Архивы Татарлар - Tatar Today - татар яңалыклары.

Хәмдүнә Тимергалиева: Ул вакыйгаларны искә алган саен күңелемдә горурлык хисе уяна [видео]

Рамиля Валиахметова — Mon, 31 Aug 2020 13:29:52 +0000

Татарстан суверенитеты өчен көрәш елларында үзе дә Казанның Ирек мәйданындагы кайбер вакыйгаларда катнашкан җырчы Хәмдүнә Тимергалиева Азатлыкка хатирәләрен, Татарстан һәм татар халкы турында фикерләрен уртаклашты.

— Суверенитет декларациясе турында ишеткәч беренче хисләрегез нинди булды?

— Ул көн татарлар өчен бик сөенечле көн булды. Чөнки моңарчы татарча сөйләшү дә чикләнгән иде. Без үскән вакытта троллейбус, трамвайга кереп татарча сөйләшә башласак, бездән көлә башлыйлар иде: “Тагын “калябаля” башлана инде”, дип. Шуңа күрә, үзебезнең телебез, үзебезнең республикабыз, суверенитетлы булуыбыз барлык халыкны сөендерде.

— Татарстан мөстәкыйльлек өчен көрәшкән чорны ничек хәтерлисез?

— Ул елларда Казанга Сергей Шахрай белән Сергей Филатов килгәндә мин парламент бинасы алдында йөрдем, “Җомга”ны җырлап. Аягымдагы оекларыма хәтле тишелеп бетте кичкә хәтле. Иртән сәгать алтыда барган идек, төнге сәгать бердә кайттык. Бигрәк каты исемдә калган Вафирә Гыйззәтуллина. Филатов авызы янында бармак болгап торды. Без үзебезнең президентыбызны беркемгә дә бирмибез дип. Миңтимер Шәймиев иде ул вакытта. Үзебез хәл итәрбез, дөнья болгатып йөрмәгез, кайтып китегез Мәскәүгә дип Вафирә Филатовларны куды. Кертмәделәр Ак йортка берсен дә. Бөтен артистлар иде анда, Рөстәм Вәлиев бер почмакта гармун уйный, бер почмакта Зөһрә Шәрифуллина җырлый, бер почмакта мин җырлыйм, бер почмакта Рабит Батулла рупор белән йөри. Кертмәделәр Мәскәүдән килгән кешене.

— Татар халкы ирешә алдымы теләгәненә? Бәйсезлек теләделәр бит. Ул вакытларны искә төшерсәгез, хәзер бит инде анализ ясый аласыз. Татар халкы ирештеме, юкка гына булмадымы Ирек мәйданына чыгып җырлаулар, берләшүләр?

— Вакыт үз агымы белән бара. Безнең татар халкы булган, булачак, яшәячәк. Мин шул мәйданнарда йөрмәсәм дә, ирекле булып яшим. Татар мин. Бәйсезлеккә ирештегезме дигәндә, шуны әйтәсем килә, чит илләргә, Кытайга, Австралиягә бардым, Италиядә, Төркиядә булдым, анда шул ук татарлар иркен булып яшиләр, өйдә татарча гына сөйләшәләр. Безнең татар халкы гомер буе үзен саклаган, гомер буе кирәген биргәннәр, гомер буе басып килгәннәр, беркайчан да бетми, татар халкы яши торган халык, татар халкы эшли торган халык. Кемдер, нәрсәдер басым ясаган икән, ул “ярар” дияргә, әмма кәҗә тоягын күрсәтергә мөмкин. “Ярар, сезнекечә булсын”, ди ул, менә болай иттереп йодрыгын күрсәтәчәк. Тукайны гына кара әле, теге заманда яшәгән бит. Ә бүген аны искә алмаган берәр татар бармы? Татар яши, чын татарлар яши. Аның булдыксызы үзе дә яши алмый, кешегә дә яшәргә бирми.

