Бу концерт 28 ноябрьдә УНИКСта узган “Мең рәхмәт” хәйрия фестиваленең дәвамы. Проектның авторы – журналист Рөстәм Исхаков. 
Концертка катнашырга теләк белдергән Уфа һәм Казан җырчылары ике як арасындагы дуслыкның нык булуын искәртеп үтте. Күптән түгел Ирек Габдрахмановның Башкортстанда иҗат кичәсе үткән иде, анда катнашкан берничә артист Казанга да килде. Илнур һәм Алия Сәхбетдиновлар әнә шундыйлардан. 

– Ирек абыйның җырлары күңелгә ятты, үзенә интернет аша чыгып, сөйләшеп, бергә иҗат эшебезне башладык, – ди алар. 
Җырлар язуны иҗади гаилә үзеңнән соң эз калдыру чарасы кебек күрә. “Җырлар иҗат итү йөрәктән чыккан эш, матди ягы да, рухи ягы да, әлбәттә, мөһим”, дигән фикердә Сәхбетдиновлар. 

Ирек Габдрахмановның дәртле җырларын башкаручылар рәтендә Римма Никитина да бар. Ул иҗат кичәсенә үз концертын кичектереп килүе турында әйтте. 

– 2016 елда Ирек абый “Инстаграмнан эзлим сине” дигән җыр тексты тәкъдим итте, миңа ошады ул, бераз эшкәртеп, көен яздык та, аудиториягә чыгардык. Яшьләр арасында шактый популярлашты ул, мине таныткан җыр дисәм дә, ялгышмам, – диде Римма. – Хәйрия концертларында теләп катнашам. Үзең өчен дә савап бит ул. Бөтен командам белән җыелып бүген дә килдек. 

УНИКСта куелган концертта катнашкан җырчыларны да күрергә мөмкин иде бу кичәдә. Фәрид Мифтахов, Рәсим Низамов, Гүзәлия, Гөлнара Габидуллина әнә шундыйлардан. Илназ Гарипов исә сәхнәгә ут кую эшендә ярдәм күрсәтте. 

Фәрид Мифтахов белдергәнчә, мондый чараларда катнашкан һәркем зур савап эшли, шул ук вакытта хәйрия чаралары тәрбия ысулы да. “Без бирегә килеп бер-беребез белән дуслашабыз, аралашабыз, фикердәшләрне табабыз. Битараф булмаган кешеләр генә җыела монда”, дип саный ул. 

“Йөрәгеңә үтеп керермен” җыры белән чыгыш ясаган Рәсим Низамов исә, “ТМТВ”, “Татар җыры”, “Болгар”радиосы” премияләре булган кебек үк, “1000 рәхмәт” премиясен дә булдырырга кирәк, дип саный. “Монда исә хәйрия чараларында күп катнашкан кешеләр, артистлар бүләкләнер иде”, дигән фикердә җырчы. 

Гөлназ Сираева Ирек абый белән күптән түгел генә хезмәттәшлек итә башлавын әйтте. “Композитор буларак, Ирек абый бик матур җырлар яза, шәхсән үземә ошый. Берничә күңелгә хуш килгән җыры да бар, алга таба алары да дөнья күрер”, диде җырчы. 

Иҗат кичәсендә шулай ук ярминкә гөрләде: китап, чәй, тәм-томнар сатылды.

Чулпан Гарифуллина

Запись Тинчурин театрында «Җырлы язмыш» концерты гөрләде [фото] впервые появилась Tatar Today - татар яңалыклары..

12 февраль Тинчурин театры 18:30 – Ландыш Нигъмәтҗанова, Рәсим Низамов, Гүзәлия, Гөлназ Сираева, Фәнил Вакказов һәм башка җырчылар популяр җырлар авторы Ирек Габдрахмановка ярдәм концертында. Күңелле, матур иҗат кичәсенә чакырабыз! 240-84-84, 5122535

Төп мәгълүмати партнер – ТНВ каналы, оештыручылар – “Мең рәхмәт” проекты, Арча якташлар җәмгыяте, Тинчурин театры.

