Атлантикадан килгән циклон, элеккечә үк, Татарстанда һава торышын билгеләячәк. Бу көннәрдә Татарстанда җилле, дымлы һәм чагыштырмача җылы һава торышы саклана. Бу хакта Татарстан Гидрометеорология һәм әйләнә-тирә мохитне күзәтү идарәсе хәбәр итә.
Синоптиклар мәгълүматларына караганда, республика территориясендә юеш кар явуы ихтимал. Кайбер урыннарда бураннар булырга мөмкин.
Шул ук вакытта көньяк-көнбатыштан төньяк-көнбатышка күчүче көчле җил исәчәк, урыны белән ул 17-22 метрга җитәчәк.
Метеорологларның алдан фаразлавыннан күренгәнчә, 21 һәм 22 декабрьдә Татарстанда «көчле явым-төшемсез уртача салкын һава торышы көтелә». Температура -5…-10 градуска кадәр, ә төнлә аязганда -15 градуска кадәр төшәчәк.
Мәгълүмат: tatar-inform.tatar