— Ул чакта мөстәкыйльлек өчен көрәшкән артистлар белән соңгы елларда бу хакта сөйләшкәнегез бармы? Нәрсә әйтәләр, бу турыда фикерләре нинди?

— Беләсезме, ул вакытта артистлар гына түгел, бөтен милләтебез җиткерде үз фикерен. Мөстәкыйльлекне алу көрәшендә бөтен халык катнашты. Ул вакыйгаларны искә алган саен күңелемдә горурлык хисе уяна, безнең ул йөрүләр юкка булмады дим. Уйлап карасак, республикабыз шул еллардан башлап үсеш алды, кешенең аңы үзгәрде, үз фикерен әйтә башлады халык. Ә Казаныбыз ничек үзгәрде, танымаслык бит. Мин кайчандыр килгән Казан белән чагыштырсак, бүгенге Казан — оҗмах. Чит илдән килүче кешеләргә Казаныбызны һәм гомүмән республикабызны горурланып күрсәтә алабыз.

— Татарстан үссен өченгә тагын өстәмә нәрсә эшләргә, кайсы өлкәдә яңарту, яисә үзгәреш кертү кирәк дип саныйсыз? Әйтик, мәдәни, мәгариф өлкәләрендә, мәсәлән?

— Республикабыз күптән үскән ул. Һәрвакыт алга омтылып, камилләшү юлында булырга кирәк. Америка, Франция, чит ил дибез, әмма бу безнең өчен кыйбла булырга тиеш түгел. Безнең үзебезнең мөстәкыйль илебез бар. Халкыбызның яшәеше, мәдәнияте, гореф-гадәтләребез үрнәк булырга тиеш һәм шул рәвешле дөньяви дәрәҗәгә җитәргә кирәк, түгел анда башка халык, чит илләргә карап. Базарга чыксам “Менә Төркиядән алып кайткан тауар” дип мактый башлыйлар. Минем ачу килә дә, алмый китеп барам. Чит илнеке түгел, Татарстан, татарлар җитештергән тауарлар бу дип әйтерлек хәлгә җитәргә кирәк. Безнең милләтебезгә чисталык, сафлык, тәүфыйклылык, миһербанлык, булдыклылык хас. Ходай шуннан аермасын. Башкаларга да үрнәк булырлык милләт булып яшик.

— Киләчәккә бер күз салсак, Татарстанның киләчәген ничек күзаллар идегез? 30 ел үтте, тагын 30 елдан Татарстан нинди булыр икән, сезнеңчә?

— Татарстаныбыз чәчәк атачак, башкача мөмкин түгел. Татар халкы беркайчан да бетми ул, чөнки безнең халык эшчән, гадел, үз милләте өчен һәрчак янып-көеп яши торган халык. Татарны элек тә бетерә алмаганнар, хәзер дә бетерә алмаячаклар.

Чыганак: Азатлык радиосы

Запись Хәмдүнә Тимергалиева: Ул вакыйгаларны искә алган саен күңелемдә горурлык хисе уяна [видео] впервые появилась Tatar Today - татар яңалыклары..

Рөстәм Нәбиев куллары белән атлап машинаны тарта? [видео]

kadria — Mon, 03 Aug 2020 08:28:50 +0000

// Татар Тудей // Татар Бүген //

Омсктагы казарма җимерелгәндә исән калган Рөстәм Нәбиев “Тайота камри” машинасын биленә бәйләп, кулына басып тартып бара. Шул рәвешле башкаларга аяксыз булып та күңел төшенкелегенә бирешмәскә кирәклеген, мөмкинлекләр чиксез икәнен күрсәтте. Аның тормыш юлы күпләр өчен үрнәк кенә түгел, зур мотивация һәм омтылыш!

“Инвалид кәнәфиенә утыргач күбрәк нинди кыенлыклар бар, беләсезме? “Җәмгыять безне кабул итмәс”, дигән уй.

