Архивы файдалы киңәшләр - Tatar Today - татар яңалыклары.

“Чәчләр коелмасын өчен нишләргә?” – файдалы киңәш

Alina — Sat, 04 Apr 2020 16:49:06 +0000

Чәч коелуга килгәндә, бүген Җир шарында яшәүче ир-атларның – 66, хатын-кызларның 38 проценты чәч коелудан интегә икән. Рәсми саннар шул хакта сөйли.

Мария Александровна (югары категорияле табиб—трихолог, IAT халыкара трихологлар ассоциациясе әгъзасы) сүзләренә караганда, көненә 100 – 105 чәч бөртеге коелу норма санала. «Чәчләр чамадан тыш коеламы-юкмы икәнлекне төгәл ачыклау өчен, кичекмәстән табиб янына барырга кирәк. Үзлегеңнән диагноз куеп дәвалану – зур хата», – ди белгеч. Чәч коелуның сәбәпләрен өч төркемгә бүлеп карый ул. Беренче төркемгә сәламәтлек ягыннан үзгәрешләрне (калкансыман биз эшчәнлеге бозылу, гипофиз, кызылча авырулары, гемоглобин түбән булу, химия терапиясе алу, йөклелек) кертергә мөмкин. Чәч коелуга физиологик сәбәпләр (стресс, курку хисен җиңә алмау, дөрес тукланмау) да этәргеч була ала. Яшәү рәвешенең дә (организмда А витаминының чамадан тыш күп булуы, Д витамины, аксым җитмәү, аз хәрәкәтләнү, чәчләрне даими рәвештә бөдрәләтү, турайту) йогынтысы зур.

Күпләр чәч коелуны ел фасылына бәйләп карарга ярата. Таякның авыр башы гадәттә, кышка төшә. Салкын кышкы көннәрдә чәчләр көчсезләнә, коела башлый дип уйларга күнеккән без. Мария Богданова болай фикер йөртүне уйдырма дип атый. Тәҗрибәле трихолог сүзләренә караганда, чәчләр еш кына организмга витаминнар җитмәгәнлектән коела. Кыш ахыры – яз башы исә витаминнарга, аеруча D витаминына кытлык чоры. Шуңа күрә бу чорда күпләр чәч коелудан зарлана. Белгеч чәчнең баш кавыклау аркасында коелуын да уйдырма дип атый.

– Әмма бу очракта бер искәрмә бар. Чәчләр, баш тиресе һәрчак чиста булырга тиеш. Бүген халык арасында аеруча популяр булган каты, коры, парабенсыз, сульфатсыз шампуньнар аларны чистартып бетермәскә дә мөмкин. Нәтиҗәдә, баш тиресенең чистарып бетмәгән урыннары, бозылып, кавыклый башлый. Ахыр чиктә чәч тә коела. Болар бар да «себорейный дерматит» дигән диагноз куелуга сәбәп була, – ди табиб.

Чәч турында сүз кузгалтуга, тагын бер бәхәсле сорау калкып чыга. Чәчләрне еша юаргамы? Белгечләрнең бер төркеме: «Башны еш юу зыянлы», – дип кисәтсә, икенче берләре исә аны көн саен юсаң да куркыныч түгел, дип ышандыра. Мария Богданова икенче төркем фикерен куәтли. «Чәчне атнага фәлән тапкыр гына юарга ярый дигән чикләү юк. Аны күпме кирәк, шулкадәр юарга мөмкин. Көн саен юынып торабыз бит. Шуның кебек, әгәр баш тирегез даими рәвештә чистартып торуны таләп итсә, көн саен чәч юуның да зыяны юк», – ди ул.

Чәчләр һәрчак матур булып балкып торсын, коелып тилмертмәсен өчен, түбәндәге киңәшләрне истә тотарга кирәк, ди Мария Богданова:

Чәчләр һәрчак коелып, яңарып торырга тиеш. Бу – гадәти күренеш. Әмма чәч коелуның да чамасы бар. Әйткәнемчә, көненә 100 – 105 чәч бөртеге коелу норма санала.

Чәчләр һәрчак матур булып балкып торсын өчен, иң элек дөрес тукланырга, сәламәт тормыш алып барырга кирәк. Организм даими рәвештә аксым, май һәм углеводлар белән тәэмин ителергә тиеш.
Чәчләрне җылымса су белән юарга кирәк. Су температурасы уртача 37 градус булырга тиеш.
Чәчне нәкъ менә сезнең баш тиресенә туры килгән шампунь белән генә юыгыз. Каты шампунь яратучыларга аны 1/1 катнашмасында су белән болгатып сөртергә киңәш итәр идем. Чәчкә махсус бәлзәм, сывороткалар тидерү дә файдалы.
Чәчләр өчен төрле майлар да әйбәт. Әмма аларны чәчнең төбенә тидермичә сөртергә кирәк. Майлар баш тиресенә эләксә, күзәнәкләр тыгылып, дерматит башланырга мөмкин.
Чәчләрне зур тешле агач тарак белән көнгә берничә мәртәбә тарау яхшырак.
Чәч үссен өчен аның очларын кисеп торырга кирәк, диючеләр ялгыша. Чәчнең үсү-үсмәве фәкать аның тамырына гына бәйле.