БИЛЕТЛАР КАССАЛАРДА: 

-KASSIR.RU 
-CONCERT.RU 
– БАРЛЫК “ЕВРОСЕТЬ” САЛОННАРЫ 
– Тинчурин театры кассасында – 238-56-17

Запись Гүзәлия, Ландыш, Рәсим Низамов, Фәнил Вакказов һәм башкалар сезне концертта көтә [афиша] впервые появилась Tatar Today - татар яңалыклары..

– Җырчыларның күбесе: “Мин үземне белә башлаганнан җырлыйм”,  диләр. Әлеге сүзләр сезгә дә кагыламы?

– Әйе, җыр гел минем белән булды. Әйтерсең лә “җырлап” туганмын, ләкин халык мине Рәсим Низамов буларак таный башлауга быелны нәкъ 20 ел. 2018 елда миңа 45 тә тула. Әлеге ике датаны кушып, матур гына бәйрәм ясарга планнаштырам.

– 20 ел – аз вакыт түгел. Эстрадада үзгәрешләр дә булмый калмагандыр…

– Хәзер татар эстрадасының начарлануы хакында сүзләр күп йөри. Минемчә, татар җыры әшәке якка үзгәрде, дисәк, гаепне үзебездән эзләргә кирәк. Димәк, без – җырчылар да, әлеге күренешкә юл куйганбыз. Шуны әйтә алам: мин бәхетле чорга эләктем, чөнки җырның сәнгать буларак кадере бар иде. Татар җырының дәрәҗәсе юкка чыкты дип әйтеп булмый, тик шулай да түбәнәйде.

– Хәзер сәхнәдә җырчылар саны бик күп. Ничек уйлыйсыз, әлеге күренеш татар җырының аска таба тәгәрәвенә тәэсир итәме?

– Кайвакыт радионы кушасың һәм андагы җырларны ишеткәч, күңел әрнеп куя. Хәзер кемнең теләге бар, шул җырлый. Шуны онытмаска кирәк: сәхнәнең үз законнары, таләпләре бар. Бу – беренчедән. Икенчедән, җыр сәнгатен җиңел сәнгать дип табалар. Сара апа Садыйкова заманнарыннан ук әйтелгән сүз бар: сәхнә – изге урын ул. Нәрсә турында җырлавыңны аңлап җырларга кирәк.

– Сезнеңчә, җырчы булыр өчен югары уку йортын тәмамларга кирәкме?

– Кирәк дип уйлыйм – юкка гына бишешәр-алтышар ел укытмыйлар бит сәнгать уку йортларында. Җырчы, җыр – товарга әйләнде. Урамнан, бераз гына булса да, таланты булган яшьләрне табалар да, җырчы ясарга уйлыйлар. Радиодан әйләндерәләр, телевизордан күрсәтәләр… Минемчә, бу шәхес – бары тик вакытлы товар гына.

– Тамашачының теләге үзгәрдеме?

– Тамашачы артыннан без иярергә тиеш түгел, киресенчә, без аларны тәрбияләргә тиеш. Халык бит ул бүген кул чабар, ике атнадан “Афәрин”,  дияр, 2-3 айдан синең концертыңа килмәскә дә мөмкин. Мин беркайчан да үземне йолдыз булып хис итмәдем. Башлангыч чорда популяр булып алганмындыр бераз, чөнки ул елларда халык өчен яңалык идем. Хәзер исә мин булганына рәхмәтлемен. Иң авыры – сәхнәдә үз урыныңны булдырып, аны тотып тору. Тамашачыны хәзер иркәлиләр: кайсысын тыңлыйсы килә, шуны тынлый – бары тик шул. Аны гаепләргә кирәкми.

– Сезгә популяр җырчы булырга һәм әле һаман да төшеп калмавыгызга нәрсә ярдәм итте?