Дөньяда идеаль кешеләр арасында, без-аның кире ягы. Шуңа күрә, барысына да минем мөмкинлекләрем чиксез икәнен күрсәтәсем килә. Үзеңне ничек бар, шулай кабул иткәндә генә, дөнья да сезне шулай кабул итәчәк. Минем инвалид кәнәфиенә беркайчан да утырасым килмәде, хәтта уйлаганым да булмады!

Мондый тормыш – ул сынау…Ә сынау – беркайчан да җиңел булмый!” – ди Рөстәм Нәбиев.

Рөстәм 1-10 сентябрьда, илебезнең иң югары ноктасы – Эльбруска менәргә дип максат куйган!

Видео Рөстәм Нәбиев инстаграмыннан

Запись Рөстәм Нәбиев куллары белән атлап машинаны тарта? [видео] впервые появилась Tatar Today - татар яңалыклары..

Айдар Галимов Данир Сабиров хатынын кочаклаган, кызлары бүлмәсендә йөри. Ни бу? [ видео ]

kadria — Wed, 29 Jul 2020 20:00:29 +0000

// Татар Тудей // Татар бүген //

Айдар Галимов инде күптәннән Данир Сабиров һәм Миләүшә Сабирова янына кунакка килергә теләп йөргән, менә аның хыялы да чынга ашкан.

Айдар Галимов Сабировларга кунакка килгәч, беренче эш итеп Мәрьям бүлмәсенә кереп, аның кубок-медальларын карый. Мәрьямның бүлмәсендә алар шулкадәр күп, Айдар Галимов аларны күреп таң кала!
“Мин студиямда кубоклар күп дигән булам, монда бит син безне арттыргансың”, ди ул.

Аннан Данир Сабиров һәм Миләүшә белән урамга чыгып җырлашалар, биешәләр…

Видео Айдар Галимов инстаграмыннан

Запись Айдар Галимов Данир Сабиров хатынын кочаклаган, кызлары бүлмәсендә йөри. Ни бу? [ видео ] впервые появилась Tatar Today - татар яңалыклары..

Туй көнне яшь килен чишмәдән көянтә белән су алып кайта. Йоламы бу әллә… [видео]

kadria — Tue, 28 Jul 2020 17:39:55 +0000

// Татар тудей // Татар Бүген //

Кешенең үз гомерендә иң олуг һәм күркәм бәйрәмнәрнең берсе – туй. Бу бәйрәмне матур, зәвыкь, кызык һәм башкалар кызыгырлык күңелле итеп үткәрү өчен бик күп көч түгәргә кирәк. Кияү белән кәләшнең бәйрәме булганга, моның барысы да алар өстенә төшә. Нәрсә алырга, ничек каршыларга, ни сөйләргә, йоласы ничек? Бу сорауларның барысына да алдан ук җавап табып, әзерләнеп куелса, туйлар гөрләп үтә.

Туй көнне көянтә белән суга төшү йоласы күпчелек авылларда күзәтелә. Килен үзе алып килгән көянтә-чиләкләре белән чишмәгә суга бара. Әлбәттә инде, барлык яшьләр дә гармунга кушылып җырлый-җырлый килен белән баралар. Чишмә буенда килен үзенең бүләген калдыра. Ул чиләктәге суны түкмичә алып кайтырга тиеш. Әгәр чиләктәге су түгелмәсә, килен дә, кияү дә уңган була.
Судан кайткач, кияүнең әнисе һәм килгән кунаклар килен алып кайткан чишмә суын бәялиләр. Шуннан соң кунакларга чәй куялар.

Видео Рәсим Фәсихов инстаграм битеннән

Запись Туй көнне яшь килен чишмәдән көянтә белән су алып кайта. Йоламы бу әллә… [видео] впервые появилась Tatar Today - татар яңалыклары..

Татар милләте бетүенә ничә ел калды? [таймер куелган]

Алсу Мансурова — Sat, 25 Jul 2020 18:32:01 +0000

//Татар Тудей// Татар Бүген//

Интернетта татар милләтенең “инкыйразы”на кадәр калган вакытны күрсәтүче сайт эшләп китте. Таймер буенча, бүгенге көндә “инкыйраз”га кадәр 83 ел калган.

