Тамашачысыннан килгән бер хат җырчы Руслан Кираметдиновның күңеленә тигән.

Ул аны сторисларына чыгарган. Хатның эчтәлегеннән аңлашылганча, элекке хатыны энесенә Руслан Кираметдиновның плакатларын чүплеккә ташларга кушкан.

«Руслан, син – молодец, син – супер! Без классташ кызлар белән 7 көн «Ижминводы» шифаханәсендә ял иттек. Төштән соң урамда йөргәндә, телефоннан синең җырларны куйдык. Шунда безне бер егет туктатты. «Сез Русланның җырларын яратасызмы?» – ди. Без барыбыз да: «Әйе», – дидек. Бу егетнең кулында – сезнең сурәтләр белән плакатлар. Без, шифаханәдә концертыгыз була икән, дип уйладык. Ә бу егет: «Мин бу плакатларны чүплеккә илтеп ташлыйм», – диде. «Нигә ташлыйсыз? Бирегез безгә», – дигәч, барыбызга да берәр данә бирде. «Гаражда 1000 данә ята, безгә кирәкми. Апа чүплеккә ташларга кушты», – диде. Без хәйран калдык. «Безгә китереп бирегез, Нурлатка алып кайтып таратабыз», – дип, бүлмә номерыбызны әйттек. Ә бу егет безгә Илмираның бертуган энесе икәнлеген әйтте. Чүт егылмадык», – дип язган Русланга кызлар.

Руслан Кираметдинов әлеге тамашачысына җавап итеп: «Нурлатка килгәч, үзем плакатлар бирермен, рәхмәт иҗатымны яратканыгыз өчен», – дип язып куйган.

чыганак: https://kiziltan.ru/articles/kultura/2023-04-17/plakatlarygyzny-ch-plekk-tashlyylar-3222612