кияргә, 1,5 метр араны да тотарга кирәк, аны галимнәр юкка гына уйлап тапмадылар. Транспортта да антисептик кулланырга кирәк. Кимендә бу гади чараларны күрсәк, аның таралышын киметер идек, дип уйлыйм.

— Бу чирне кичерүеңнең алай да бер файдасы бар инде – синдә хәзер аңа каршы иммунитет барлыкка килгәндер, гәрчә төрле илләрдән, төрле белгечләрдән шуны да ишетәбез: имеш, COVID-19ны җиңелчә, авыру билгеләресез кичергәннәрдә иммунитет тулысынча булмый да икән, булган очракта да бик кыска бер чорга гына барлыкка килә икән.

— Бу расланган әйбер түгел. Мине дәвалаган табиблар шулай диделәр, март-апрельдә авырган табиблар яңадан авырый башлаган. Иммунитетның барлыкка килү, килмәве дә расланмаган. Иммунитетның күпмегә дәвам итәчәген дә берсе дә белми. Безнең бер генә фараз булырга тиеш: үзеңне сакларга һәм башкаларга зыян салмаска. Ә инде иммунитетны Аллаһ тәгалә генә белә.

Чир инде таралган, барыбыз да чирләячәкбез

Чир инде таралган, барыбыз да чирләячәкбез, моңа иманым камил. Иң мөһиме, бөтен кеше берьюлы авырмаска тиеш. Барысы да бергә авырый башласа, аларны кая яткырып бетерәсең, шулкадәр табибны кайдан табасың?! Реанимацияләрдә, җиһазларда урыннар җитми. Кешеләр моңа салкын карый, җитди кабул итми. Беренче симптомнар барлыкка килү белән сез табибларга мөрәҗәгать итәргә тиеш! Табибларның эшләре бик күп, алар сезнең якыннарыгызга килмәскә дә мөмкин, шуңа күрә, зинһар өчен, үзегезне һәм якыннарыгызны саклагыз!

* * *

Шушы зәхмәт, әлбәттә, кызык кына фәлсәфи мәсьәләләр дә күтәрә, кешенең табигатькә, әйләнә-тирә мохиткә булган мөнәсәбәтенә, глобализация һәм биологик баланс проблемнарына игътибар юнәлтә, әмма бу инде бөтенләй башка, аерым бер сөйләшү темасы.

Чыганак: Азатлык Радиосы сайты

Запись “Миннән бертуктаусыз тир ага башлады” – Камал артисты Фәнис Җиһанша коронавирус белән авырганын сөйли [видео] впервые появилась Tatar Today - татар яңалыклары..

Камал театры артисты Илдар Хәйруллин: “Яшь чакта күп эчелде…” [видео]

kadria — Tue, 04 Aug 2020 18:46:16 +0000

// Татар Тудей // Татар Бүген //

Камал театры артисты Илдар Хәйруллин журналист кыз Нәзилә Хуҗинага яшь чакта ник күп эчкәне турында сөйләде.

“Уйлап утырдым да, ник яшь чакта эчелде икән, атистлар гына эчмәде бит, бөтен җәмгыять эчте. Завод бар иде, анда бөтен эшчеләр эчә иде.

Чөнки максат юк иде! Кешеләрне бер калыпка җыялар, куштаннанырга, бер-берсен сатырга өйрәтләр иде… Менә шуны күреп, шуны аңлаган кешеләрнең җаны әрнеп, эчүгә салышалар иде…”- ди Илдар Хәйруллин

Видео Нәзилә Хуҗина инстаграм битеннән

Запись Камал театры артисты Илдар Хәйруллин: “Яшь чакта күп эчелде…” [видео] впервые появилась Tatar Today - татар яңалыклары..

Бүген Камал театры соңгы спектаклен куя [видео]

Лэйсирэ — Fri, 06 Jul 2018 06:19:27 +0000

6 июль Камал театрының 112нче сезон спектакльләре тәмамлана. Бу уңайдан театр коллективы тамашачыларына рәхмәтен җиткереп, узган сезон мизгелләреннән торган видео тәкъдим итә.

“Хөрмәтле тамашачылар! Г.Камал театр коллективы сезгә олы рәхмәтен җиткерә. Тормышыгызга Камал театрын өстәвегез өчен бик зур рәхмәт! Яңа 113нче сезонга кадәр, дуслар!”, диелә театр мөрәҗәгатендә.

Бүген Казанда сезонның соңгы спектакле – Зәңгәр шәл” куела.

Запись Бүген Камал театры соңгы спектаклен куя [видео] впервые появилась Tatar Today - татар яңалыклары..