– Беренчедән, “мәктәп” дигән зур баскычны үттем. Әйткәнемчә, ансыз булмый һәм ярамый. Икенчедән, халык күңеленә үтә торган җырларны сайлау. Мине популяштырган җыр – ул “Ак каеннар арасында” җыры. Әлеге җырны миңа тәкъдим иткәч, бер дә тамашачыга ошар дип уйламаган идем. Дуслар, гаиләм минем өчен – иң беренче тәнкыйтьчеләр. Тамашачы сиңа кул чабачак, ә менә якын кешең кимчелегеңне “бәреп” әйтәчәк. Тормыш иптәшем дә иҗатка якын кеше, без бергә укыдык. Казанга килүемнең максаты – музыка укытучысы булу иде, тик тормыш юлым башка якка алып китте.

– Җырны сайлаганда, нәрсәсенә игьтибар итәсез?

– Бүген җыр язучылар шактый. Социаль челтәрләр заманында яшибез, шуңа күрә Интернет аша да җырлар тәкъдим итүчеләр бар. Минем өчен җырның сүзләре мөһимрәк. Әле менә күптән түгел Германиядә яшәүче җырлар авторы Ирек Габдрахманов үзенең җырын тәкъдим иткән иде. Бер яктан караганда, Интернет аша гына аралашу җайлы кебек, тик, икенче яктан, син башкаручы җырның авторын күреп белмәү – яхшы күренеш түгел.

– Тинчурин театрында 12 февральдә Ирек Габдрахманов иҗатына багышланган иҗат кичәсе узачак. Сез кунаклар арасында бар. Ирек абый белән ничек табыштыгыз?

– Аның белән без, гомумән, таныш түгел идек. Ул социаль челтәрдә минем белән элемтәгә кергәч, мин аны башта яшь егет дип күзалладым. Аралаша башлагач кына, аяныч хәлдә булуын аңладым. Җырына килгәндә, көе дә, сүзләре дә күңелемә ятышлы булдылар, һәм без үзара килештек. Аның иҗат кичәсен үткәрүләрен белгәч, бик теләп катнашырга ризалаштым.

– Чара хәйрия концерты буларак үтәчәк. Ничек уйлыйсыз, Ирек абыйга ярдәм итеп булырмы?

– Аның авырлыктан бимазаланганын белгәч, кызганып куйган идем. Билгеле, кемнең туган ягына кайтасы килмәсен, ди?! Тик эш анда гына түгел: бәлки аңа Германиядә ярдәм ягыннан күбрәк булышырлар. Аның белән якыннан күрешү теләге дә бар.

Хөрмәтле дуслар, сезне 12 февраль көнне 18:30 сәгатьтә Кәрим Тинчурин театрында көтеп калабыз! Җырчылар арасында Ландыш Нигъмәтҗанова, Рәсим Низамов, Гүзәлия, Гөлназ Сираева һәм башкалар булачак. Билетлар kassir.ru сайтында. Очрашканга кадәр!

Запись «Ак каеннар арасында» хитын башкаручы Рәсим Низамов кем белән очрашырга хыяллана? впервые появилась Tatar Today - татар яңалыклары..

Нияз Мәгасумов исә иҗат кичәсенә чакырып, видеомөрәҗәгать кертте.  Ул да концертта Ирек Габдрахманов иҗат иткән җыр белән чыгыш ясаячак. Килми калмагыз!

https://www.instagram.com/p/Bd-CQVzliTt/?taken-by=magasumov_niyaz

Запись Нияз Мәгасумов Ирек Габдрахмановның иҗат кичәсенә чакыра [видео] впервые появилась Tatar Today - татар яңалыклары..

– Башка кешеләргә ярдәм итеп, үзебезгә дә савап алабыз, – ди ул. – Хәйрия эше белән шөгыльләнү – ул акчалата ярдәм күрсәтү генә түгел. Әлбәттә, мондый чаралардан күпмедер дәрәҗәдә матди ярдәм дә җыела. Ил төкерсә, күл була дигән кебек, хәйрия чараларында катнашып, башка кешеләрне, тамашачыларны да изге эшләр эшләргә җәлеп итәбез.