Чәчләрне ничек тәрбиялисез?

Гөлчирә НӘҖМЕТДИНОВА, үләннәр белән дәвалаучы (Арча районы, Наласа авылы):

– Чәч коелганда аны элек-электән кычыткан суы белән юалар. Атнага ике-өч мәртәбә чи кыяр согы белән юып чайкау да файдалы. Чәч төпләренә каен җиләге согы да сөртергә була. Ул шулай ук аларны коелудан саклый. Чәч үссен өчен баш тиресенә аракы тидерсәң дә яхшы. Чәчне ат кузгалагы яфрагы, сабакларыннан әзерләнгән төнәтмә ярдәмендә чайкарга да мөмкин. Чәч коелуны булдырмау өчен сырганак җимешләре, солы боткасы һәм төелгән фундук чикләвеген бергә болгатып ашарга кирәк. Түбәндәге төнәтмәнең дә файдасы тимичә калмас. Аның өчен 5 аш кашыгы юкә чәчәген ярты литр кайнар суга салып, утны кысып куеп, иң элек ике минут кайнатырга кирәк. Аннары шуны ярты сәгать төнәтергә һәм шул төнәтмә белән чәчне чайкарга, чәч төпләренә сөртергә кирәк.

Ильмира НӘГЫЙМОВА, җырчы:

– Чәчләрне тәрбияләү – иң яраткан шөгылем. Составында сульфат, парабеннар булмаган профессиональ шампуньнарга өстенлек бирәм. Гади шампуньда селте күп булганга, ул чәчне нык корыта. Чәчемне көнаралаш юам. Атнага ике тапкыр профессиональ маска ясыйм. Әмма аны чәч төбенә сөртергә ярамый. Ул аның төбенә 10 – 15 см чамасы килеп җитмәскә тиеш. Юкса чәч майлы булачак. Чәчне югач, махсус спрейлар сиптерәм, очлары өчен май сөртәм. Язга таба чәчләрем коела башлый. Андый чакта витаминнар эчәм.

Ә сез белә идегезме?

Һәр чәч бөртеге 14 төрле элементтан тора. Шуларның берсе – алтын.
Җир шарындагы иң озын чәч иясе – ир-ат. Ул Вьетнамда яши. 31 ел эчендә чәчен бер тапкыр да кисеп карамаган әлеге көчле затның чәч озынлыгы бүген 6 метрдан артып китә.

*Хатын-кызларның чәч бөртеге ир-атныкы белән чагыштырганда ике тапкыр юкарак.

Чәч коелган урында яңа чәч үсә. Гомер буенча бер урында 20 тапкыр яңа чәч бөртеге үсәргә мөмкин.
1 бөртек чәч 100 г авырлыктагы әйберне тотып тора ала. Кеше башында 100000 чәч бөртеге булуын исәпкә алсаң, чәчкә ике фил бәйләп куйсаң да, ул чыдаячак.

Абау!

— Коры чәчне йомырка белән юарга ярамый. Чөнки аксым баш тиресен бик нык тарттыра. Ә менә кефир чәчләргә, киресенчә, файдалы. Әмма аны мунчага кергәнче сыларга киңәш ителә. Эсседә ачы сөт бактерияләре һәлак була. Кефирлы масканы өй шартларында башыгызны артык җылытмыйча эшлисез икән, ул бөтен файдалы үзлекләрен саклаячак. Моның өчен майсыз кефирны җылытып, чәчкә сылыйбыз да башка полиэтилен киеп куеп, сөлге урыйбыз. Ярты сәгатьтән чәчне шампунь белән юабыз. Чәч коелудан тилмерүчеләр исә түбәндәге масканы ясап карый ала. Ярты стакан кефирны җылытып, бер чәй кашыгы бал салып болгатабыз. Чәчкә сылап, шулай ук полиэтилен киеп куябыз да сөлге урыйбыз. Бер сәгатьтән юабыз.

