Мин үземне табиб итеп хис итә башладым инде. Күпләр табибка бардык, бронхит язып кайтардылар, дип зарланалар. Һәр кешегә үзенчә килә бу чир. Гадәти салкын тию генә дип уйлаучылар да бар. Табибларның бу очракта катгый рәвештә үзизоляциядә утырыгыз диюләре җитми, минемчә.

Сездә әлеге вирусның нинди билгеләре булды?

Иң беренче билгеләре — тән авырту, хәлсезлек. Аяклар, куллар, терсәкләр, баш авыртты. Баланы да күтәрә алмаслык дәрәҗәгә җиткән идем. Бер-ике көннән борын ис сизми башлады, авызда тәм бетте. Аннан соң температура 39га җитте. Парацетамол белән төшереп тордым. Ютәл башланды, күкрәк әчетә башлады, хәлсезлек дәвам итте. Компьютер томографиясе ясаттым. Үпкәнең 25 %ы зарарланган иде.

Хастаханәгә салу турында сүз булдымы?

Юк, андый тәкъдим булмады. Хастаханәдә урын да юк. Табиб чакырткач, коронавируска тест ясауларын таләп иттем. Тик ул: «Сезнең тест ясарлык билгеләрегез юк», — диде. Пандемиянең башлангыч чорында телевизорлардан бик катгый таләпләр дип күрсәттеләр, авыручыларны ябып куялар дип сөйләделәр, ә хәзер тест ясарга да рөхсәт итмиләр. Мәсәлән, җизнинең беренче тесты уңай булды. Өстәвенә, анда шикәр диабеты. Температурасы күтәрелгәч, төнлә хастаханәгә алып киттеләр. Тикшерделәр, томография үткәрделәр, үпкәсенең 33 %ы зарарлаган иде. Шуннан кулына кәгазь биргәннәр дә, иртәгә 7нче хастаханәгә килерсез дип, коронавирус белән чирле кешене кайтарып җибәргәннәр. Икенче көнне үз аягы белән хастаханәгә китте. Алты сәгать утырса да, аны хастаханәгә салмадылар. Мин артист буларак, танышларым аркылы да җизнине хастаханәгә сала алмадым. Ә гади кеше ничек ятарга тиеш, башка сыймый. Чынлыкта, авыручылар бик күп. Матбугатта бирелгән статистикага көлеп кенә карыйм. Көн саен иртәнге 3кә кадәр 200әр кеше белән язышабыз. Чирдән котылу ысуллары хакында сөйләшәбез, киңәшләшәбез.

Үзләрендә әлеге чирнең билгеләрен тоя башлаган кешеләргә нәрсә киңәш итәсез?

Борынга дару салырга, Д һәм С витаминнарын эчәргә. Беренче көннән үк антибиотик эчә башларга. Кан сыегайта торган дарулар эчәргә дә кирәк. Бөтендөнья парацетамолны мактады. Тик ул һәркемгә дә булышмый. Мәсәлән, улым Данилның температурасы 39га күтәрелде, аңа парацетамолның ярдәме тимәде. Ярты шешә уксусны тазга салып, төнге икегә кадәр юындырдым баланы, шулай тән температурасын төшердем. Данил ике көн чирләп алды. Башка балаларымда һәм иремдә әлеге чир күзәтелмәде. Барысына да витаминнар бирдем.

Ирем белән икебез ике катта яшәдек, бер-беребезгә якын килмәдек. Вируслар иярмәсен өчен савытларны нык кайнар су белән генә юдым. Балаларга виферон, анаферон бирдем. Үзем хәзер дә витаминнар эчәм, сарымсак, лимон һәм балдан торган катнашма ясадым. Анысын да күп ашарга ярамый, ашказаны эшчәнлегенә начар йогынты ясавы ихтимал.

Чирләмәгән кешеләргә нәрсә киңәш итәсез, нинди саклану чараларын күрергә кирәк?

Кеше һаман да ышанып бетми. Дустымның әнисе хастаханәдә ятып чыкты. Аңа бер ай буена үзизоляциядә торырга һәм юынмаска киңәш иткәннәр. Душ астында, салкын һавалы җирдә юынырга ярамый. Мунчадан соң да яңадан авырып китүчеләр бар. Битлеккә аракы сиптереп иснәп тору бик файдалы. Бу очракта һәрбер ысулны кулланып карарга кирәк. Вирус берничә сәгать эчендә үлә дигән нәрсәгә ышанмыйм. Бер чирләгән кешегә кире кайтырга да мөмкин. Температура, ютәл булмаган кешеләрнең дә берничә көннән күкрәкләре әчетә башлый. Томография үткәч, үпкәләренең зарарлануын белеп кайттылар кайбер танышларыбыз.

View this post on Instagram

A post shared by Venera AITOVA (@venera_aitova_official)

Чыганак: Шәһри Казан

Запись Лилия Муллагалиева: “Чынлыкта, коронавирус белән авыручылар бик күп” впервые появилась Tatar Today - татар яңалыклары..