Сайт Казанның “Теория” креатив агентлыгы тарафыннан әзерләнде. 2020 елның 25 июленә татар милләтенең “инкыйразына”, ягъни бетүенә кадәр 83 ел да, 5 ай калган. Әлеге саннарны Гаяз Исхакыйның “200 елдан соң инкыйраз” (“Исчезновение через 200 лет”) әсәре нигезендә билгелиләр.

Исхакыйның шушы антиутопиясе 1903 елда языла. Автор соңгы татар кешесенең Казанда 2103 елда үлүен сурәтли. Мондый фаҗиганең төп сәбәпләре арасында Исхакый татарларның заман белән бергә атларга теләмәвен, консерватизмын атый.

2010 елгы халык санын исәпкә алу мәгълүматлары буенча, 8 ел эчендә (2002-2010) Россия Федерациясендә татарлар саны 200 меңнән артык кешегә кимегән, ә татар телен белүчеләр саны 1 млн. га кимегән.

Чыганак:idel.realii

Запись Татар милләте бетүенә ничә ел калды? [таймер куелган] впервые появилась Tatar Today - татар яңалыклары..

Гаҗәп бу, аның шигырьләрен Җәлилнеке дип бастырганнар, Шиһап Нигъмәтинең шигырьләр китабы серләр ача [видео]

Alfia — Sun, 22 Mar 2020 20:25:17 +0000

// Татар Тудей // Татар Бүген //

18 март Казанның Милләт йортында Мәскәүнең Татар Штабы мөһаҗирлектәге татар журналисты, шагыйрь һәм җәмәгать эшлеклесе Шиһап Нигъмәтинең “Әй, татарым, әй, син — җаным!” исемле шигырьләр китабын тәкъдим итү кичәсен үткәрде. Анда без булып, кызыклы чыгышларны видеога яздырып сезгә җиткерергә булдык. Муса Җәлил турында да кызыклы, башка төрле мәгълүмат ишетә аласыз, милли җанлы, мәшһүр татар шәхесләрен җыйган иде бу чарага Татар Штабы.

Запись Гаҗәп бу, аның шигырьләрен Җәлилнеке дип бастырганнар, Шиһап Нигъмәтинең шигырьләр китабы серләр ача [видео] впервые появилась Tatar Today - татар яңалыклары..

Айдар Галимов Казанда балачак хыялларын ачты. Вәсилә Фәттахова, Миңгол Галиевлар аңа рәхмәтлеме? [видео]

Габдулла Тукай — Tue, 03 Dec 2019 08:28:12 +0000

// Татар Тудей // Татар Бүген // Автор Алсу Әхмәт видео һәм фотолары //

28-29 нчы ноябрь һәм 4 декабрь Казан Филармониясендә Татарстанның һәм Башкортстанның халык артисты Айдар Галимовның “30 ел бергә” дип исемләнгән юбилей концертлары уза. Ноябрь азагында узган тамашаларында җырчы сәхнәдән тамашачыга балачак сер-хыялларын сөйләде, иҗатташ дусты, мәрхүм Вәсилә Фәттахованы искә алып җыр башкарды һәм үз остазы Миңгол Галиевның хыялын да тормышка ашырды.

Юбилей сезон концертында яңа җырлар элекке җырлар белән үрелеп барды. Айдар Галимов “иске” җырларын башкарыр алдыннан, җыр белән бәйле берәр тарих та сөйләп, тамашаны үзенчә, Айдарча алып барырга тырышты.

“Хәзер ул балалар үсеп җиткәннәр инде. Яныма килеп “Айдар абый, рәхмәт. Нәкъ бу җыр чыкканнан соң миңа шушы исемне кушканнар”, дип әйтеп рәхмәтләр укыйлар”, дип сөйләде җырчы “Илүзәм” җыры турында.