Рәсим Низамов фикеренчә, беркемнең дә капчыгы буш түгел. Тормышта һәркем авырлыкларга дучар була, ләкин авырлык кешене берләштерә. “Бу сыйфат татар милләтенә генә түгел, гомумән, Рәсәй халкына хас. Моны без даими рәвештә үткәрелгән смс-ярдәм һәм башка хәйрия чараларыннан күреп беләбез”,  дип уйлый җырчы. Рәхмәт сүзен Рәсим Низамов аңа яхшылык кылган һәркемгә әйтә икән.

Популяр җырлар авторы, хәзерге көндә Германиядә яшәүче ярдәмгә мохтаҗ Ирек Габдрахманов Рәсим Низамовка Интернет аша үзе иҗат иткән җырын җибәрә. Шул рәвешле алар танышып китә.  Бүгенге көнгә кадәр очрашып-күрешкәннәре булмаса да, һәрвакыт хәбәрләшеп тора алар.

– Ирек абый иҗатының үзенчәлекле ягы нидә?

– Иҗат кешесе хыялый, бераз самими булырга тиеш. Ирек абый шундыйлардан. Гади, нечкә күңелле кеше, һәрбер язган шигыренә, җырына сөенә – нәкъ шул сыйфаты күңелгә якын, – дип җаваплый Рәсим Низамов.

“Мең рәхмәт” хәйрия концертында да Рәсим Низамов Ирек Габдрахманов иҗат иткән җыр белән чыгыш ясаячак. Килегез, күрегез, изге эштән читтә калмыйк!

 Энҗе Ризванова

Запись Рәсим Низамов: «Авырлык кешене берләштерә» впервые появилась Tatar Today - татар яңалыклары..

Әлеге чараның төп максаты – татар эстрадасы артистлары катнашкан фестивальдә җыелган акчаны Анжела Вавилова фондына (Казан һосписына)тапшыру һәм популяр җырлар авторы, тумыштан ук авырлык чиреннән интегүче Ирек Габдрахмановка Башкортстандагы йортын төзекләндерергә ярдәм итү. 

Катнашалар: 

– АсылъЯр 
– Фирдүс Тямаев 
– Рәсим Низамов 
– Гүзәлия һәм Хаким 
– Илшат Вәлиев 
– Гөлназ Сәфәрова 
– Илназ Гарипов 
– Ләйлә Дәүләтова 
– Филүс Каһиров 
– Гөлдания Хәйруллина 
– Әсхәт (Дөбер-шатр) 
– Лилия Муллагалиева 
– Дилә Нигъмәтуллина 
– Фәрит Мифтахов 
– Нурбәк Батулла һәм Ислам Валеев 
– Сәйдә Мөхәммәтҗанова 
– Илнар Ялалов 
– Гөлнара Габидуллина 
– Айваз Садыйров 
– Нурзадә

Запись «Җирдә яшәү үзе бәхет!» ди «Мең рәхмәт» проекты җырчылары [афиша] впервые появилась Tatar Today - татар яңалыклары..

 –Яхшылык ни ул, сезнеңчә?

– Яхшылык – ул һәрчак якыннарыңның, дусларыңның хәл-әхвәлен белешү, алар турында кайгыртып тору. Гадәти нәрсәләрдән башлана бит ул! Нинди генә вакыт булмасын, шатлык килдеме, сагышмы, бер-береңә терәк булып, аралашып тору да яхшылык. Хәйрия темасына килгәндә, традициягә кереп китте ул минем концертларда катнашу. Картлар йортларына да, интернатка да төркемем белән  барабыз. Никтер күңелемә якын шул гамәл. Җырлаганда өлкәннәрнең күзләренә карамаска тырышам… Алар җырларны шундый яратып кабул итә, шундый самими… Картлар йортыннан авыр тойгылар белән кайтам, әлбәттә. Шунысын да әйтеп үтим: хәйрия концертлары татар эстрадасы артистларын дуслаштырды һәм берләштерде дә әле. Әлбәттә, мохтаҗлар барлыгын белү бик авыр. Булдыра алганча тырышабыз, ярдәм итәбез. Минем җыр башкарып, концертта катнашуым нинди дә булса нәтиҗә бирсә, бик әйбәт инде ул. Үзем дә әниемне югалттым… Янымда якын дусларым булды. Кешегә матди ярдәм генә түгел, рухи ярдәм дә кирәк бит әле, шунысы да мөһим. Кайгы килгәч кемнең кем икәне беленә ул. Бер белмәгән кешеләрнең булышырга әзер торуларын күрү дә рәхәт иде. 