“Зәңгәр шәл”не караган галимә “сәхнәбез зәңгәрләнмәсен иде” дип белдерә [видео]

Лэйсирэ — Mon, 21 May 2018 04:38:04 +0000

Казанда 18 май кичендә “Камал мәктәбе” проектында сезонның соңгы дәресе “Зәңгәр шәл” спектакленә багышланды. Чарада әлеге спектакльнең узган гасырдагы видеоязмасын карап, фикер алышу булды. Камал театрының өлкән, урта буын артистлары әлеге әсәрдә генетик код барлыгын, халыкның азатлыкка, хөррияткә омтылышын күрсәтүен сөйләде.

“Камал мәктәбе” театр тамашачысы мәктәбе проекты бу ел башында 1987 елда куелган “Ахырзаман” спектакле белән башланып, бу атнада “Зәңгәр шәл” спектакленең (1987, 2000 еллар) видеоязмасын күрсәтү белән тәмамланды.

Фикер алышуга Булат, Мәйсәрә, Ишан рольләрен төрле елларда башкарган Камал театры артистлары килде. Белгечләр буларак язучы Рабит Батулла, композитор Фоат Әбүбәкеров, филолог Рауза Солтанова һәм галимә Миләүшә Хәбетдинова чыгыш ясады.

“Камал мәктәбе” проекты авторы, журналист, музыкант Рәдиф Кашапов артистларга сораулар да әзерләгән иде. Булат персонажы турында сүз кузгаткач, “Зәңгәр шәл”дә бу рольне башкаручы Рамил Төхвәтуллин сүз алды.

– Кәрим агай Тинчурин тарафыннан язылган бу әсәрне, драматургия ягыннан карасак, гап-гади бер әсәр дияргә була. Ләкин Кәрим Тинчуринның мәхәббәт турында язылган әсәрләре арасыннан “Зәңгәр шәл” аерым урын алып тора. Милләтебезнең якты мәхәббәткә омтылуы, ышануы генетик код булып канына сеңгән. Булатны, кеше үтерсә дә, халык аклый. Аны үз мәхәббәте өчен көрәшче итеп кабул итәләр, ди Төхвәтуллин.

Рамил әфәнде режиссер Марсель Сәлимҗанов бу рольне аңа тапшыргач, куркып калуын да искә төшерде. Ул Булатны иң дөрес уйнаучы итеп Наил Әюповны атады.

Шулай ук Булат ролен башкарган Әсхәт Хисмәтов өчен дә Булат якын икән. Ул аны социаль герой дип атады.

– Булат – кеше үтергән кеше түгел. Шулай килеп чыккан, димәк, дөньяда төрлесе була. Шундый мәхәббәт булган, ишан кызны мәҗбүриләп алып китә, яшь парлар кавыша алмый калалар, монда җәлләмичә мөмкин түгелдер, диде ул.

Мәйсәрә ролендә Рамил Төхвәтуллин белән бергә уйнаган Илсөя Төхвәтуллина һәм хәзерге заман Мәйсәрәсе Гүзәл Гүлвердиева ничек бу рольне уйный башлауларын сөйләделәр. Чараны алып баручы Рәдиф Кашаповның авыл күренеше бүген кирәкме-юкмы дигән соравына җаваплары төрле булды.

Гүзәл Мәйсәрәне студент чагында ук уйнау бәхетенә ирешкән. “Рольгә ничек кереп китүемне аңламый да калдым. Яңача эшләргә тырыштык. Хәзерге “Зәңгәр шәл”ебез стилизацияләнгән”, диде ул. Шулай ук иске авыл тормышын чагылдыру да бу спектакльдә хәзер кирәк түгел дигән фикердә яшь актриса.

Илсөя Төхвәтуллина фикеренчә, “Зәңгәр шәл”дә авыл тематикасы сакланырга тиеш. “Балаларны тәрбияләгәндә, алар һичьюгы спектакльгә килеп, киемнәргә, авыл мохитенә, аларның сөйләменә игътибар итеп китәргә тиеш”, дип искәртте Илсөя ханым.

Ишан булып уйнаган Әзһәр Шакиров “Зәңгәр шәл”нең мәхәббәт, диннән көлү сюжетыннан гына тормавына игътибарын юнәлтте. Ул качкыннар белән өзектә халыкның азатлыкка, хөррияткә омтылуын белдерде.

– Спектакльләрдә ишаннардан көлү генә түгел, халык күңелендә яткан иң зур фикер – кайчан ирекле булабыз соравы ярылып ята. Кайчан милләтебез ирекле була? Ишаннан, мулладан көлү ул бар, әлбәттә. Әмма тамашачы үзенә кирәген эзли. Халыкның азатлыкка омтылуы теләсә-теләмәсә дә эчендә ята, диде Әзһәр Шакиров. Үз роленә килгәндә, ул аны кабатланмас итәргә тырышкан. Аңа кадәр ишанны усал, әшәке итеп уйнаучы булмагач, Әзһәр Шакировка шундый дин әһелен эшләргә туры килә.
Чарада катнашкан белгечләрнең дә спектакльгә карашлары үзгә иде. Драматург, язучы Рабит Батулла “Зәңгәр шәл” диннән көлми, диндәге ишан кебек наданнардан көлә дип саный.