— Баш кавыклаудан интегүчеләр дә масканы кул астындагы әйберләрдән ясый ала. Андый чакта суган, сарымсак һәм лимон ярдәмгә киләчәк. Беренче масканы ясау өчен уылган бер баш суганга 2 аш кашыгы аракы һәм 1 аш кашыгы кастор мае кушып болгатырга кирәк. Икенче төр масканы ясау өчен уылган бер тырнак сарымсакка 100 г җылытылган әрекмән мае кушасы. Өченче маска 4 аш кашыгы зәйтүн маена 1 аш кашыгы лимон согы кушып ясала. Бу маскаларны башка сылаганнан соң, полиэтилен пакет киеп, бер сәгатьтән соң гына юып төшерергә кирәк.

Мәгълүмат Ватаным Татарстан

Запись “Чәчләр коелмасын өчен нишләргә?” – файдалы киңәш впервые появилась Tatar Today - татар яңалыклары..

Петунияне ничек үстерергә?

Alina — Sat, 21 Mar 2020 05:00:41 +0000

Бу матур чәчәкләрне үстерү, тәрбияләү түземлек һәм зур игътибар таләп итә. Чәчәкләрне орлыктан үстерү җиңел эш түгел, һәркайсының үз сере бар.

Мәсәлән, петуния һәм флокс орлыклары бик вак һәм аларны үстерү зур түземлек таләп итә. Бу орлыкларны алдан әзерләнгән җиңел, дымлы туфрак өстенә берәмләп салып чыгарга һәм сак кына пульверизатордан су сиптерергә кирәк.

Өстен пленка яисә пластмасса контейнер капкачы белән каплап, якты урынга куегыз. Көн дә иртән өстен ачып җилләтергә, капкачка җыелган конденсатны тазартырга онытмагыз.

Орлыклар шытып чыккач та өстен ачып куярга ашыкмагыз, үсентеләр ике атна чамасы капкач астында үсәргә тиеш. Тик әледән-әле җилләтеп һәм су сибеп торыгыз.

Мәгълүмат Кызыл таң

Запись Петунияне ничек үстерергә? впервые появилась Tatar Today - татар яңалыклары..

Кандагы холестиринны ничек киметергә? [файдалы киңәш]

Алина — Sun, 03 Mar 2019 08:04:55 +0000

Атеросклероз – холестеринның күплеге белән бәйле тамырлар авыруы, яисә кан тамырларыныӊ үткәрү мөмкинлеге кимүе. Бу авыру яшь бару белән үзен нык сиздерә.

Кандагы холестеринны киметү өчен нишләргә кирәк? Иң элек, көнлек ашаудагы майны 30 процентка кадәр киметергә, күбрәк яшелчә, җиләк-җимеш ашарга, ит һәм яшелчәләрне кыздырып түгел, томалап пешерергә киңәш ителә. Күбрәк хәрәкәтләнү дә холестеринны юк итә.

Шулай ук тәмәкенең кандагы холестеринны арттыруын да онытмаска кирәк.

Организмдагы холестеринны киметү өчен диетагызны витаминга бай ризыклар белән тулыландырыгыз. Организмга калий, магний элементлары керсен өчен җиләк-җимеш, яшелчә белән туклану файдалы. Чөнки алар антиоксидантлар чыганагы, алар организмның ялкынсынуын киметәләр, кан тамырларын киңәйтеп кан әйләнешен яхшырталар.

Калийга бай банан инсультка каршы иң яхшы профилактика. Галимнәр раславынча, калийсыз туклану рационы инсульт барлыкка килү куркынычын 30 процентка кадәр күтәрә.

Көненә 2-3 банан һәм бер уч кара җимеш организмны тиешле дәрәҗәдә калий белән тәэмин итә.

Магний һәм кальций булган ризыкларны бергә куллану да яхшы. Мондый катнашлык артериаль кан басымын һәм инсульт булу куркынычын киметә. Кара фасоль, шпинат, палтус, сөт куллану да тик файдага гына булачак.

Организмдагы тозны киметү өчен аны куллануны чикләү мөһим. Моның өчен рационга эшкәртелгән продуктларны кертмәгез, чөнки аларның 80 проценты тоздан тора. Безгә тозлы булып тоелмаган продуктлар составында, гадәттә тоз күбрәк булучан. Инсультны профилактикалау юнәлешендә консерваланып эшкәртелгән продуктлардан бөтенләй баш тартырга кирәк.

Барлык очракларда да табиблар белән киӊәшләшергә кирәк, үз белдегеӊ белән сәламәтләнү башка органнарга зыян салырга мөмкин.

Чыганак: Хезмәт

Запись Кандагы холестиринны ничек киметергә? [файдалы киңәш] впервые появилась Tatar Today - татар яңалыклары..

