Архивы Биектау - Tatar Today - татар яңалыклары.

“Иң авыры – кыз баланың миннән “Апа, төшме бу?” дип кат-кат сорап, әтисенә эндәшүе…”

Алсу Мансурова — Thu, 27 May 2021 18:34:34 +0000

Биектау районында 15 нче номерлы “Лада” һәм “Датсун” автомобильләре бәрелешкән. Шаһитләр әйтүенчә, 15нче модельле машина юл кырыена, кюветка очып чыккан һәм баганага килеп бәрелгән. Ә Датсун машинасы йөртүчесе Радик Мөхәммәтшин каза урынында мәңгегә күзләрен йомган.

Беренчел фаразлар буенча, илебездә җитештерелгән машина зур тизлектә хәрәкәт иткән, алда баручы машинаны узып китәр өчен каршы яктан хәрәкәт итү полосасына килеп чыккан (обгон) һәм биредә Датсун белән бәрелешкән.
Без әлеге үкенечле фаҗиганең нечкәлекләрен белешү өчен юл фаҗигасе шаһите Айсылу Гарифуллина белән элемтәгә кердек.

Коркачык юлындагы борылыш элек-электән машина йөртүчеләр өчен куркыныч тудырган җир булып санала. Биредә сак булуны өндәп куелган юл билгеләре дә бар. Әмма күрәчәктер…Мин Питрәч районында авыл хуҗалыгы өлкәсендә эшлим, көн дә авылга эштән 90 чакрым кайтып йөрим, -дип сөйләде безгә Айсылу,- Кичке сәгать җидедә, барысы күз алдымда булды. Бәрелешкән кешеләр янына иң беренче булып мин килдем. “Лада” руле артында бер егет, ә “Датсун”да 5 кеше утырган иде. Шул машинаның йөртүчесе безнең кулларда ярты сәгатьтән җан бирде. Хатынына да зур зыян килгән. Сынган аягы, ярылган маңгае белән аларның 9 яшьлек кыз бала миннән ярдәм сорады, хәле авырайды. Уллары 7 яшьлек малай, шөкер, җитди яралар алмады. Иң авыры – кыз баланың миннән “Апа, төшме бу?” дип кат-кат сорап, әтисенә эндәшүе. Ә бу вакытта әтисе алдагы утыргычта җан биргән иде. Малайны тынычландырган арада, аларның кая баруларын сораштырдым, ул әтием миңа велосипед алып бирәм дигән иде, шуңа Казанга барырга чыктык, диде. Җан сыкранырлык күренешләр.

Фаҗига урынына күп санлы машиналар туктый, әмма ярдәм итәр урынында күпләр моны тизрәк телефоннарына төшереп, социаль челтәрләргә урнаштыра башлыйлар.

Авария урынында хатын-кызлар арасыннан бер үзем булдым, автоматик рәвештә булды бар эшем, анда булган ир-атларга рәхмәт. Бик тә нык ярдәм булды, дөресрәге бергә булышырга тырыштык. Әмма күпчелектә битарафлык сизелде, күпме кеше тукталды, ник шунда берәрсе:”су биримме”, дип эндәшмәде. Яраларны бәйләргә дә булышучы булмады, бер үзем елый-елый җәрәхәтләрне юарга да, бәйләргә дә өлгердем. Ә бит анда авыр хәлдәге биш кеше. Телефоннарын алып, фаҗигадән кызык ясап фото һәм видеога төшерүчеләрне аңламыйм да, аңларга да тырышмыйм. Гөнаһы үзегезгә. Без бер көнлек дөньяда яшибез. Бүген әлеге бәхетсезләргә шундый зур кайгы килде, әмма иртәгесе көндә сезнең белән ни буласын беркем белми. Ник шундый салкын канлы, җансыз, кешелексез кешеләр соң хәзер? – дип елый-елый сөйли безгә Айсылу. – Ул минутта сизмәдем, өйгә аяк атлап кергәч кенә аңладым булган хәлне….Терелеп чыксыннар инде берүк, кызчык өчен йөрәк яна, аның ялвару катыш сораулы сүзләре әле дә колагымда яңгырый… Бу юл һәлакәтенә очраган һәркемнең туганнары белән элемтәдә торам, “Лада” машинасы йөртүчесе 1999 елгы Павел хәзер Казанның 7нче шәһәр хастаханәсендә дәвалана, операция ясалган. Кызчык республика балалар клиник хастаханәсендә инде ике операция кичергән. Һәрберсе янына хәлләрен белешергә барачакмын, дип үземә сүз бирдем. Күрәчәк бу, беркемне дә гаеплисем килми. Юлда йөргәндә, төрле хәлләр булырга мөмкин.

Юл һәлакәтенә юлыккан Мөхәммәтшиннар гаиләсе Коркачык авылында гомер кичергән. Иске Казан авыл җирлегендә белдерүләренчә, иң тәртипле, иң булдыклы гаилә алар.