– Мең рәхмәтне сез кемгә әйтер идегез?

– Мең рәхмәт сүзен мин әниемә әйтәм. Ул мине дөньяга тудырган, үстергән, тәрбия биргән, кеше иткән!

Запись Нурзадә: «Хәйрия концертлары татар эстрадасы артистларын дуслаштырды» впервые появилась Tatar Today - татар яңалыклары..

Германиядә яшәүче, дистәләрчә җыр авторы, тумыштан ук авырлык чиреннән интегүче Ирек Габдрахманов Азатлык аша ярдәм сорый. Әсәрләрен Айдар Галимов, Габделфәт Сафин кебек күренекле җырчылар башкарган автор туган ягы – Башкортстанның Уран авылына кайтып яшәргә тели. Ирек әфәнденең авырлыгы 300 килограммнан арткан. //Азатлык//

Бүген Германиянең Дюссельдорф шәһәреннән ерак булмаган бер тулай торакта яшәп ятучы Ирек Габдрахманов Башкортстанның Бүздәк районы Яңа Актау авылында туып үскән. Аның әнисе вафат, әтисе инде өлкән яшьтә. Туган-тумачасына авырлык китермим дип ул бар булган әйберләрен җыеп 2009 елда Октябрьскидагы картлар йортына китә.

300 килограммга якын булганга, үзен-үзе карау көченнән килми, душка керү, хәтта киенү дә зур авырлык тудыра. Табиблар гармоннар нормаль эшләмәгәнгә (эндокрин дисфункция) тумыштан ук авырлыктан иза чигә дигән диагноз куя. Аны икенче төркем инвалид дип таныйлар һәм Ирек әфәнде картлар йортында 2012 елга кадәр яши.

Ирек әфәнде туган ягында

Эндокрин дисфункциядән интеккән кешеләргә Германиядә ярдәм күрсәтә алалар, махсус операция ясыйлар икән дигән сүзләрне ишетеп ул акча туплап, чит илгә юл тота. Ләкин өметләре акланмый: аңа Германиядә дә “ярдәм итә алмыйбыз”, дип әйтәләр, чөнки авырлыгы артык зур була. Габдрахманов хәзер “Кызыл хач” ярдәме белән ярдәмгә мохтажлар интернатында яши. Аның кулында Германиядә яшәү хокукы биргән бернинди документы да юк.

Узган елдан бирле Ирек әфәнде кире туган ягына кайту теләге белән яна, әмма бу хыялының тормышка ашу-ашмавы зур сорау астында тора. Германиядә аның инвалид булуы рәсми дәлилләнмәгән.

Русиядә Габдрахмановның ярдәмгә мохтаҗлыгын беләләр, ә Германиядә инвалидлыкны раслар өчен дәүләт оешмаларына йөрү кирәк.

“Миңа биш адым атлау да бик авыр. Утырган җиремнән егылып китеп тора алмаслык хәлгә килдем, коткару хезмәте килеп караватыма утырта. Дәүләт оешмасына бармасагыз, рәсми инвалидлык алып булмаячак диләр. Мин яшәгән җирлектә бернинди дә мөмкинлек һәм ярдәм күрсәтү юк диярлек. Мәсәлән, миңа хөкүмәт махсус арба бирергә тиеш, тик бирмиләр. Монда минем бернинди дә хокукым юк. Чөнки мин бу ил ватандашы да түгел”, ди Ирек әфәнде.