– Аны аңларга кирәк. Тукаебыз да, Тинчуриныбыз да диннән көлмәгән, “псевдодинчеләр”дән көлгән. Сез, тамашачылар, Уразиковны да күрмәгәнсез, башкасын да, сезгә бу “Зәңгәр шәл” канун булып тора, ди Батулла.

Сәнгать белгече Рауза Солтанова спектакльнең миллилегенә, халыкчанлыгына тукталды. Белгеч спектакльнең төрле еллардагы куелышындагы үзенчәлекләре, образлылыгы, төсләрнең әһәмияте хакында сөйләде.

Театр тәнкыйтьчесе, галимә Миләүшә Хәбетдинова “Зәңгәр шәл”не галәм дип атады.

“Бу галәм татар йөрәгенә генә ачылмый. Безнең “Зәңгәр шәл”ебез талисман кебек. “Зәңгәр шәл”гә карап яшьләр кем икәнен танысын иде, шуның белән бәхетле булыр идек. Сәхнәбез “зәңгәрләнмәсен” иде”, диде ул үзенең чыгышында.

Проект авторы Рәдиф Кашапов фикеренчә, татарда бөтен нәрсә бетсә дә, театр бер утрау булып калачак.

“Татарлар өчен, татар мәдәнияте өчен театр мәңгелек булмаса да, озын гомерле булыр, алла боерса. Шуңа да аның тарихын җентекләп өйрәнергә кирәк. Башка халыклардан аермалы буларак, без үзебезнең кем икәнебезне беләбез. Нигезебез бар. Ул мәдәниятебездә чагыла. Нишләп әле ул нигезебез турында матур сәнгать телендә сөйләшмәскә?” диде Рәдиф Кашапов Камал театры белән берлектә оештырылган “Камал мәктәбе” проектының максатын аңлатып. Алга таба да моңа охшаш чаралар булачак дип белдерде ул.

Азатлык

Запись “Зәңгәр шәл”не караган галимә “сәхнәбез зәңгәрләнмәсен иде” дип белдерә [видео] впервые появилась Tatar Today - татар яңалыклары..

Камал театрына билет отасың киләме? [бәйге шартлары]

Чулпан — Wed, 25 Apr 2018 17:43:14 +0000

Камал театрына билет отасың киләме?

Камал театрының “ИСӘНМЕ,УЛЫМ” спектакленә 2 чакыру билеты (бер билет 2 кешелек) уйнатабыз. Спектакль 8 майда, 19:00 да булачак!

Бәйгенең шарты бик гади!

1) Әлеге төркемнәргә язылырга:

-https://vk.com/tatarshlari

– https://vk.com/tatkoncert

– https://vk.com/tamle

-https://vk.com/kamalteatr

2) Сайтта комментарий итеп тәртип санын куярга!

3) 5 майны көтәргә! Шул көнне җиңүчеләрне беләчәкбез.

Уңышлар сезгә!

Запись Камал театрына билет отасың киләме? [бәйге шартлары] впервые появилась Tatar Today - татар яңалыклары..

Театрга билет отарга ашык! [бәйге шартлары]

Чулпан — Tue, 13 Mar 2018 05:00:31 +0000

Дуслар, Tatar Today сайты Камал театры белән берлектә бәйге игълан итә.

Камал театрының “АК КАЛФАГЫМ ТӨШЕРДЕМ КУЛДАН…” спектакленә 2 чакыру билеты (бер билет 2 кешелек) уйнатабыз.

Бәйгенең шарты бик гади!

1) https://vk.com/kamalteatr
https://vk.com/tamle
https://vk.com/tatarshlari
https://vk.com/tatarchaconcert
https://vk.com/tatartoday
https://vk.com/tatkoncert группаларында теркәлергә;

2) ВКонтактедагы төркемебездә шушы пост астында үз саныңны калдырырга!

Җинүчеләр очраклы саннар генераторы ярдәмендә 21 март көнне билгеләнәчәк. Уңышлар!

СПЕКТАКЛЬ 25 март көнне Камал театрында була.Башлана 18:00.

Запись Театрга билет отарга ашык! [бәйге шартлары] впервые появилась Tatar Today - татар яңалыклары..

Эмиль Талипов: «Сникерс», «Марс» кебек шоколадларны телевизордан гына күрдек»

Чулпан — Sun, 24 Dec 2017 14:00:56 +0000

Яңа ел җитүне барыбыз да зарыгып көтә. Актерлар да искәрмә түгел, әлбәттә. Без Г. Камал театры артистларының да Яңа ел хатирәләрен яңарттык. //Ялкын//

Галиәсгар Камал исемендәге Татар дәүләт академия театры артисты, Муса Җәлил исемендәге республика бүләге лауреаты Эмиль Талипов:

– Балачакта Яңа ел “утреннигы”на кем булып киенә идегез? Ул костюмны сезгә кем текте?