Гаилә башлыгы Радик кышын урман хуҗалыгында, җәйләрен “Бөреле” хуҗалыгында механизатор булып эшләде. Ул үзе Арча районы Кәче авылы егете, Эльмирага өйләнгәннән соң, безнең авылда яши башладылар. Хуҗалыклары зур, тәртипле, тырыш гаилә. Радикның кулыннан килмәгән эше юк, тыңлаучан, хуҗалыкта да иң алдынгысы булды. Үтенеч-гозерләрне кире кага белми торган сыйфаты бар иде мәрхүмнең. Хәер, бөтен авыл халкы Радикның әнә шул «юк» дип әйтә белмәгән сыйфатын ассызыклап үтә. Барыбыз да нык кайгыра. Олы кызлары Зәринә икенче сыйныфта, кечесе Ринас беренче сыйныфны тәмамлады быел. Шундый түгәрәк гаилә бер секунд эчендә үз әтиләрен югалтты. Бик үкенечле, -диделәр безгә Биектау районының Иске Казан авыл җирлегендә.

— 2021 елның 26 маенда 18.56 сәгатьтә Казан – Малмыж автомобиль юлының 41 чакрымында (Биектау районы территориясе), 1999 елгы ВАЗ-2115 автомобиль йөртүчесе Казан шәһәре ягыннан Малмыж шәһәренә таба хәрәкәт иткәндә, куркынычсызлыкны тәэмин итә торган тизлекне сайлап алмаган. «Алда баручы машинаны узу тыелган» юл билгесенә игьтибар итмәгән. Шул ук вакытта «Тоташ линия» өслектәге юл билгесен санга сукмаган, үзенең маневрының куркынычсызлыгына инанмаган. Ягьни “Лада” машинасын йөртүче берьюлы берничә кагыйдәне бозган. Нәтиҗәсе дә аянычлы: 15нче модель машинасы каршы юнәлештә хәрәкәт иткән Датсун автомобиле белән кара-каршы бәрелешкән. Хәзер кеше үлеменә китергән юл һәлакәте буенча тикшерү бара, – дип белдерделәр безгә ТР Эчке эшләр министрлыгының ЮХИДИ идарәсе пропаганда бүлегендә.

Уйлап кына карагыз әле, без һаман да каядыр ашыгабыз, гомеребезнең бер мизгел эчендә үтүен дә абайламый калабыз. Машина руле артына утырганнан соң да, тизлек артыннан куып, үзебезне генә түгел, ә тирә-юньдәгеләрне дә куркыныч астына куябыз. Юкса, Россия юлларында алда баручы машинаны узып китү аркасында көн дә диярлек юл һәлакәтләре булып тора. Әмма гыйбрәт алмыйбыз, һаман ашыгабыз…ялгышабыз…

Фото: “Шәһри Казан” сайты

Тулырак: "Шәһри Казан" сайты

Запись “Иң авыры – кыз баланың миннән “Апа, төшме бу?” дип кат-кат сорап, әтисенә эндәшүе…” впервые появилась Tatar Today - татар яңалыклары..

Әминә Ибниева: “Дәүләт шәһәрдә яшәүче инвалид белән авылда яшәүче инвалидны тигез итеп күрми” [видео]

kadria — Sun, 02 Aug 2020 13:08:38 +0000

Азатлык Биектау авылында яшәүче беренче төркем инвалид Әминә Ибниева белән очрашып аның тормышы, инвалидларның җәмгыятьтәге проблемнары, татар теленең бүгенге хәле һәм башка темаларда әңгәмә корды.

Әминә Ибниевага 60 яшь. Һөнәре белән филолог. Биектау районы Кече Битаман авылында гаиләдә алтынчы бала булып туган. Ике яшендә әтисе вафат булган. Кечкенә чагында табибларның операция ясаганда хаталануы аркасында инвалид арбасына утырган. Мәктәпне санаторийләрдә дәваланганда тәмамлаган. Хәзер Биектау авылында яши. Өйдән торып балаларга һәм өлкәннәргә репетитор буларак татар һәм урыс телләрен өйрәтә. Испан, поляк һәм алман телләрен белә. Азатлык Биектауда Әминә апада кунакта булып аның тормышы һәм республикадагы хәлләр турында сөйләште.

— Әминә ханым, тормышымда татар телен ике тапкыр югалтып, ике тапкыр яңадан өйрәндем дидегез?

— Миңа хастаханәләрдә ятканда гел урысча гына укырга туры килде. Татар телен өйрәнергә мөмкинлек булмады. Татар телен беренче табуым, хастаханәдән авылга кайтып беренче сыйныфка укырга кергәч булды. Мин татарча аңлый идем, ләкин татарча сөйләшә алмый идем. Югалган телемне икенче тапкыр табуым мәктәпне хастаханәләрдә тәмамлап авылга аттестат алып кайткач булды. Телне бит китап укып кына өйрәнеп булмый, сөйләшергә дә кирәк. Шул телдә уйларга кирәк.

— Мәктәпне бетергәч укуыгызны дәвам иттегезме?