Каз маеның без белмәгән файдасы [киңәш]

Алина — Fri, 01 Mar 2019 17:14:15 +0000

Каз мае табигый дәвалау продукты булып санала. Аны халык медицинада түбәндәге үзлекләре өчен киң кулланалар

Каз маеның составындагы файдалы компонентлар:
1. Май кислоталары. Организмның су балансын җайга сала; липидларның үтеп керүен арттыра, ә бу үз чиратында косметик чараларның тән тиресенә тизрәк сеңүенә китерә; тиредәге яраларның төзәлүенә ярдәм итә;
2. Селен. Матдәләр алмашын көйли, аерым алганда аксымнар һәм углеводларны үзләштерүгә ярдәм итә; йод үзләштерүне яхшырта;
3. Холестерин. Күзәнәкләрнең нигезе булып санала, Д витамины тупланышында катнаша;
4. Е витамины. Иммун системасын ныгыта, коллогенны синтезлый; күзәнәкләрне зарарланудан саклый.

Каз мае белән түбәндәге авырулардан дәваланып була:

Бронхит. Озакка сузылган ютәлдән котылу өчен, каз маен кыргычтан чыгарылган суган белән бутарга һәм ашар алдыннан бер аш кашыгы кабул итәргә. Шушы ук катнашманы төнгә күкрәк өлешенә сөртергә була. Нәтиҗәсе өч көннән үк күренәчәк.

Туберкулез. Әлеге чирдән арыну өчен, эретелгән каз маена алоэ согы, какао, вакланган эрбет чикләвеге кушып болгатырга һәм парда җылытырга кирәк. Көнгә дүрт тапкыр, сөт белән бер кашык әлеге катнашманы кабул итәргә кирәк. Уңай үзгәрешләр бер атнадан соң күренәчәк.

Үпкә ялкынсынуы. Эретелгән каз мае һәм сарымсактан ясалган катнашманы җылыталар һәм пергаментка сөртәләр. Кәгазьне күкрәккә куялар, өстеннән җылы шарф ябалар һәм төнгә шулай калдыралар. Бер атналык курстан соң уңай нәтиҗә күренергә тиеш.

Өшү. Тәннең өшегән өлешләрен каз мае белән сөрткәнче, җылы су белән тиренең сизгерлек сәләтен кайтарырга кирәк. Чәнчү беткәннән соң, аяк-кулларга массаж хәрәкәтләре белән каз мае сөртәләр. Җылы кием кияргә яки җылы шарф белән уранырга кирәк.

Экзема. Тире проблемаларыннан котылырга каз һәм пихта маеннан ясалган мазь (2:1) ярдәм итәр. Тиренең зарарланган урыннарына көнгә берничә мәртәбә сөртергә кирәк. Дәвалау курсы – 20 көн, бу вакытта тиредәге җәрәхәтләр төзәлә.

Ревматизм. Арка авыртканда мунчада, арканы каз мае белән ышку ярдәм итә. Тән җылыну нәтиҗәсендә ярдәме бермә-бер артачак. Процедурадан соң җылы урында төренеп ятарга кирәк. Берничә сенастан соң ревматизм узарга тиеш.
Мускулларда авыртулар. Тәндә авыртулар борчымасын өчен, авырту булган урыннарга май, бал һәм спирт төнәтмәсе белән массаж ясыйлар. Әлеге катнашманы куллану тиредәге тозларны чыгарырга, кан әйләнешен яхшырта, капиллярларны ныгыта.

Аналыктагы авырулар (эрозия). Эретелгән каз мае һәм тырнак гөл төнәтмәсе белән универсаль сыекча ясыйлар. Ун көн дәвамында шушы төнәтмәдә чылатылган тампонны, төнгә аналык җиңсәсенә куеп калдыралар. Ун көн саен аралаштырып, рәттән өч курс эшләргә кирәк. Бу вакыт эчендә яра төзәлә.

Балага уза алмаганда каз мае, алоэ яфраклары, бал һәм сырганак мае белән катнашма ясарга кирәк. Төнәтмәне көнгә өч мәртәбә бер кашык җылы сөт белән эчәргә. Әлеге дару хатын-кызларда аналык көпшәсен чистарта һәм ир-атларда сперматозоидларның активлыгыны арттыра.

Простатит. Әлеге авыруны, каз мае, вакланган сарымсак, бал һәм каланхоэ согы төнәтмәсен кабул итеп дәваларга була. Катнашманы иртән һәм кич ач карынга бер аш кашыгы эчәләр. Ике атналдан соң кече йомышны үтәгән вакыттагы авырту бетәргә тиеш. Тулысынча дәвалану өчен төнәтмәне 30 көн дәвамында кабул итәргә кирәк.
Куллану алдыннан табиб белән киӊәшләшү сорала

Хезмәт

Запись Каз маеның без белмәгән файдасы [киңәш] впервые появилась Tatar Today - татар яңалыклары..