– Мәктәптә башлангыч сыйныфларда Яңа ел бәйрәмен үзем алып бардым. Кар бабай (Снеговик) ролен бирделәр миңа. Роль тапшыргач, аңа әзерләнергә, кешеләр алдында чыгыш ясарга кирәк. Мин «Костюм юк», дип елап утыргач, апамның төне буе костюм әзерләгәне хәтеремдә калган. Ялгышмасам, ул аны марля һәм өйдә булган башка төрле материалдан текте. Кар бабай борынын кәгазьдән ясадылар. Мәктәптә олырак сыйныфларда Кыш Бабай булырга да туры килде. Ләкин шулай да иң җылы тәэсирләр калдырганы – Кар Бабай костюмы. Ул минем бала вакыт иде. Әлеге костюмны бер генә тапкыр кияргә туры килде. Шактый күләмле роль булуга карамастан, ул минем бик яхшы килеп чыкты.

– Иң истә калган Яңа ел бүләге нинди иде? Аны Сезгә кем бүләк иткән иде?

– Безнең заманнарда нинди Яңа ел бүләге булсын инде! Мин 1990нчы елларда укыдым, ул вакытта хәзерге кебек бүләкләр бирешү юк иде. Бүгенге кебек иркенлек булмады. Безнең бәйрәмнәр бик күңелле уза иде. Рәхәт чак! Мәктәпкә чыршы алып килгәндә, аның исе бөтен мәктәпкә тарала. Иң зур һәм иң тәмле бүләк – пакет эченә тутырылган конфетлар. Алар – үзе бер могҗиза, үзе бер тылсым! Ул пакет эчендә тагын 1 мандарин һәм 2 әстерхан чикләвеге дә була иде. Аларны диванга яки идәнгә чәчеп, шуларны барлап, актарып утыру үзе бер рәхәт. Ул вакытта «Сникерс», «Марс» кебек шоколадлар әле чыга гына башлаган иде. Элек без аларны телевизордан гына күрдек. Алып та булмый иде, эләкми дә иде. Яңа ел пакетына тутырылган шушы шоколадларны идәнгә чәчеп, яртылыш-яртылаш тешләп кенә шаккатып ашап утыра идек. Мин моны әллә кайчангы заман кебек сөйлим. Ләкин 90нчы елларда шундый авыр вакытлар булып алды. Без гаиләдә әле өчәү идек бит: миннән кала, тагын ике апам бар. Безгә 3 пакет бирәләр. Ул бүләкләрнең матурлыгын белсәгез сез, аларның савытларына кадәр шундый искиткеч! Аларга чыршылар, Кыш Бабайлар төшерелә иде.

– Яңа елдагы могҗизага ышанасызмы? Сезнең белән шушы бәйрәм алдыннан берәр могҗиза булганы бармы?

– Могҗиза булмаса да, ышанасы килә. Яңа ел – иң матур бәйрәмнәрнең берсе. Чыннан да, ниндидер тылсымлы, могҗизалы бәйрәм.

Г. Камал театры артисты Ләйсән Фәйзуллина:

– Балачакта Яңа ел утреннигына кем булып киенә идегез? Бу костюмны сезгә кем тегә иде?

– 1нче сыйныфта кигән Керпе костюмын бик яхшы хәтерлим. Әнием аны минем өчен каяндыр табып алып кайтты. Бәлки театрдандыр (Ләйсәннең әнисе – Татарстанның халык артисты, Әлмәт татар дәүләт драма театры артисткасы Раушания Фәйзуллина). Башка битлек кебек керпе йөзе киелә иде. Итәге һәм жилеты да бар иде әле ул костюмның. Жилетның артында чуклар ясалган. Әле минем шундый фотографиям дә бар. Мин анда шул костюмнан бик куркып төшкәнмен. Шуңа үземне куркак Керпе, дип исемдә калдырдым. Шушы Керпе костюмын мин бер генә тапкыр кидем. Ә аннары гел Кар бөртеге булып киенә идем.

– Иң истә калган Яңа ел бүләге нинди иде?

– Бөтен бүләкләр дә хәтердә калмаган, әлбәттә. Ләкин әни бервакыт тәмле тартма бүләк итте. Аның һәр тәрәзәсе ачыла. Бәләкәй-бәләкәй тәрәзәләрнең һәрберсендә – шоколад. Яңа ел җиткәнне көтмәдем, әни күрмәгәндә, шоколадны берәм-берәм урлый идем. Әлеге тартма, китап кебек, яссы һәм аның бик күп тәрәзәләре бар иде. Шул тәрәзәләрне ачасың, анда – шоколад. Мин Яңа ел җиткәнне көтеп өлгерә алмадым, бер-ике атна алдан башладым, Яңа елга кадәр шоколадларны бетердем. Моның өчен әнидән дә эләкмәде, ул көлде генә.