— Уку теләгем бик зур иде. 10 сыйныф белем белән генә яшәп булмаячагын аңлый идем, югары белем аласым килде. Беренче теләгем хокукый белем алу теләге иде. Үз тормышыма реаль карадым. Кая да булса чыгып эшли алмый идем. Хокукчы-консультант булсам, тормышым җиңеләер дип уйладым. Укуны бетергәч тә хокук институтына керә алмадым. Төрле сәбәпләре булды. Берәр һөнәр үзләштерәсем килде. Инвалид пенсиясе белән әллә кая барып булмый иде, мин чигү эшен өйрәндем. Уку теләгем беркайчан да сүрелмәде. Шуңа, соңлап булса да, Мәскәүдәге телләр өйрәнү институтына читтән торып укырга кердем. Испан телен өйрәндем. Аннан 1983 елда Казан дәүләт университетының филология факультетына кердем һәм 1993 елда аны тәмамладым.

— Сез хәзер өйдән торып кешеләргә татар һәм урыс телләрен өйрәтәсез, бу һөнәрегез булмаса, инвалидлык түләве белән генә тормыш алып барып булыр идеме?

— Әгәр эшем булмаса, бу пенсиягә генә яшәп булмый. Башка пенсияләр белән чагыштырганда, безнең пенсия алай кечкенә түгел дип әйтик. Әмма яши башлагач ул катастрофик дәрәҗәдә җитми.

— Нәрсә алырга җитә сезнең пенсия?

— Фатир өчен түләргә җитә. Ачлыктан үлмәскә җитә. Кибеткә баргач тукта, ит тә алыйм, колбаса да алыйм әле дисәң, андый мөмкинлек юк. Йә итне генә аласың айга бер кило, йә колбаса гына аласың. Ә дарулар ала башлагач ит һәм колбасаны онытасың. Дарулар бик кыйбат бит. Социаль пакетка иң арзанлы, булышмый торган дарулар гына керә. Бинт та, мамык та, шприц та, укол кадый башласаң, спирт та керми. Аларның бөтенесен үзеңә сатып алырга туры килә. Айга 6-7 мең сум даруларга гына китә.

— Даруханәләргә сез ничек йөрисез?

— Мин яшәгән подъездда махсус җайланма торса да, мин бик чыгып йөрмим. Беренчедән, минем электр белән эшли торган арбам юк, хәлем бетә. Хөкүмәт безнең кебекләргә электрик арба бирми, аны аягы да, кулы да эшләмәгән инвалидларга гына бирәләр. Минем куллар эшләсә дә, еракка бару бик авыр. Икенчедән, минем социаль ярдәмчем һәм дусларым бар. Даруларга барып килүдә алар ярдәм итә.

Дөрес, даруханәгә социаль ярдәмчем йөрми, чөнки ул хезмәт бик кыйбат. Без беренче төркем инвалидлар пенсияне 8 мең генә алмыйбыз. Шуңа күрә хөкүмәт безнең кебекләргә социаль хезмәткәрне түләүле итте. Без социаль хезмәткәр безгә килеп ярдәм иткән өчен социаль яклау үзәгенә үзебез акча түлибез.

Шуны да әйтәсем килә, дәүләт шәһәрдә яшәүче инвалид белән авылда яшәүче инвалидны тигез итеп күрми. Без, авылда яшәүче инвалидлар, бу хезмәткәрләргә күбрәк түлибез. Моның сәбәбе, янәсе социаль хезмәткәрнең инвалидлар янына килеп җитүе авыррак булуы икән. Күрәсең, дәүләтнең сәясәте шундыйдыр инде, безне бу дөньядан тизрәк куарга телиләр.

— Кибетләргә дә шул социаль ярдәмче йөриме?

— Әйе, ул һәм дусларым йөри. Социаль ярдәмчене дә кибеткә бик җибәреп булмый, чөнки ул атнага бер генә тапкыр килә. Әйтик, миңа бу атнада ул килгәндә ипи генә кирәк ди, ипи күпме тора? Ә аның хезмәте 160 сум тора. Даруханәгә барса, аның хезмәт хакы 500 сум тора, бер бару өчен бу бәя. Бәлки миңа кечкенә генә әйбер кирәк булыр. Ул аны дәүләткә күрсәтергә тиеш. Аның бугазына басып, син нишләдең син инвалидка нинди ярдәм күрсәттең диләр. Менә шулай итеп без шушы пенсиягә яшәргә тиеш. Аннары шуны онытмагыз, без аяксыз инвалидлар. Без ул кешенең килүен бик көтеп алабыз. Өске шүрлекләрдән әйберләр алып бирәсе була кайчак. Ә аны шуның кадәр нык тикшерәләр, сәгатен-минутын саныйлар. Элек тузан сөртү хезмәте дә юк иде. Хәзер ярый аны бер хезмәт итеп исәпли башладылар.

— Татарстанда инвалидларга тормыш итү өчен уңайлыклар ни дәрәҗәдә?