Биттәге җыерчыклардан һәм бетчәләрдән ничек котылырга? [киңәш]

Алина — Wed, 27 Feb 2019 11:22:03 +0000

Битне тарттыру, җыерчык һәм сыткылардан котылу, битнең төсен матурайту, ялкынсыну процессларын кисәтү өчен әлеге битлекне кулланырга була.

25 гр төссез кынага (хна буявы) 2 аш кашыгы зәйтүе мае салып, бертөрле масса хасил булганчы болгатыгыз. Биткә түгәрәк хәрәкәтләр белән сөртегез дә 10 минут көтегез. Аннары су белән юып төшерегез. Әлеге битлек 1-2 атнага җитә.

Банан да җыерчыклардан һәм бетчәләрдән котылырга булыша. Өч кенә ингредиенттан торган әлеге битлек тә биткә икенче сулыш бирә. Бик тиз эшләнә дә. Бер бананны изеп, 1 аш кашыгы каймак һәм йомырка сарысы кушып, әлеге катнашманы биткә сөртегез. Битлекне биттә 10-15 минут тотып, җылы су белән юыгыз.

Чыганак: Акчарлак газетасы сайты

Запись Биттәге җыерчыклардан һәм бетчәләрдән ничек котылырга? [киңәш] впервые появилась Tatar Today - татар яңалыклары..

Теш сызлауны басарлык 7 киңәш

Алина — Sun, 24 Feb 2019 08:20:00 +0000

Их ул теш сызлаулары… Йөрәккә тия, үзәккә үтә торган нәрсә! Элек борынгылар кемгәдер бик ачулары килгәндә “Тешең сызласын!” – дип юкка гына әйтмәгәндер.

Табибка барганчы авыртуны ничек басарга, иртәнгә кадәр ничек түзәргә дигән сорау һәркемне борчырга мөмкин. Бу уңайдан берничә киңәшкә колак салыгыз.

1. Теш сызлавын гап-гади канәфер белән басарга мөмкин. Аны авырткан теш белән чәйнәп, уртка кысарга кирәк. 15 минуттан авырту басылырга тиеш.
2. Авыз куышлыгын ромашка, эвкалипт, шалфей, бөтнек төнәтмәләре белән чайкауның да файдасы тия.
3. Теш сызлый башлауга чәй содасы һәм тоз кушылган (1 стаканга 1 чәй калагы сода һәм шулкадәр үк тоз) җылымса су белән авызыгызны яхшылап чайкатыгыз.
4. Пихта, камфора, канәфер маена мамык яисә марляны манып, 15 минутка сызлаган тешкә куярга кирәк.
5. Эвкалипт, валериан яисә прополисның спиртлы төнәтмәсе дә сызлауны басу үзенчәлегенә ия.
6. Прополисны авырткан тешкә сылап куйсагыз, ул ялкынсынуны баса.
7. Теш сызлавын ибупрофен, нурофен кебек дарулар да баса. Тик аларны еш эчәргә ярамый, кулланыр алдыннан инструкциясен яхшылап укыгыз.

Чыганак: Кызыл таң
Фото: limfouzel.ru

Запись Теш сызлауны басарлык 7 киңәш впервые появилась Tatar Today - татар яңалыклары..

Хуҗабикәләргә көндәлек тормышта файдалы 11 киңәш

Алина — Tue, 19 Feb 2019 16:21:29 +0000

Хатын-кызлар матурлыкка һәм чисталыкка омтыла. Хуҗабикәләргә көндәлек тормышта кирәк булган 11 киңәш тәкъдим итәбез.

1. Сумкагызда тәмсез ис барлыкка килдеме? Анда бер көн дәвамында кулланылмаган пакетлы чәй салып йөрегез.
2. Канализация торбаларын чистарту өчен тоз кулланыгыз. Аны торбага салыгыз һәм кайнаган су белән юдырып җибәрегез.