– Яңа елдагы могҗизага ышанасызмы?

– Гел ниндидер могҗиза көтәм, ләкин ул булмый. Минемчә, могҗизаны көтәргә кирәкми, аны үзеңә ясарга кирәк.

Алинә МИННЕВӘЛИЕВА

Запись Эмиль Талипов: «Сникерс», «Марс» кебек шоколадларны телевизордан гына күрдек» впервые появилась Tatar Today - татар яңалыклары..

Ришат Әхмәдуллин: «Беренче йортым – театр, өйдә мин – кунак»

Чулпан — Wed, 18 Oct 2017 06:00:10 +0000

Актер һөнәре күпкырлы һәм гаять авыр эшчәнлек. Театр өлкәсендә яшәгән кеше үзенең эшчәнлеге белән сокландыра торган, үз эшенә гашыйк булган һәм, әлбәттә, күп кенә талантлары белән үзенә тартып тора торган булырга тиеш. Г.Камал исемендәге Татар Дәүләүт Академия театрының яшь, талантлы актеры Ришат Әхмәдуллин да нәкъ шул яклары белән тамашачының мәхәббәтен яулап алган. Әлеге актер тамашачыга театр сәхнәсе аша гына түгел, ә телевизион экраннарга чыккан күп кенә кинофильмнар аша да таныштыр. //Идел//

Мәсәлән, Г.Кутуйның “Тапшырылмаган хатлар” әсәренә нигезләнеп төшерелгән нәфис фильмда Искәндәр роле белән.

— Сез Г.Камал театрында эшләү дәверендә күп кенә рольләр уйнадыгыз һәм әле дә аларны башкарып барасыз. Шул рольләр арасында күңелегезгә иң якын торганы кайсысы?

— Мин Г.Камал театрында 2011нче елдан бирле эшлим инде. Шул алты ел эшләү дәверендә минем бер унлап ролем бар. Һәм алар минем өчен минем ун бармагым кебек бөтенесе дә бер тигез. Алар миңа барысы да бик якын. Шуңа күрә мин аларның берсен дә аерып әйтә алмыйм. Уңай образларны да, тискәре образларны да мин бик яратып уйныйм. Чөнки сәхнәдә ниндидер геройның образын тамашачыга җиткергәндә аны төрле буяулар, төрле мөмкинчелекләр белән уйнарга кирәк. Ә ул исә актер буларак мине үстерә генә, яңа яктан ача. Шуңа күрә алар миңа барысы да кадерле.

— Сезнең холкыгызга иң якын торган, сезгә охшаган кайсы образны әйтә аласыз?

— Һәрбер образда да мин үзем чагылганмын. Аларның һәрберсендә минем кайсыдыр якларым тупланган. Мәсәлән, Зөлфәт Хәкимнең «Искән җилләр» спектаклендәге Рамай ролен алсак, минем ул образда ниндидер максатчанлыгым, якты киләчәккә омтылып яшәүем чагыла. Кәрим Тинчуринның «Зәңгәр шәл» спектакленең баш героен Булатны алсак, мин үземне аның кебек кыю җанлы, тәвәккәл, мәхәббәт өчен көрәшүче, батыр егет дип саныйм. Илгиз Зәйниевның «Әрем исе»ннән Сәярне алсак ул хыяллана торган герой. Гомумән алганда иҗат кешесе бит ул хыялланып яши. Мин дә хыялларга бирелеп яши торган кеше буларак Сәяр образында ачылам. Ә тискәре образларны алсак, шул ук Илгиз Зәйниевның «Көтәм сине» мелодрамасында мин Камил кебек үк тормышта әшәке түгел, ләкин, шулай да, үземә кирәк әйберемә ирешкәндә тайпылмыйча, үземнең сүземне нык әйтә ала торган кеше.

— Сезнең өчен театр ул нәрсә?

— Театр минем өчен — ул икенче йорт. Дөресерәк әйткәндә, беренче йортым, чөнки мин көннәр буе театрда булам. Ә өйдә мин кунак кына.

— Театрдан тыш сез үзегезне кино өлкәсендә дә күрсәтергә өлегердегез. Театр сәнгате белән кино сәнгате белән аерма бармы? Кайсысы җиңелерәк бирелә?

— Театр һәм кино арасында бик күп төрле аерма бар. Театрда артист кеше эмоция белән уйнап, тамашачыны тәэсир итәргә тиеш. Ә инде кино өлкәсендә башка мөмкинчелекләр, башка нюанслар белән эшләргә туры килә. Шулай ук син анда тормышта кебек үк гади булып калырга тиешсең. Кино — ул үзе бер осталык. Театр белән аның бик күп аермасы бар. Минем өчен икесендә дә эшләү бик кызыклы, чөнки алар икесе ике төрле дөнья. Ләкин мин аларның кайсысындыр өстенрәк куя алмыйм.