— Минем өй керешендә инвалидлар өчен чыгу-керү җайланмасы бар ансы. Баскычлардан күтәргеч тора. Аның өчен биш ел көрәштем, хакимият бары шуннан соң гына куйды. Ә йорттан чыгып киткәч уңайлылык бетә. Бездә бит кибетләргә яисә башка оешмаларга керә торган урыннарда махсус инвалидларның килүен хәбәр бирә торган кыңгыраулар да эшләми хәтта.

— Бу турыда тиешле урыннарга хәбәр итәсезме соң?

— Язабыз, роликлар чыгарабыз, прокуратурага язабыз.

— Хакимият бу шикаятьләргә җавап бирәме?

— Прокуратура яхшы эшли. Менә хәзер инвалидларга уңайлылыклар тудырмаган түрәләрне мәхкәмәгә бирергә җыеналар. Бездә бүтәнчә булмый хәзер. Бездә кануннар бар, әмма аларны гамәлгә ашырмыйлар.

— Әминә ханым, Татарстанда инвалидлар өчен кирәкле әйберләр белән тәэмин ителеш ни дәрәҗәдә?

— Кирәкле әйберләр белән тәэмин итәләр ансы, ләкин аларның сыйфаты юк. Сыйфаты начар түгел, ә бөтенләй юк. Мондый әйберләргә сыйфат дип әйтү өчен Аллаһтан оят. Памперс дигәне ага, арба дисәң, ансы авыр, йөрми. Арбага утырганда җилкәләрне күтәреп утырабыз. Арбаның култыксалары култык астында булырга тиеш түгел, ә аларга без таянып утырырга тиеш.

Мин хөкүмәт тиешле акчаны бирә дип уйлыйм, әмма ул акча каядыр китеп бетә. Тик торганда Ганибаевны (Русия инвалидлар җәмгыятенең Татарстан бүлеге җитәкчесе. 3 июльдә кулга алынды – ред.) кулга алмаганнардыр инде. Шушы памперслар белән үз кесәсенә бер миллион акча урнаштырган бит. Ә аны яклап күпме кеше чыкты. Аны яклап матбугат очрашуы үткәрделәр диделәр. Ул җыелышта берәр арбалы инвалидны күрдегезме дип сорадым журналистлардан, бер арбалы инвалид та булмады диделәр. Бу нәрсәдер аңлатадыр. Йөргән кешегә памперс кирәкми, арбада утырганга кирәк.

— Бүген Татарстанда беренче төркем инвалидларның иң төп проблемы нәрсә?

— Кайсы якны алма, бөтенесе проблем. Дару проблем, пандуслар, арбалар проблем, киемнәр, өйдә яшәү проблем. Төгәл берсен генә әйтеп булмый. Ялгыз инвалид әйбер алам дип арбадан егылып төшсә, өендә аңа күтәрелеп утыру үзе бер проблем. Кызганыч, Татарстандагы инвалидлар оешмасы инвалидларның проблемнарын чишми. Инвалидлар кайда — шунда бик каты урлау бара.

— Сез инвалидлар хокукларын яклап Казанда пикетка да чыккан идегез.

— Нигә чыктым, беләсезме? Авылларда сугыш чорын кичергән әби-бабайлар бар. Хәзер алар ялгыз калды. Урын өстендә калдылар. Ничә еллар буе алар памперс ала алмыйча яттылар. Мин пикетка шул әби-бабайларны памперс белән тәэмин итүне таләп итеп чыккан идем.

— Татарстанда инвалидларга карата мондый салкын карашның сәбәбе нидә, сезнеңчә?

— Дәүләткә кеше кирәк түгел, шул гына. Түрәләргә сайлау вакытында гына кеше кирәк. Сайлау җитә башлагач, алар безнең ишеләрне ничек кенә күрәләр әле. Пенсионерларга сайлауга барыгыз дип ярдәм пакетлары да китергәннәр диләр. Миңа китермәделәр ансы. Мин газет аша да әйттем байкот ясыйм сайлауга дип, катнашмадым тавыш бирүдә. Русия Конституциясенә кертелгән үзгәрешләргә каршы килдем.

— Нигә каршы килдегез?

— Бу баладан син әтиеңне яратасыңмы, шоколад яратасыңмы дигән сыман килеп чыкты. Тавыш бирүне мин сәер әйбер дип саныйм, барсы болганган ботка кебек булды.

— Озакламый Татарстанда президент сайлау җитә, катнашырга уйлыйсызмы?

— Мин Татарстан президентын сайламыйм, чөнки ул сайланган инде. Дөрес сайлау булса, бик күп үзгәрешләр булыр иде. Хәзерге депутатларның кайсысы гына депутат булыр иде икән? Мин хәзер йөрмим сайлауларга. Сайлау тәртибен дә үзгәрттеләр. Агач төбенә барып сайлап булгач, аны өч көнгә кадәр сузгач, бу сайлау карикатура була инде. Мин анда катнашмыйм. Намусым чиста булсын.

— Сезнең кебек аяклары йөрми торган инвалид Антон Кайнов депутат булырга теләвен әйтте. Сезнең дә инвалидларны кайгырту өчен депутат булып сайланырга теләгегез юкмы?