3. Үтүктәге кызган эзләрне нашатырь спирты һәм уксус катнашмасы бетерә. Йомшак чүпрәкне шул катнашмада чылатып, үтүкне сөртегез.
4. Яшелчә ашына лавр яфрагы, кара борыч һәм башка тәмләткечләр салмагыз. Иң яхшысы – яшел үлән, ул файдалырак та, тәмлерәк тә.
5. Ризык турый торган такталарны уксус салынган су белән чистартып торыгыз. Азык-төлекне идеаль чиста тактада кисегез.
6. Салатка үсемлек маен тоз, уксус һәм борычтан соң гына салыгыз. Исегездә тотыгыз: тоз майда эреми.
7. Кайнар компотны тизрәк суытырга кирәк булса, кәстрүле белән салкын су салынган зуррак кәстрүлгә утыртыгыз.
8. Карабодай боткасы тәмле булсын өчен, аның суы ярмадан ике тапкыр күбрәк булырга тиеш. Кәстрүлнең капкачын каплагыз. Ботканы башта тиз утта, аннары сүрән утта пешерегез.
9. Кайбер балыкларны пешергәндә тәмсез ис чыга. Андый очракта, балык янына петрушка, сельдерей салыгыз. Шулай ук суган да булыша.

10. Вазага берничә тамчы савыт-саба юа торган сыекча тамызсагыз, кыр чәчәкләре озаграк торыр.
11. Ваннаны агарту өчен: 2 аш кашыгы кальцийлы содага 2 аш кашыгы чәй содасы кушып, әлеге катнашманы ваннага сылагыз. Ул алдан чылатылган булсын. 5 минут тотканнан соң, шуның өстенә 50 грамм уксуска 50 грамм агарткыч (отбеливатель) кушып, сылагыз. Ярты сәгать тоткач юып алыгыз.

Чыганак: Кызыл таң
Фото: pedolimp.ru

Запись Хуҗабикәләргә көндәлек тормышта файдалы 11 киңәш впервые появилась Tatar Today - татар яңалыклары..

ТНВдагы “Мин” тапшыруыннан чәчтараш Илназ Кадыйров чәчләрне дөрес юарга өйрәтә

Гузель — Mon, 21 Jan 2019 14:31:47 +0000

ТНВ телеканалында баручы “Мин” тапшыруы аша күпләргә таныш чәчһәвәс, стилист Илназ Кадыйров үзенең Инстаграм битендә чәчләрне тәрбияләү буенча постлар урнаштыруын дәвам итә. Бу юлы ул хатын-кызлар һәм ир-егетләр өчен чәчләрне дөрес юу буенча киңәшләр биргән.

“Хөрмәтле хатын-кызларыбыз һәм дә мөхтәрәм ир-егетләр!

Чәчләрне юу гадәти күренеш булса да, төптәнрәк уйласак, бу гамәлнең дә безгә билгесез яшерен серләре бар. Шунысы сөендерә, матурлык өлкәсе алга бару сәбәпле, күп кенә җитешсезлекләр уңай борылыш ала. Без үз юнәлешебезне табабыз.

Бүген әйтер сүзем миф та, әкият тә түгел. Ә чынбарлык. Чөнки үзем, нәкъ шулай эшлим. Чәчләрне шампунь белән юар алдыннан 10 минут су белән юешләп торам. Мин бары сульфатсыз шампуньнар гына кулланам. Әгәр дә киңәшләремә моңа кадәр дә колак салган булсагыз, дымлы тән тиресе агулы матдәләрне канга үткәрми диеп сөйләгән идем инде.

Чәчләрне атнасына бер яки ике мәртәбә юган очракта, шампунь белән ике тапкыр юу киңәш ителә. Әлеге шартны үтәсәң озак кына чиста-пөхтә йөрергә мөмкин. Шулай ук, бальзам, кондиционерлар белән дуслыкны ныгыту, бары уңай нәтиҗәләргә генә китерәчәк.

Шәхсән мин, соңыннан салкын су белән чайкап алырга яратам. Салкын суның өстен якларына килгәндә, тәгаен шуны әйтер идем, ул чәч сабагын шомарта, кабыкларны яба, ялтырата һәм дә тыгызлата. Аеруча бөдрә чәчләрнең холкына нык тәэсир итә. Чәч төзелеше искәтмәле нык, күркәм сикертмә пружиналарны хәтерләтә. Үзем бөдрәләр хуҗасы булганлыктан ышандырып әйтә алам. Ваннадан чыкмый гына юеш чәчләргә май, крем сөртүнең дә зыянын күрмим. Иң мөһиме, мамык сөлгеләрне чыгарып ыргытырга. Чөнки алар, бу очракта, шактый дымны юкка чыгару вазифасын башкара. Ә бит күпләр, нәкъ менә, чәчнең корылыгына, рәте югалуына, икеләнүенә, сынуына зарлана.