Тамашачы концерт вакытында көлеп тә, моңланып та алды. Арабыздан яшьли китеп барган Вәсилә Фәттаховага багышланган номер башлангач, залда, күз яшьләрен тыя алмаганнар да күрендә. Мондый күренеш аңлашыла да, чөнки Айдар Галимов сүз белән генә чикләнмичә, видео мөмкинлекләрен кулланып, Вәсилә Фәттахова белән бергә “Ялгыз миләш” җырын башкарды.

Концерт карарга танылган кешеләр дә килгән иде. Әлфия Авзалованың кызы Зөлфия Авзалова Татар Тудейга Айдар Галимовның концертларына гел йөрим дип белдерде.

“Айдар белән таныш булуыма горурланам. Ул гомер буе чын күңеленнән үз эшен башкара. Аның җырларының һәрберсе тирән мәгънәле. Сәхнәдән сүз сөйләгәндә дә, аның һәр чыгышы уйландыра торган. Менә шул ошый миңа, чөнки мин бер концерт эчендә төрле хисләр кичерәм. Әниләргә багышлап җыр башкарды-мин еладым. Ул җырдагы сүзләр дөрестән дә уйга сала тамашачыны”, ди Зөлфия ханым.

Казанда бу кичне халык Айдар Галимовның хыялын да белде. Популяр татар-башкорт артисты балачактан кинога төшергә хыялланган икән. Концертның бер өлеше нәкъ менә шул хакта иде. Совет заманының легендар фильмнарыннан алынган өзекләрдә, Айдар Галимов үзе дә актерлык осталыгын күрсәтеп күренеп алды. Шулай итеп, җырчы “Любовь и голуби” киносындагы төп герой Василийны уйнап күрсәтте. Халык рәхәтләнеп көлеп, Галимовның осталыгына тагын да сокланып кул чапты. “Неуловимые мстители” киносын беренче тапкыр күргәч, мин әлбәттә шулар янына килеп эләгергә хыялландым. Кызганыч, ул чагында режиссер очрамады юлымда”, дип сөйләде халыкка Айдар Галимов.

Җырчының хыялы әлегә тулысынча чынга ашмаса да, Айдар Галимов тамаша вакытында, үзе дә шуны сизмичә, остазы Миңгол Галиевның хыялын тормышка ашырды. Миңгол ага сәхнәгә менеп шәкерте турында сүз сөйләгәндә, аны беренче тапкыр ничек Казанга укырга чакырганын искә төшерде.

“Син шулкадәр матур җырлыйсың, бәлки Казанга керерсең укырга дигәч, “Юк, Миңгол абый, мин юрист булам”, дидең. Айдар, син гомерем буе кинода төшергә хыялландым дидең, ә менә мин гомерем буе укытам да укытам. Иң зур хыялым шул иде “И, Ходаем, мине берәр шәкертем үз концертында җырлатсын иде”, дип теләдем!”, диде Миңгол Галиев. Чыгышының азагында Миңгол ага үз хыялын тормышка ашырды. Шәкертенә багышлагандай “Туган җиремә” дигән җырны башкарды. Халык дәррәү күтәреп алкышлады.

Галимов концерт тәмамланыр алдыннан тугъры тамашачысын, замана агышына артык бирешмичә, булган рухи кыйммәтләрне сакларга чакырды. Шушы киңәш итеп әйтелгән сүзләр тамашачы күңеленә дә хуш килүен ишеттек.

“Әлеге концерттан соң якты хисләр белән кайтып китәм. Айдар абыйның иҗаты белән балачактан ук таныш. Казанга килүен көтеп торам. Бүген бигрәк тә әти-әни турындагы җыр уйларга мәҗбүр итте. Айдар абыйның, вакытның бик тиз үтеп китүе, аны туктатып булмавы турында сөйләве дә үзенә күрә бер уйга салды”, диде сөйләде татар-тудейга Земфира Җиһаншина исемле тамашачы.