— Татарстан Дәүләт шурасына депутат булып барырга теләгем бер дә юк, чөнки алдаша да белмим, урлаша да белмим. Мин турысын әйтәм.

— Депутат урлашмыйча яши алмыймы?

— Аның өчен дөрес депутат булырга кирәк. Антон Кайнов сайлана калса, анда эшли алмас дип уйлыйм, ирек бирмәсләр аңа эшләргә.

— 2002 елдан башлап репетитор булып ныклап эшли башладым дидегез. Эш тәҗрибәгезгә карап әйтегез әле, татар телен өйрәнү белән кызыксыну соңгы елларда нинди дәрәҗәдә?

— Арта дип әйтер идем. Бу яшьләрдә түгел, ә олы яшьтәгеләрдә күзәтелә. Телне ныграк кыскан саен татарлар үзләренең татар булуын күбрәк искә төшерә. Татарча сөйләшмәгән кешеләр дә курсларга язылып татар телен өйрәнә. Бу арту 2017 елдан соң бик сизелде. Шунысы кызык, урыслар да татар теле белән кызыксына башлады.

— Сез татар телен нинди форматта өйрәтәсез? Күбрәк сөйләшүгә басым ясыйсызмы, әллә инде грамматиканы да тигез итеп өйрәтәсезме?

— Телне грамматиканы өйрәнмичә өйрәнеп булмый. Безгә грамматика кирәкми, безнең сөйләшәсебез килә дип әйтүчеләр бар. Килешләр белмичә сөйләшеп карагыз әле алайса дим. Шуннан алар минем белән килешәләр. Грамматиканы, сөйләм телен һәм аларны сөйләштереп татарчага өйрәтәм.

— Бүген мәктәпләрдә татар теле ни хәлдә?

— Бик начар. Телне өйрәнү укытуга да карый бит. Минемчә, бөтен системны алыштырырга кирәк. Татар теленә каршы килгәндә мин әйтә идем, ярар, татар телен бетерегез, дәресләрне бетерегез, татар теле урынына урыс теле керсен. Аннан гына балаларның белеме артамы соң? Атнага ун сәгать урыс теле булса да, барыбер репетитор эзләячәксез дидем. Миңа татар кешесенә урыс телен өйрәнергә киләләр бит.

— Мәктәпләрдә ике сәгать татар телен өйрәнеп телне саклап калып булачакмы?

— Юк. Аның бит берсе татар теле, берсе әдәбият. Мин шуны аңламыйм, безнең Татарстан Конституциясендә татар теле дәүләт теле дип язылган бит. Дәүләт теле буларак нишләп аны мәктәптән кудылар икән? Кысрыклап чыгардылар икән? Татар теле белән урыс теле бер тигез булырга тиеш түгелме соң? Минемчә, түрәләргә татар теле чынлап та кирәк түгел. Алар бит Татарстанны эш урыны итеп кенә саныйлар.

— Татар телен мәктәпләрдә шул ике сәгать белән генә булса ничек итеп саклап калырга була, филолог буларак нинди киңәш бирер идегез?

— Безгә хәзер бөтен җирдә үз телебездә сөйләшергә кирәк. Хәзер татар дигән сүз юкка чыгып бара. Тел бетсә, милләт белән бик күңелсез хәл булачак. Ә бу юл белән барабыз икән, безнең телебез бетәчәк. Телебез белән бергә милләтебез дә бетә. Үзара сөйләшеп кенә түгел, телне мәктәпкә кайтарып сакларга кирәк. Яшермим, мин — милләтче. Һәрбер милләт үз телендә сөйләшергә тиеш, үзенең гореф-гадәтләрен онытырга тиеш түгел дим мин.

— Хакимияткә әйтер сүзем бар дип әйткән идегез…

— Хакимияттә дә кешеләр утыра бит. Сез, түрәләр, аз гына Аллаһны бар дип белегез. Халыкны һаман изеп булмый. Халык та пружина кебек, бер көнне кире бәрергә мөмкин. Намус дигән әйбернең барлыгын онытмаска кирәк. Яшьрәк чакта ул борчымаска мөмкин, әмма картая төшкәч, ул намус бәргәләнә башлый. Раскольниковны исегезгә төшерегез. Кеше булуыңны онытмаска кирәк. Ә кешедә намус булырга тиеш.

Чыганак: Азатлык Радиосы сайты

Запись Әминә Ибниева: “Дәүләт шәһәрдә яшәүче инвалид белән авылда яшәүче инвалидны тигез итеп күрми” [видео] впервые появилась Tatar Today - татар яңалыклары..

Татарстанда юл һәлакәте: машина берничә кисәккә бүленгән, ә йөртүчесе урында ук һәлак булган

Alfia — Fri, 18 Oct 2019 16:11:36 +0000

Биектау районында юл-транспорт һәлакәтендә бер ир-ат үлгән. Бу турыда Дәүләт автоинпекциясендә хәбәр иттеләр.