Кыш көне, бигрәк тә, чәчләр магнитлана башлый. Димәк, безгә дым җитми. Хәзер исә, фатирларларда, эш бүлмәләрендә коры һава шартлары саклана. Чыннан да ягулык сезонында, тереклек ияләре коточкыч сусау белән яши. Мамык сөлгеләргә алмашка микрофибра тукымасын яки полителен башлыклар кулланырга мөмкин. Берәр сәгатьтән инде, чәчләр артык дымны сеңдереп тә бетерә. Алар кипкән, әмма коры түгел. Тотып карагач та, чәчләр арасында ниндидер сыекчалы савып чайкалып йөргән күк тоела. Бу чәч сабагының дым белән баетылганын аңлата. Мондый гамәлләрдән соң, нәкъ менә минем бөдрәләрем икенче сулыш алып, күркәм кыяфәткә кереп, ай үсәсен көн үсә башлады. Киңәшле эш таркалмас диләр. Уңышлар сезгә!”

View this post on Instagram

A post shared by Илназ Кадыйров (@ilnazkad)

Запись ТНВдагы “Мин” тапшыруыннан чәчтараш Илназ Кадыйров чәчләрне дөрес юарга өйрәтә впервые появилась Tatar Today - татар яңалыклары..

Иң сусыл алма, әфлисун, ананас сайлауның җиңел юллары

Гузель — Fri, 28 Dec 2018 15:49:03 +0000

Материалны Гүзәл Гыйбадуллина әзерләде //Тatar today//

Бу киңәшләр сезгә җиләк-җимешләрне дөрес сайларга, бәйрәмнәр узгач та аларны озак сакларга ярдәм итәчәк. Сүзебез ананас, әфлисун, алма, виноград һәм анар хакында

Ананас

Пешкән ананас овал формасында, төбе коры, сабаклары куе һәм 10-12 см озынлыкта була. Бу җимешнең яшел төстәгесе, аның өлгермәгәнлеге, ә көрән төстәсе, аның бозылуы хакында сөйли. Шуңа күрә, сары-көрән төстәге ананас сайлагыз.
Тышына басып карагач, эз кала һәм яңадан урынына кайтмый икән, димәк җимеш бозыла башлаган, әгәр ананас кокостан да каты икән, ул әле өлгермәгән. Тышы каты һәм сыгылмалы ананас эзләгез.
Ананасның авырлыгына игътибар итегез. Ул уртача 1-2 кг булырга тиеш. Җимешне кулга алгач, авырлыгы сизелмәсә, ул корый башлаган була.
Ананас сайлаганда, аңа шакып карагыз. Тонык тавыш йомшаклыгын һәм сусыллыгын, ә яңгыравыклы тавыш, киресенчә, искерә башлавын белгертә.
Иснәп карагыз. Яхшы ананастан татлы хуш ис килә.
Шуны истә тотыгыз, ананаслар кискәннән соң өлгерми. Шуңа күрә җитешкән җимешен сайлагыз.
Ананасны кәгазь пакетка төреп, суыткычта саклагыз. Болай иткән очракта, 1 атна тотарга була. Ә саклау вакытын арттырасыгыз килсә, аның йомшагын турап, туңдыргычка куегыз. Бу вакытта саклау вакыты 2-3 айга кадәр җитәргә мөмкин.

Әфлисун

Сатыла торган партиянең кайчангы уңыш булуын ачыкларга тырышыгыз. Иң яхшы уңыш декабрь-гыйнварныкы.
Фреш һәм соклар өчен Мисырдан кайтартылган әфлисун туры килә. Ашау өчен иң татлысы булып испан һәм американыкын алыгыз.
Әфлисун кабыгына игътибар итегез. Ул бер төстә генә булырга тиеш. Көрән яки яшел таплар булуы, җимешнең бозыла башлавын искәртә.
Җимешнең йомшак, чери башлаган урыннарын билгеләү өчен бераз басып карагыз.
Артык эре булмаган, әмма авыр әфлисун сайлагыз. Чөнки җитешкәнлек билгесе төс түгел, ә авырлык.
Иснәп карарга да онытмагыз. Әгәр исе бөтенләй юк икән, бу җимешнең җитешмәве яки химик матдәләр белән эшкәртелгәнен билгели.
Әфлисунне суыткычта яки базда саклагыз!

Алма

Таплары һәм корт эзләре булмаган алма эзләгез.
Аның тышы каты яки аз гына йомшак булырга тиеш (бик йомшак алмалар артык җитешкән була һәм тәмен югалта).
Яхша алманың кабыгы бер төстә генә булмаска мөмкин, әмма табигый тышлысын карагыз.
Алманың урта зурлыктагысын сайлагыз! Артык зур җимеш – үстерү өчен махсус матдәләр куллану нәтиҗәсе булырга мөмкин.
Алма тышы юеш яки майлы булып тора икән, андыйны алмагыз. Мондый алмалар махсус препаратлар белән эшкәртелгән була. Бу җимешләрне ашау организмга зыян салырга мөмкин.
Алманы юмыйча, сөртмичә пакеттагы килеш суыткычта саклагыз.