Ирек Габдрахмановның Башкортстандагы кайтыр йорты

​”Иң зур теләгем –​ үз йортымда тору”

Габдрахманов 2015 елның язында Русия президенты Владимир Путинга һәм Башкортстан җитәкчелегенә туган иленә кайтаруларын сорап хат яза. Путин идарәсе хатны республика хакимиятенә, алар исә Бүздәк районына юллый. Район хакимияте өегезне төзекләндерү өчен 57 мең сум акча бирдек дип белдерә. Ә Ирек әфәндене кайтару мәшәкатьләрен беркем дә үз өстенә алырга теләми.

 

“Миңа ярдәм итсәләр, кайта алырмын дип ышанам. Уфа рейсына кадәр утыртып кына җибәрсеннәр, очкычта кайтам инде мин. Тик Германиядән китә алуым шикле. Минем йөри алмавымны табиб дәлилләргә тиеш. Аңа минем янга килергә кирәк. Ә монда андый мөмкинлек юк. Табибка үзем барасы. Бу әлегә мөмкин хәл түгел. Инде 8 ай умыртка баганасы авыртуыннан интегәм, аякларым сызлый, тикшерүче, дәвалаучы юк. Бер тапкыр рентгенга алып бардылар. Тик, май катламы калын булганга, рентгенда берни күренмәде. Шуңа күрә, кайтуыма ышаныч бик аз”, ди ул.

Популяр җырлар авторы Башкортстанның Бүздәк районы Уран авылында кайчандыр иске йорт та алып куйган булган. Бүген шунда кайтып яшәү хыялы аңа тынгы бирми. Тик ул йорт бөтенләй яраксыз хәлдә. Бүрәнәләр черек, түшәм җимерек. Аны патша заманында ук төзегән булганнар. “Иң мөһиме: анда душ та, бәдрәф тә юк, тагын өстәмә бүлмә төзер өчен күп акча кирәк булачак. Кайткан дәвердә дә, йортны төзекләндерергә дә ярдәм кирәк булачак”, ди Ирек әфәнде. Ул миһербанлы кешеләр игътибарсыз калдырмас дип өметләнә. Теләгән һәркем Ирек Габдрахманов белән Вконтакте битендә элемтәгә керә ала.

Бүген Ирек әфәнде һәр көнне иртән ятагыннан тору өчен генә дә бер сәгать күнегүләр эшләргә мәҗбүр. Мине 8 ай буе язмыш шулай сыный дип тә әйтеп була, ди.

“Авыр хәлдә калганда, бер генә юл бар: ул да булса, Аллаһ тәгаләгә ышаныч. Ихластан догалар укысаң, Аллаһ тәгалә, һичшиксез, ярдәм итәчәк. Шул ук вакытта күңелгә илһам да килә. “Матур җырлар язасыз!” дигән сүзләр дә илһам канаты бирә”, ди Габдрахманов.

 

Алмаз Хәсәнов “Сагынам” җырын башкара. Ирек Габдрахманов сүзләре

Ирек әфәнденең авырлыгы – 350 килограмм, буе – 180 сантиметр. Дөньяга килгәндә үк җиде килограм булган ул. Үскән саен авырлыгы да арткан: 25 яшендә 220 килограмм булса, 40 яшенә 300 килограммга җиткән. 54 яшьлек ир аздан гына Гиннесслар китабына керми кала, башкорт “баһадир”ына 50 килограмм җитми.

Габдрахманов 10 яшьтә үк шигырьләр яза. Европага килгәч, көйләр дә чыгара башлый.

“Шигырь язганда ук күңелдә ниндидер көй туа бит инде ул. Менә шуны көйләп, диктофонга яздырам да, музыкант егетләргә бирәм, аранжировка ясатам. Җырларым арасында Габделфәт Сафин яратып алган “Мин бит синдә кояш күргән идем” иң популяры дип саныйм, көе минеке. Айдар Галимов башкаруында “Яшәп калыйк” җыры да бик популяр, ул җырга сүзләр яздым. Рәсим Низамов җырлый торган “Йөрәгеңә үтеп керермен” җыры “Хит-парад”та беренче урыннарда тора. Нурия Ярмөхәммәтованың “Кадеремне белмәдең” дигән җыры да халык күңеленә үтте. Дөньяга чыккан җырларымның 50 процентын һит дияргә була, чөнки гел алдынгы урыннарда баралар”, ди Ирек әфәнде.