ЮХИДИ мәгълүматлары буенча, 18 октябрь 15.30 сәгатьтә Казан-Малмыж юлының 46 нчы километрында 14нче модельле «Лада» автомобилен йөртүчесе каршы як полосага чыккан һәм «Тойота» белән бәрелешкән.

Авариядә «Лада» автомобиле җимерелеп, берничә кисәккә бүленгән, ә йөртүчесе урында ук үлгән.

Чит ил машинасы йөртүчесен һәм пассажирын хастаханәгә озатканнар.

Мәгълүмат һәм фото-видео: tatar-inform.tatar

Запись Татарстанда юл һәлакәте: машина берничә кисәккә бүленгән, ә йөртүчесе урында ук һәлак булган впервые появилась Tatar Today - татар яңалыклары..

Биектауда чын афәт башланган [видео]

Alina — Fri, 21 Jun 2019 11:55:59 +0000

21 июнь Биектау районы Урта Алат авылында күпләп бал кортлары һәлак булган. Бу хакта җирле умартачы хәбәр итә.

Умартачылыкны тотучы сөйләве буенча, бер атна эчендә ул 30 умартадан колак каккан. Мондый хәл якында гына урнашкан басуны көчле гербицидлар белән эшкәртү нәтиҗәсендә килеп чыккан.

“Кичә бездә басуларны агуладыр һәм менә нәтиҗәсе. Бал кортлары үлеп бетте. Мин нишләргә дә белмим. Бу чын афәт” ди умартачы.

Мәгълүмат Бизнес Online

Запись Биектауда чын афәт башланган [видео] впервые появилась Tatar Today - татар яңалыклары..

Биектаудан китергән күкрәк баласы Казанда хастаханәдә үлә

Алина — Tue, 02 Oct 2018 09:56:39 +0000

Казанда хастаханәдә күкрәк баласы үлгән. Бу турыда 2 октябрьдә «Татарстан24» телеканалы хәбәр итте.

Баланың тәне 1, 2, 3 нче дәрәҗәдә пешкән булган. Ләкин сабыйны хастаханәгә йөрәге авыртканга, сентябрьдә китергәннәр. Табиблар фикеренчә, бала йөрәк өянәгеннән үлгән.

Баланың Биектауда әти-әнисе белән яшәгәнлеге билгеле. Алар белән психологлар эшли. Хокук саклау органнары бу хәлне бәхетсезлек очрагы дип бәяли.

Баланың ни рәвешле пешүе турында, хастаханәгә килгәндә хәле ничек, аңа ничә ай яки яшь булуы турында бу хәбәрдә әйтелми.

Чыганак: Интертат электрон газетасы

Запись Биектаудан китергән күкрәк баласы Казанда хастаханәдә үлә впервые появилась Tatar Today - татар яңалыклары..

Биектауда ике җиңел машина “маңгайга-маңгай” бәрелешкән: зыян күрүчеләр бар

Редактор1 editor1 — Wed, 04 Jan 2017 14:05:03 +0000

4нче гыйнварда сәгать 10 тулып 5 минут узгач Биектау районында 112 кичектергесез хезмәт телефонына Казан – Малмыж машина юлының 30 нчы чакрымында транспорт һәлакәте булуы, анда кешеләр каза күрүе турында хәбәр килеп ирешкән. Россия Гадәттән тыш хәлләр министрлыгының Татарстан буенча Баш идарәсе матбугат хезмәтеннән “Татар-информ” мәгълүмат агентлыгына шул хакта мәгълүмат килде. //Татар-информ//

Аерым алганда, Казан – Малмыж трассасының 30 нчы чакрымында “Лада Приора” белән “КИА” автомобильләре “маңгайга-маңгай” бәрелешкән. Нәтиҗәдә, дүрт кеше каза күргән, аларның икесе – балигълык яшенә җитмәгән ир бала. Гадәттән тыш хәлләр министрлыгы хезмәткәрләре аларны ашыгыч медицина ярдәме бригадасына тапшырган, соңгысы тәне казаланганнарны Казанның 7 нче номерлы хастаханәсенә илткән.

Запись Биектауда ике җиңел машина “маңгайга-маңгай” бәрелешкән: зыян күрүчеләр бар впервые появилась Tatar Today - татар яңалыклары..

Биектау башлыгы комбайнчыларны үз кулларыннан ашата

Редактор1 editor1 — Wed, 27 Jul 2016 14:41:54 +0000

Татарстан басуларында кызу урак өсте бара. Биектау районы башлыгы Рөстәм Кәлимуллин урып-җыюның барышы белән һәрдаим кызыксынуын инстаграм битендә дә хәбәр итеп тора.

27 июльдә ул басуларны шәхсән карап, кырда эшләүче комбайнчыларның хәлен белеп кайткан. Иң алдынгыларын премия белән сөендергән дип тә аңладык. “Үзем шәхсән комбайнчыларның эшләү шартлары, ашау сыйфатын да карадым”, ди район башлыгы инстаграм битенә керткән фото астында.

Рөстәм Кәлимуллин комбайнчыларның ризыкларын тотып кына түгел, комбайнга да утырып фотога төшкән. “Сагындыра комбайннар! Егет чагыма кайткан кебек булдым!”, дип белдерә Биектау башлыгы.