— Сез театр сәхнәсенә чыгып үзегезнең ролегезне башкарып, спектакль беткәч тә тамашачының реакциясен шул ук вакытта күрә аласыз. Ә менә кинода ул бәяләмә, киресенчә, берникадәр вакыт дәвере үткәч кенә килеп җитә. Әлеге аерма нык сизеләме?

— Спектакльдә син тамашачының фикерен аларның күзләре, кул чабышлары аша күрәсең. Хезмәтеңңне шулай югары итеп бәяләгәннәрен күргәч сиңа ниндидер җылы энергетка кире кайтып, сине тулылынадыра гына. Һәм тагында ниндидер югары үрләр яуларга көч бирә. Кинода инде син эшеңне экранга чыгып күпмедер вакыт үткәч кенә, тамашачы сиңа үзенең ниндидер фикерен җиткерәчәк. Сине я сүгәләр, я мактыйлар дигәндәй. Ләкин аның бер аермасы бар: кино ул мәңгелеккә кала торган әйбер һәм синең эшеңне мәңгеләштерәләр.

— Ә сезгә адресланган тәнкыйтькә ничек карыйсыз?

— Мин тәнкыйтькә бик уңай карыйм. Дөньяда күпме кеше бар шулкадәр үк кешенең үз фикере. Һәм бу бик яхшы күренеш. Ләкин тәнкыйть җиткергән кешенең фикере дә төпле булырга тиеш. Кеше сиңа яхшы мөнәсәбәт белән әйтә ала, яисә киресенчә көнчелек белән. Моны бик төгәл генә аера белергә кирәк. Әгәрдә инде яхшы мөнәсәбәт белән сине тәнкыйтьләсәләр син ул фикерне тыңлап, үз хаталарыңны танып аларны яхшы якка үзгәртергә тырышасың. Безнең дөньяда шулай ук көнчелек дигән әйбер дә бар. Ул сәнгатьтә генә түгел һәрбер өләкәдә дә чагыла. Шуңа эчке дөньяң белән дә сизгер булырга кирәк.

— Ә сез киләчәктә нинди рольләр уйнарга хыялланасыз?

— Минем алай хыялланган ролем юк. Әлеге рольләрем минем көн саен яңа якларымны ачып бара. Шуңа күрә Ходай биргән һәрбер ролемне мин рәхмәт әйтеп башкарам.

— Шигъриятне яратуыгызны сез матур итеп укыган шигырьләрдән күрә алабыз. Рус һәм татар әдәбиятыннан яраткан шагыйрьләрегез дип кемне атар идегез?

— Мин шигъриятне, чынлап та, бик яратам. Һәм шагыйрьләр арасыннан яратмаганым юк. Алар безнең бөек классикларыбыз. Мин, бәлки, бик баналь булырмын, ләкин шуңа карамастан Хәсән Туфан, Һади Такташ, Муса Җәлил, Г.Тукай иҗатларына гашыйкмын. Рус классикларыннан мин Рождественскийның, Маяковскийның шигырьләрен бик яратып укыйм. Аларның барысын да санап бетереп булмас, бик күп алар.

— Бер әңгәмәдә Сез үзегезне Г.Камал театрында бердән-бер профессиональ җырчы булуыгыз турында әйткән идегез. Бу җырлау сәләте, моң сезгә кемнәндер бирелгәнме?

— Безнең гаиләдә профессиональ яктан җырлаучы кеше юк. Әти-әнием, апаем матур җырлыйлар. Ләкин шулай да бу Ходайдан бирелгән сәләт дип саныйм. Ходай тарафыннан бирелгән сәләт булса да, ул бик күп тырышлыкны сорый. Әлеге кечкенә генә булса да дәрәҗәм хезмәт белән тудырылган. Һәм, чынлап та, әлеге сәләткә ия булу — ул үзе бер зур бәхет.

— Киләчәктә җыр өлкәсенә кагылышлы планнарыгыз бармы?

— Мин әлеге белгечлегемне Галиәскәр Камал театрында профессиональ җырлаучы артист булсын дигән нәтиҗәгә ирешер өчен алдым. Минем өчен профессиональ җырлый белә торган артист булу дәрәҗәсе, җырчы гына булуга караганда күпкә кулайрак.

— Музыка сәнгатендә сез охшарга торышкан, шул югарылыкка ирешергә теләгән шәхес бармы?