Концерттан соң, гадәттәгечә, җырчы халык янына чыгып, фотога төште, автографлар таратты. Тамашачы исә яраткан җырчысын озак вакыт җибәрми торды, һәрберсе аерым килеп Айдар Галимовка рәхмәт сүзләрен әйтеп, киләчәккә теләкләр теләп калды.

Айдар Галимовка — 30? [фоторепортаж]

Запись Айдар Галимов Казанда балачак хыялларын ачты. Вәсилә Фәттахова, Миңгол Галиевлар аңа рәхмәтлеме? [видео] впервые появилась Tatar Today - татар яңалыклары..

Татар-мишәрләр ничек сөйләшә? Татарча сөйли башласа каян булуын белеп була [видео]

Габдулла Тукай — Mon, 14 Oct 2019 23:24:55 +0000

Иртә, көндез, кич, 24 сәгать буе татарча яшәүче милләттәшләребез һәркайсы үз диалекты белән сөйләшә. 3-4 сүз әйтүгә ул татар кешесенең кайсы районнан, төбәктән булуын әйтеп була.

Азатлык төшергән әлеге видео моңа дәлил, телебез бик бай! Камал театры артисты Миләүшә Шәйхетдинова аша үзебезне Татарстанның, Русиянең, дөньяның төрле почмакларында яшәүче дус-туганнар, милләттәшләр белән сөйләшкәндәй хис итеп алыйк.

Чыганак: Чит ил агентлыгы видеосы

Запись Татар-мишәрләр ничек сөйләшә? Татарча сөйли башласа каян булуын белеп була [видео] впервые появилась Tatar Today - татар яңалыклары..

Илсөя Бәдретдинова Мәскәүдә: “Чишенеп сәхнәгә чыгыгыз дигән сүз…” [видео]

Габдулла Тукай — Mon, 14 Oct 2019 19:28:32 +0000

Танылган җырчы Илсөя Бәдретдинова яшьләргә татар телендә үзләре теләгән материалны бирмәсәк, алар рус, чит ил эстрадасын, башка милләтне тыңлаячаклар дигән фикердә. Татар телендә дә егет-кызларны җәлеп итәрлек иҗат булсын ди җырчы. “Чишенеп сәхнәгә чыгыгыз дигән сүз түгел бу, әмма элекке рамкалардан чыгарга вакыт”, дип белдерә Илсөя Бәдретдинова Мәскәүдә.

“Атказанмаган” артист Илсөя Бәдретдинованың узган ел ноябрь аенда Мәскәүдә зур концерты була. Без “Татар Штабы” видеосы аша узган елгы концертны һәм Илсөя Бәдретдинова фикерләрен тәкъдим итәргә булдык.

2019 елда исә Илсөянең Мәскәүдә концерты 17 ноябрьдә “Космос” залында узачак.

View this post on Instagram

A post shared by Ильсия Бадретдинова (@ilsiiabadretdinova)

Запись Илсөя Бәдретдинова Мәскәүдә: “Чишенеп сәхнәгә чыгыгыз дигән сүз…” [видео] впервые появилась Tatar Today - татар яңалыклары..

Марат Шәйбәков белән Әнвәр Нургалиев дуслармы? Җырчы булганчы ул кем була? [видео]

Лейла — Thu, 12 Sep 2019 14:54:04 +0000

//Татар Тудей//

Башкортстанның атказанган артисты Марат Шәйбәков Татар Тудейга Казанда кайсы концерт залы ошавын, Татарстанның кайсы районнарын аеруча истә калдыруын сөйләде. Якташы, танылган җырчы Әнвәр Нургалиевның юбилеенда нигә ул булмавын да әйтте. “Сез дуслармы?” дигән сорауга да җавап бирде. Ә сүзне без тиздән башланачак гастрольләреннән башладык.

— Марат быел да Татарстанга киләсез дип күрдек, кайларда буласыз?

— Киләм, 16 октябрьдә. Узган ел Ленин мәдәният йортында куйган идек, быел да шунда булачак. Концертларны тора-бара Казанның Филармония залында куярга исәп.