 

Габделфәт Сафин “Мин бит синдә кояш күргән идем” җырын башкара. Көен Ирек Габдрахманов язган.

Бүген Ирек Габдрахмановның 50ләп җыры дөньяга чыккан, 80ләп яңа җырының башкаручысын көтүен дә әйтә ул.

Запись Популяр җырлар авторы Ирек Габдрахманов: « Утырган җиремнән егылып тора алмаслык хәлгә килдем» впервые появилась Tatar Today - татар яңалыклары..

Запись Язмышны кара козгын белән чагыштыручы Ирек Габдрахмановтан яңа җыр сүзләре впервые появилась Tatar Today - татар яңалыклары..

Акылымнан мине яздырасың,
Карашларың белән чакырасың!
Кайнар хисләремне таштырасың-
Саф сөюең белән…Шаштырасың!
Салкын кышта чәчәк аттырасың,
Сөю язларында калдырасың!
Кайнар ялкыннарда яндырасың-
Мәхәббәтең белән…Шаштырасың!
Йолдызларга юллар салдырасың,
Төшләремә кереп яндырасың!
Йөгәнләмим азгын хисләремне-
Син барыбер мине…Шаштырасың!
Моңлы-моңлы җырлар яздырасың,
Ике ярга күпер салдырасың!
Килми һичтә Сине калдырасым-
Карашларың белән…Шаштырасың!
Көн дә Синең төшләреңә керәм,
Иренеңнән шашып-шашып үбәм!
Туктый алмыйм Сине яратудан-
Мәхәббәттән янам, көям, үләм!

Йөрәкне дә һич туктатып булмый,
Ярсый… Сөя… Алга ашкына!
Хыялымда ак болытлар булып,
Агыламын Синең яныңа!

Син эрисең минем кулларымда,
Шоколодтай татлы, назлы Син!
Җилләремнең иң иң җылысы Син-
Салкын кышларымның язы Син!

Кайнар сөюебез ялкыннары,
Бар Җиһанга бирсен Сәгадәт!
Тик шәм сыман янып бетмәсен ул-
Безнең Сөю… Безнең Мәхәббәт!

Кояш сыман мәңге балкысын ул,
Сөю белән тулган дөньяда!
Безнең сыман Таһир-Зөхрәләр,
Табышсыннар назлы язларда!
Төшләреңдә әгәр мине күрсәң,
Тик Бәхеткә юра Матурым!
Өннәреңдә килеп юатырмын,
Куанычым минем… Таң нурым!
“Яратасыңмы?” дип сорама син,
Яратмыйм мин Сине Алтыным!
Чын йөрәктән Сине янып сөям,
Синең өчен яна ялкыным!
Мәхәббәтнең кайнар утларында,
Яна-яна сөям мин Сине!
Бөтерелгән диңгез-дарьяларда,
Бата-бата сөям мин Сине!
Күз ачкысыз кышкы буранда да,
Туңсам туңам – Сине сөям мин!
Синең өчен жаным жәл дә түгел,
Синең өчен, Жаным, үләм мин!
Берни күрмим… Сине генә күрәм,
Мәхәббәтле уйчан күзеңне!
Ай нурында назлы караш сипкән,
Ягымлы һәм алчак йөзеңне!
Мин яратмыйм Сине… Шашып сөям,
Сөю хисләренә тилереп!
Мәхәббәтсез ничек яшәү кирәк-
Назлы сүзләргә дә тилмереп!

Ирек Габдрахманов

Запись Германиядә яшәүче Ирек Габдрахмановтан шаштыргыч шигырьләр впервые появилась Tatar Today - татар яңалыклары..