— Минем гомумән кумирларым юк. Ләкин мин төрледән төрле музыка тыңларга яратам. Роктан башлап Софья Гобайдуллинага кадәр. Чөнки алар бөтенесе дә кызыклы. Мин аларның фәлсәфәсен аңаларга тырышам. Аңлап җиткермәсәм яңадан тыңлыйм, белгечләрдән киңәш сорашам, өйрәнәм. Миңа гомумән музыка дөньясы кызык.

-Сез бик күп әйбер белән кызыксынам дидегез. Ә сез актер булмасагыз нинди профессия сайлар идегез?

— Минем стоматолог яки психолог булырга хыялым бар иде (елмая).

— Ә ник алайса актерлык юлын сайладыгыз?

— Димәк башка әйбер эшлим белмим. Шул гына. (Көлә)

— Сез холкыгыз буенча акыл белән уйлап эш итүчеме, әллә, киресенчә, йөрәк кушуын тыңларга тырышасызмы?

— Төрле вакытта төрлечә. Кайвакыт акыл белән эш итәм, кайвакыт йөрәк белән. Минем, Әлхәмдүлилләһ, интуициям бик көчле. Күңел әйткәнен тыңлыйм һәм шул дөрес булып чыга.

— Ә сез бер күрүдә гашыйк булуга ышанасызмы?

— Ышанам. Мин ике тапкыр гашыйк булган кеше. Ләкин икесе дә җавапсыз мәхәббәт булды. Иҗат кешесе буларак мине гаҗәпләндергән төрле әйбергә гашыйк була алам. Мәсәлән, табигатькә, яисә ниндидер бинаның архитектурасына.

— Сез иҗат кешесе буларак еш гашыйк булам дип әйтәсез. Бу сезгә комачаулыймы?

— Белмим, әлеге вакытта миңа комачаулаганы булмады. Ярдәм генә итә.

— Күп кенә кызларны кызыксындырган сорауны да бирмичә кала алмыйм. Сезгә нинди кызлар ошый?

— Миңа үзендә хатын-кызның барлык сыйфатларын туплаган кызлар ошый. Кызларны төрле хәлдә дә чын ир-ат булып кала торган егетләр кызыктыра бит. Ә мине бөтен очракларда да хатын-кызга хас булган сыйфатларын саклап кала торганнары.

— Сез бер әңгәмәдә авырлыкларга елмаеп кына карыйм дип әйткән идегез. Бу сүзләрне сезнең тормыш девизыгыз дип атап буламы?

— Анысы шулай. Мин һәрвакыт нинди генә авырлыклар булмасын аларга уңай карарга, аларны кабул итәргә тырышам. Димәк шулай кирәк булган дип саныйм. Алар Ходай тарафыннан бирелгән бер сынау итеп кабул итәм дә, алардан арынырга җиңелерәк була. Күңелендә кояш яшәсә, барлык сынауларга да елмаеп карасаң ул үзеңне позитив итеп тыяр өчен бик яхшы ысул дип саныйм.

— Бәхет сезнең өчен нәрсә ул? Сез бәхетлеме?

— Мин үземне бик бәхетле итеп саныйм, Аллага шөкер. Мин сау-сәләмәт, минем аякларым төз, кулларым төз, минем әти-әнием дә, якыннарым да исән-сау, яраткан эшем, яраткан тамашачым бар. Тагын нәрсә кирәк? Бәхет бит ул нәрсәләрдер белән үлчәнми. Кайвакыт ниндидер вак әйберләр дә сине бәхетле итәргә мөмкин. Үзеңне бәхетле итеп тоеп яши белсәң шуннан да күп әйбер кирәкми.

— Әңгәмә өчен зур рәхмәт. Киләчәктә дә Сезгә иҗатыгызда зурдан зур уңышлар телим.

— Рәхмәт!

Алсу Һадиева

Запись Ришат Әхмәдуллин: «Беренче йортым – театр, өйдә мин – кунак» впервые появилась Tatar Today - татар яңалыклары..

Эмиль Талипов: «Андый елмаю беркемдә дә юк!»

Чулпан — Thu, 12 Oct 2017 06:00:29 +0000

Г. Камал театры артисты, Муса Җәлил исемендәге республика премиясе лауреаты Эмиль Талипов турында кызыклы 11 факт: //Туйлар.ру//

1. 1984 елның 27 гыйнварында Казанда туа. 2008 елда Казан мәдәният һәм сәнгать университетын тәмамлый. Шул ук елны Г. Камал исемендәге Татар дәүләт академия театрында уйный башлый.

2. Мәктәптә укыганда КВНнарда катнаша, мәктәп театрында уйный, район фестивальләрендә җиңеп чыга. Берара вокал буенча китәргә дә уйлый. Соңыннан язмышның башкача борылыш алуына сөенә дә – чөнки җырлаучылар болай да күп.

3. Рольләрнең барысын да ярата. Юкса алар үземне яратмаячак ди.