— Башкортстанда да гастрольләрегез барамы?

— 25, 26, 27 октябрьдә Уфа шәһәрендә өч концертым булачак. Аннары Баулыдан соң янә Башкортстан буенча йөриячәкбез. Себер якларына да барырга ниятләп торабыз.

— Төркемегез яңартылдымы? Чибәр кызларны каян табасыз?

— Төркем шул ук, биючеләр яңартылып тора. Кызларны кастинг аша сайлыйбыз.

— Репертуар ничек, яңа җырлар булачакмы?

— 7-8 яңа җыр эшлим. Айдар Тимербаевтан бер җыр алдым. Аранжировкасын эшләдем, тавыш яздырасы бар. Бик матур җыр килеп чыкты. Үзебез дә язабыз, тегеннән дә алабыз – шулай эшлибез инде. Хәзер җыр сайлавы бик авыр. Алып карыйсың – матур кебек, җырлап карыйсың – бөтенләй туры килми. Алдың да, эшләп китте дигән сүз түгел. Җыр күңелгә ятмаса, җырламыйм.

— Татарстан белән Башкортстанда концерт куюның нинди үзенчәлеге бар?

— Бәләкәй чакта йокларга яткач, әти Казан радиосын куша иде. Ул нинди радио булгандыр, хәтерләмим. Без ике сәгать шул радионы тыңлый идек. Ул вакытта Казан минем өчен әллә кайда еракта сыман иде. Хәзер Казанга бакчага чыгып кергән кебек кенә кайтам. Мин бит килеп җырлыйм да, кайтып китәм. Төнлә йокы килсә, туктап чәй эчеп алам.

— Татарстанның кайсы районы аеруча истә калды?

— Берсен дә аерып әйтәсе килми. Бөтен җирдә дә әйбәт каршы алалар. Азнакайлылар бәлешләр пешереп алып килгәннәр иде. Былтыр Чаллы, Түбән Камада булган идем, тагын да күбрәк районга чыгарга исәп. Быел тальян белән дә җырлыйсы иде.

View this post on Instagram

A post shared by Марат Шайбаков (@maratshaibak)

— Җырчы булмасагыз, кайсы һөнәр иясе булыр идегез?

— Бәләкәйдән үк, артист булам дип иншалар яза идем. Башка бер нәрсә дә килми иде. Бәләкәйдән үк гармун уйнап үскәч, баянчы булырга хыялландым. Филармониядә эшли башлагач, җырлап карадым да, халык дәррәү кул чапты, тагын җырлавымны сорадылар. Ул вакытта алып баручы Марат Кәбиров «Аның бүтән җыры юк» – дигәч, «уянып» киттем.

— Сез хәзер Уфада Филармония артистымы?

— Юк, мин үземә – үзем артист. Филармонидә бик күп еллар баянчы булып эшләдем. Фән Вәлиәхмәтов, Кәтүк бабай (“Кызык мәзәк төркеме”), Ризван Хәкимовларга уйнадым.

View this post on Instagram

A post shared by Марат Шайбаков (@maratshaibak)

— Әнвәр Нургалиев белән сез дуслармы? Төрле сүзләр йөри башлады, көнләшмисезме дип тә сорадылар…

— Электән үк бергә. Без дошман түгел. Гаиләләр белән дусларның туган көннәренә йөрибез. Әлегә бер-беребезнең концертларда чыгыш ясарга уйламыйбыз. Һәр кешенең үз эше бит, гастрольләр дигәндәй.

— Аның Уфада узган юбилеенда да булмадыгыз кебек..

— Юк, Себердә гастрольдә булдым. Әнвәр белән без дуслар, барсы да тәртиптә, конфликт булганы юк.

View this post on Instagram

A post shared by Марат Шайбаков (@maratshaibak)

Запись Марат Шәйбәков белән Әнвәр Нургалиев дуслармы? Җырчы булганчы ул кем була? [видео] впервые появилась Tatar Today - татар яңалыклары..