Газинур Хабибуллин. Передовик уборочной 2016. Намолотил максимальное количество зерна среди комбайнеров Бирюлинской зоны – 319 тонн. Не сбавлять темп! #vgora

Фото опубликовано Рустам Калимуллин (@kalimullin.rustam) Июл 27 2016 в 2:50 PDT

Сам лично ознакомился с условиями работы комбайнеров, качеством питания. #vgora

Фото опубликовано Рустам Калимуллин (@kalimullin.rustam) Июл 27 2016 в 2:52 PDT

Сагындыра комбайннар! Егет чагыма кайткан кебек булдым. #vgora

Фото опубликовано Рустам Калимуллин (@kalimullin.rustam) Июл 27 2016 в 2:53 PDT

Запись Биектау башлыгы комбайнчыларны үз кулларыннан ашата впервые появилась Tatar Today - татар яңалыклары..

Татарстанлылар бер-берсенә ияреп, Тукай шигырьләрен сөйләп җиләк җыя [видео]

Редактор1 editor1 — Thu, 07 Jul 2016 16:38:50 +0000

Җәйге җиләк чорын татарстаннар вакытында файдаланып калырга ашыга. Республиканың кайсы гына шәһәр яны, район яки авылына юл тотма, болын-урманнарда җиләк җыючыларны очратырга мөмкин. Хәбәрчебез Биектау районы Шигале авылы болынындагы җиләкчеләр белән сөйләшеп кайтты. //Азатлык радосы//

Республикада җәйге ялларын җиләк чорына махсус туры китереп алучылар бар икән. Быел бигрәк тә чит илгә китмичә районда, авылда ял итүчеләр шактый. Кайберәүләр гаиләгә, балаларга дип җыйса, икенчеләре җиләк җыеп, табигатьгә чыгып тәм таба, өченчеләре яшәр өчен, акча кирәк дип җыеп сату итә. Татарстанның Биектау районы Шигале авылы янында күп кешеләргә билгеле болыннарда без барып күргән, аралашкан җиләкчеләр үзләре, гаиләләре өчен җыюларын әйтте.

Атна уртасында әле азрак булса, ял көннәрендә монда килүче машиналар саны дистәгә тула диде безгә әңгәмәдәшләребез. Араларында күрше авыл кешеләре дә, казаннар да бар. Җиләкчеләрнең күпчелеген хатын-кызлар тәшкил итә, ир-атлар да бу эштән читтә калмаган.

“Кичә җыйганын кайнаттык, бүгенгесен туңдырырга уйладык. Җиләк җыярга теләгән кешегә җиләк табып була. Без инде соңга калганбыз дип килгән идек, бар икән әле. Дөрес инде пешеп, көеп утыра, яңгырлар аз яуды бит”, диде Казаннан килүче Алсу ханым. Ул Шигале болынына беренче тапкыр аяк баскан, бу урын турында туганнарыннан ишетеп килгән. Җиләк җыеп арган кешеләр сары, зәңгәр мәтрүшкә җыя, бу болыннарда алар да үсә икән.

“Быел җиләк күп түгел. Карап торышка гына күп күренә, җыя башласаң – вак. Шәле якларында күп дип әйтәләр аны. Сатуга түгел, үзебез, балаларыбыз өчен җыябыз. Җыйганыннан кайнатма ясыйбыз”, диде җиләкче Әлфия ханым.

“Җиләкне изеп, шикәр комы белән бутап катырсаң, әйбәт була. Бу болында инде күп түгел, җыйганнар, ваклары гына калган. Ә бит халык арасында йөргәндә ишетәсең, “Бер чиләк җыеп кайтканнар, җиләк күп”, дип сөйлиләр дә, безнең дә алар кебек күпләп җиләк җыясы килә башлый. Кеше бит Габдулла Тукай шикелле, “Күз ачып йомганчы, һичшиксез, җыярсың бер чиләк”, дип сөйли. Чынлыкта алай түгел шул. Берничә сәгать буе бер чиләкне җыярга кирәк. Сатып алсаң да бәяле, бер литры 200 сум, чиләге 1000 сум дип әйттеләр”, ди Хәтирә ханым.

Шигале авылы болыннарыннан кайткач, таныш-белешләрдән дә җиләк җыючылар турында мәгълүматлар тупладык. Мәсәлән, чыннан да Мамадыш районы авылларында да болын тулы җиләкче булган икән. Алар җыеп Казан белән Чаллыны тоташтыручы олы юл кырыенда сату иткәннәр. Авылдагы күпчелек кеше җиләк өлгерүгә иртәнге биштән болынга, урманга йөри башлаган. Бала-чагалар да, хәтта өлкән яшьтәге әби-бабайлар да бу эштән читтә калмаган. Иң яшь җиләк җыючыларга 6-7 яшь, иң олыларына 70-75 яшь булган. Мамадышларның күбесе җиләкне сату өчен җыя. Кеше әйтүенә караганда, җиләк шактый гына керем дә китергән. Каен җиләгенең литры 400 сумнар тирәсе булса, җир җиләген 100-200 сумнан сатканнар.