4. Иң матур татар ир-атлары исемлегендә дүртенче урында тору хәбәрен очраклылык дип аңлата. Гомумән, ир-ат матур була алмый, дигән фикердә. Ир кеше матур сөйләргә, матур эшләр башкарырга яки маймылдан чак кына кайтыш булырга мөмкин. Хатын-кыз гына матур була ала, ди Эмиль.

5. «Мулла» спектаклендәге роленә кереп китәр өчен Коръәнне күп укыган, сүрәләр, аятьләр ятлаган. Өйләре янындагы мәчеткә йөреп, яшь мулланың үз-үзен тотышын өйрәнгән. Алар бернинди изгеләр түгел, бары тик яхшы мәгънәдә әйбәт кешеләр, ди Эмиль. Мәдрәсәдә дә шәкертләр үзләрен гадәти мәктәп укучылары кебек тота икән: кемдер лекциядә йоклап утыра, кемдер СМС яза.

6. «Үлеп яраттым» спектаклендә Эмиль Талипов, сорау алганда, Дания Нуруллинага кычкырырга тиеш була. Ә ул баштагы мәлләрдә берничек тә кычкыра алмый, сугып җибәрү турында сүз дә булу мөмкин түгел. «Ул бит Дания Нуруллина! Ничек аңа кычкырыйм!» – ди яшь артист һәм репетиция саен аңардан гафу үтенә. Ә Дания апасы, киресенчә: «Катырак тот, кычкыр, бар көчеңә җилтерәт, паригыма гына тия күрмә!» – дип өйрәтә икән.

8. Өйләнмәгән егет буларак, Эмильгә кызлар күп шалтырата. Подъездында, машинасында «хат»лар калдыралар. Идәндә роза чәчәге таҗлары белән дә язалар. Көннәрдән бер көнне машинасының дворнигына кыстырып, бер кыз мондый хат калдыра: «Элек телевизордан татар спектакльләрен күрсәтә башласалар, карый алмыйм, «Дом-2»га күчерик, дия идем әнигә. Театрга килгәч, башта – сез тудырган образларга, аннары театрга ук гашыйк булдым». Кызлар өчен театр дөньясын да ача Эмиль шулай!

9. Эмиль әти-әнисе белән бергә яшәгәндә, ашарга әзерләү, кер үтүкләү мәшәкатьләреннән азат була. Хәзер аның үз фатиры. Егет мөстәкыйль тормышка өйрәнә. Тузан да сөртергә кирәк, идән дә юарга…

10. Эмиль Рөстәм Миңнехановка пародияләр уйнавын болай аңлата: «Һәр кешедә нәрсәдер булмый калмый. Ул һәрчак төгәл сөйләшә, менә шундый президент. Аның елмаюын тотып ала алмыйм менә. Андый елмаю беркемдә дә юк».

11. Хатын-кызларга пародияләр уйнарга җөрьәт итми. Ир кеше хатын-кыз булып кыланса, зәвыксыз килеп чыга дип исәпли. Ә Салават менә пародияләрне рәхәтләнеп кабул итә икән. «Эмиль дускай, мин булып кайда телисең шунда сөйләп йөр», – ди икән. Эмильнең Минтимер Шәймиевкә пародиясен тамашачылар гына түгел, Беренче Президентыбыз үзе дә яратып кабул итә икән.

Запись Эмиль Талипов: «Андый елмаю беркемдә дә юк!» впервые появилась Tatar Today - татар яңалыклары..

Хәния Фәрхине соңгы юлга озатырга килгән кешеләр 30 минут чират торды [фоторепортаж]

Чулпан — Sat, 29 Jul 2017 09:53:34 +0000

Танылган җырчыны яратып, чәчәкләр күтәреп, хушлашырга килгән барча кешене Г.Камал театры бинасы сыйдыра алмады. //Интертат//

Бүген, 29 июльдә Казанда татар эстрадасы йолдызы Хәния Фәрхине соңгы юлга озаттылар. Татарстанның һәм Башкортстанның халык артисты белән хушлашу чарасы башкаланың Г.Камал исемендәге Татар дәүләт академия театры бинасында узды. Халык бик күп килү сәбәпле, бөтен теләгән кеше дә бина эченә кереп җитә алмады. Хәния Фәрхинең кызы Алия хушлашырга килгән барча кешегә рәхмәтен әйтте.

Җырчы Казанның Яңа Татар бистәсе зиратында җирләнде.

Мәгълүм булганча, быел май аенда 57 яшен тутырган җырчы туган ягы – Башкортстанның Тәтешле районына әнисе янына кунакка кайткач, 27 июль көнне йөрәк өянәгеннән вафат була. 28 июльдә Тәтешле районында да хушлашу чарасы оештырылды.

Запись Хәния Фәрхине соңгы юлга озатырга килгән кешеләр 30 минут чират торды [фоторепортаж] впервые появилась Tatar Today - татар яңалыклары..