Татарстанда пенсионер хатын-кыз, тупланган акчасын саклап калам дип, ялган банкирларга 390 мең сум акча күчергән. Бу хакта ТР буенча Эчке эшләр министрлыгының матбугат хезмәте хәбәр итә.
Яшел Үзәндә яшәүче 60 яшьлек хатын-кызга банктан дип шалтыратканнар. Ул ялган банкирлар әйтеп торуы буенча банкомат аша мошенникларның кесә телефоннарына 390 мең сум акча күчерә.
Караклар корбаны булуын аңлаган хатын-кыз полициягә мөрәҗәгать иткән.
Ялган банкирлар хатын-кызга шалтыраткан телефон номерлары караклыкның башка фактлары буенча да узуы ачыкланган.
Чыганак: Татар-Информ