Виноград

Әгәр җимешләр йомшак һәм тышы салынырга тора икән, димәк алар суыкта озак торган. Виноград бөтен, ә тәлгәшләре сыгылмалы булсын.
Озак салкында торса да, бу җимешләрнең кара төстәге сортлары үзең тәмен һәм файдалы үзлекләрен озак саклый. Шундыйларга өстенлек бирегез.
Виноград тәлгәшен селкеп карагыз. Алар артык коелмаска тиеш. Тышы тыгыз, каты булган җимешләрне сайлагыз.
Кара таплары булган виноградларны алырга курыкмагыз. Бу бары тик аларның өлгергән һәм химик матдәләрсез булуын дәлилли.
Сабагына игътибар итегез. Ул яшел төстә һәм корымаган булсын. Мондый җимешләр генә файдалы үзлекләрен саклый.
Күңелегезгә ошаган сортның исемен истә калдырыгыз. Икенче юлы сайлавы җиңел булыр.
Виноградны суыткычта тотыгыз.

Анар (гранат)

Анарның кабыгы аша җимешләре беленеп торырга, тышы коры, юка, тапларсыз булырга тиеш.
Үзбәкстан яки Төркиянекенә өстенлек бирегез. Алар татлы һәм сусыл була.
Авыр анарны сайлагыз. Җитешкәннәре авыр була.
Башындагы “чәчәге” коры һәм яшеллексез булсын. Бу шулай ук өлгергәнлек билгесе.
Тышы каты һәм тапсыз җимеш эзләгез.
Яхшы анар иссез була. Иссезен алыгыз.

Фото ru.pngtree.com сайтыннан алынды.

Запись Иң сусыл алма, әфлисун, ананас сайлауның җиңел юллары впервые появилась Tatar Today - татар яңалыклары..

Көне буе әзерләп, төне буе ашау: Яңа ел табынына ниләр кирәкми? [киңәш]

Алина — Tue, 25 Dec 2018 13:33:01 +0000

Яңа елны каршылау – бәйрәм көн булса да, хуҗабикәләр бу көнне иртә таңнан аш бүлмәсендә кайнаша, пешерә, төшерә. Ә бит бу – бер-береңне бәйрәм белән котлап, кунак булып йөри торган көн. Эш күләмен киметү өчен, безнең киңәшләргә колак салыгыз.

Әйтик, торт өчен коржны бәйрәмгә ике-өч көн кала ук пешереп куярга була. Салатка дигән пешкән яшелчәләрне дә ике көн алдан чистартып, суыткычка куярга мөмкин. Бутербродлар өчен ипине дә кисеп, азык-төлек пленкасына урап куярга була. Сыр һәм ит, ит ризыклары да пленка астында берничә тәүлек кипмичә саклана.

30 декабрь көнне ит, балык, тавык маринадлау белән шөгыльләнсәгез була. Торт һәм бутербродлар өчен крем ясап кую өчен дә менә дигән мөмкинлек. Бары тик азык-төлек пленкасы белән генә капларга онытмагыз. Шулай иткәндә, 31е көнне үзегезгә берничә буш сәгать багышлый алырсыз.

Гадәттә, Яңа ел табынын “Оливье”дан башка күз алдына китереп булмый. Уылдыклы бутерброд та – табын бизәге. Тагын бер төрле катлы салат ясасагыз, башка кирәкми. Ә менә әстерхан чикләвеге, виноградтан канапе ясап яки бал белән төрле сырлар кисеп куярга мөмкин. Җиләк-җимешне онытмагыз. Иң мөһиме – мандарин. Аны күбрәк алсагыз, оттырмассыз. Әгәр каз пешерәсез икән, кыздырган тавык, балык булу да мөһим түгел. Тозлы кыяр, помидор, маринадланган ананас, персик кебек кабымлыклар булса да шәп. Аларны аппетитны уятып, ашказанын эшкәртеп җибәрә. Ашказаны дигәннән, минераль су турында онытмагыз. Пилмәнне дә күпләп пешермәскә киңәш итәбез. Иң яхшысы – аның шулпасын әзерләп куегыз. Төнлә аш ашарга һәркем гадәтләнмәгән. Ә менә 1 гыйнвар иртәсендә шулпа бик кирәк.

Күпләр бәйрәм табынына торт та куя. Гадәттә, десертка берәүнең дә хәле калмый. Иң яхшысы – лимонлы чәй һәм кәнфит.

Акчарлак газетасы

Запись Көне буе әзерләп, төне буе ашау: Яңа ел табынына ниләр кирәкми? [киңәш] впервые появилась Tatar Today - татар яңалыклары..