Азатлык та җиләк сатучыларны күреп, бәяләрне белергә дип Казанның Чех базарына барды. Мари Иленнән килгән Галина ханым инде җир җиләген сатып бетергән иде, бер литры 200 сум диде. Үзе өлкән яшьтә булса да, яшәргә акча кирәк дип кура җиләге, карлыган, җир җиләге, каен җиләге сата. Балалары, оныклары җыярга булышкан. Тырышабыз инде, яшәргә акча кирәк бит ди ул. Галина ханым белдергәнчә, җыю бер мәшәкать булса, Казанга килеп, базарда урын табып сата алу икенчесе. Монда аларны урын бирмичә, штрафлар түләтеп, куркытып та җәфалыйлар икән.

Запись Татарстанлылар бер-берсенә ияреп, Тукай шигырьләрен сөйләп җиләк җыя [видео] впервые появилась Tatar Today - татар яңалыклары..

Татарстанда янә көчле юл-транспорт һәлакәте. Ике кеше вафат [фото]

Редактор1 editor1 — Mon, 04 Jul 2016 08:28:48 +0000

Биектау районында көчле юл-транспорт һәлакәте булган. Ике кешенең гомере өзелгән.

3 июньдә иртәнге 7дә “Казан – Дөбьяз” юлының 24 километрында юл-транспорт һәлакәте була. Лада Калина машинасының капоты ачылып китә, машина йөртүче каршы юла чыгып, ГАЗель машинаы белән бәрелешә.

Нәтиҗәдә, җиңел машинада булган ике кеше вафат була.

Юл-транспорт һәлакәте урынында 5 махсус техниканың һәм 12 кешенең ярдәме кирәк була дип хәбәр итә гадәттән тыш хәлләр министрлыгы.

(мәгълүмат Автосправочная сайтыннан алынды)

Запись Татарстанда янә көчле юл-транспорт һәлакәте. Ике кеше вафат [фото] впервые появилась Tatar Today - татар яңалыклары..

“Рубин” футболчысы Гекдәниз Карадәниз төзи торган мәчет нинди булачак? [фото]

Редактор1 editor1 — Fri, 24 Jun 2016 10:15:22 +0000

“Рубин” футболчысы Гекдәниз Карадәниз ярдәме белән төзелә торган мәчет Биектау районында урнашачак. Бу хакта район башлыгы Рөстәм Кәлимуллин Instagram челтәрендәге сәхифәсендә хәбәр итте. //Татар-информ//

“Рубин” футбол клубы уенчысы Гекдәниз Карадәниз Биектау районында мәчет төзелешен финанслый” – Биектау районы башлыгы Рөстәм Кәлимуллинның социаль челтәрдәге сәхифәсендә бүген әнә шундый язмалы фото пәйда булды.

Узган елның көз айларында Татарстан Президенты Рөстәм Миңнеханов белән очрашу вакытында сигез елдан артык Казанда уйнаучы Төркия футболчысы Гекдәниз Карадәниз Татарстанда мәчет төзергә нияте барлыгы хакында белдергән иде. Тик ул чакта төзелешнең кайда урнашачагы билгеле булмады. Уенчы үзе мәчетнең юл кырыенда төзеләчәге, ә тәрҗемәчесе Яшәр Озҗан Биектау районы турында сүз алып барды.

Бүген исә без мәчетнең Биектау районы Калинино авылында төзеләчәген ачыкладык. Рөстәм Кәлимуллинның да Instagramга фото куюы очраклы булмаган. Биредә Карадәниз катнашында мәчеткә нигез ташы салынган. Биектау районы имам-мөхтәсибе Тәлгать хәзрәт Гайфуллин сүзләренә караганда, шул уңайдан корбан чалынган, догалар укылган, ә кич исә шул корбан итеннән ифтар мәҗлесе оештырылачак икән.

Тәлгать хәзрәт Гайфуллин мәчет төзү турындагы идеянең якынча бер ел элек тууы турында да белдерде. Футболчының тәрҗемәчесе Яшәр әфәнде аңа үзе чыккан. “Уйлап карасаң, Кол Шәриф мәчетеннән Арча юлы белән барсаң, бер мәчет тә юк. Ә хәрәкәт биредә бик көчле. Шуңа без мосафирлар өчен мәчетне шушы авылда төзергә тәкъдим иттек”, – ди ул. Шулай ук ул җәй ахырына мәчетнең манарасы күтәреләчәген, ә кыш көне эчке эшләр башкарырга планлаштыруын да хәбәр итте. Мәчеткә исемне “Карадәниз” дип кушарга ниятлиләр.

Мәчет менә шундый булыр дип планнаштырыла:

(фото Интертат сайтыннан алынды)

Запись “Рубин” футболчысы Гекдәниз Карадәниз төзи торган мәчет нинди булачак? [фото] впервые появилась Tatar Today - татар яңалыклары..