“Барс-Медиа” ширкәте белән бәйле булган низаг турында кайбер җырчылар Инстаграм битләрендә үзләренең фикерләрен калдыра килделәр. Әмма күбесе бу вакыйгага бәйле бер сүз дә әйтми. Шул сәбәпле без дә моңарчы бу хакта сөйләмәгән кайбер җырчылардан бу шау-шуга бәйле фикерләрен ачыкладык.

Ришат Төхвәтуллин: “Минем дә сөйләр тарихларым күп, барысын да сөйләсәм, миннән дә популяррак кеше булмастыр. Әмма безнең тәрбия андый түгел. Мин артистлар арасында булган нәрсәне тамашачыга күрсәтергә яратмыйм һәм без алай эшләргә тиеш түгелбездер дип уйлыйм. Ландышка да, Иркәгә дә бер сүзем дә юк…”

Лилия Муллагалиева: “Үткече чирләр була бит, менә шуның кебек үткече булсын. Тирән эзләр калдырмый гына үтеп китсен. Әле бит халык күңелендә дә тирән яра булып кала ала бу вакыйга. Шуңа күрә зыян салмый гына үтеп китсен.  Бу инде аларның шәхси эше. Шулай ук бу әйбер дә аларның кызулыгы аркасында чыккандыр дип уйлыйм. Барысы да җайланыр. Миңа калса, бу пиар түгел…Гәйбәт сөйләү дә кирәкми, чөнки бумеранг дигән нәрсә бар, үзеңә кире әйләнеп кайтырга мөмкин.”

Рәсим Низамов: “Бу шәхси компания, шуңа күрә һәркемнең үзенчә эшләргә хакы бардыр. Мин беркемне дә гаепләмим дә, ачуланмыйм да. Мин беркемгә дә бәйле түгел. Читтән күзәтәм. Кем дөресен сөйли, ә кем юк икәнен вакыт күрсәтер. Бу очракта мин нейтраль кеше… Без сәхнә кешеләре бер-беребезне сүгәргә түгел, мактарга тиешбез. Сәнгать кешесе ул берсен берсе тартырга тиеш. Безнең эшебез җырлау, халыкка хезмәт итү.”

Зәйнәб Фәрхетдинова: “Бер сүз әйтмим. Үзләре чыгарган сүз, үзләре белә торгандыр…Әлек тә сүз йөртүләр булган, бөтен кешене дә яратып бетереп булмый бит инде. Әмма бүгенге көндә ул берәр пиар ход дип уйлыйм…”

Запись Барс-Медиа шау-шуына Ришат Төхвәтуллин, Лилия Муллагалиева, Зәйнәб Фәрхетдинова ни ди? [видео] впервые появилась Tatar Today - татар яңалыклары..

Танылган композитор-җырчы Зөфәр Хәйретдиновның 60 яшьлек юбилей концерты булып узды. Бу зур чарада күп кенә җырчылар чыгыш ясады. Шулай ук алар Зөфәр Хәйретдиновка, аның иҗатына һәм аңа карата булган мөнәсәбәтләре турындагы сорауларга җавап бирделәр. Сезгә шуларның кайберләрен тәкъдим итәбез.

Филүс Каһиров: “Хәтерлим, кечкенә чакта Зөфәр Хәйретдиновның “Пар алмагач” җырын җырлый идем. Ялгышмасам, бүгенге көндә бу җырны Әнвәр Нургалиев яңарткан. Бу бик әйбәт, чөнки аны тыңлаучылар күп. Шушы ретро җырларны башкару безнең җыр сәнгатенә файда гына инде. Димәк, урта буын гына түгел, яшьләребез дә тыңлап үсә.”

Ришат Төхвәтуллин: “Миңа “Шомырт бәйләме” җыры килеп әләкте. Зөфәр абый үзе шушы җырны башкаргач, сөйгән ярын тапкан икән. Миңа да шул җыр ярдәм итмәсме икән дип, мин дә шул җырны башкарып карадым. 3-4 ел җырлап йөрдем, тик файдасы булмады. Зөфәр абый, замана куып, иҗат итә торган композитор димәс идем. Җәй җәй түгел, кышы кыш түгел, ә җыры җыр түгел. Шуңа мин менә мондый элекке җырларны башкарырга яратам.”

Лилия Муллагалиева: “Ике дә уйламыйча ул миңа “Җыр керсен күңелгә” җырын бирде. Шушы җырыма беренче клибымны да төшердек. Шул заман өчен ул, руслар әйтмешли, модный иде. Бүген дә ул клип үз ролен уйнар иде.”

Зөһрә Шәрифуллина: “Безнең арада иҗади дуслык кына булмады, без гаилә дуслары. Без чит илләргә бергә ял итәргә йөрдек, балалар бергә укыды. Бүгенге көндә дә аралашып яшибез. Ә инде җырларга килгәндә, мин аның иң күп җырларын җырладым. Ул язган җырларын күбесен миңа бирә иде. Әлбәттә инде, иң популярларыннан “Су буенда учак яна” һәм “Соң булса да, уң булсын”. Популяр җырлары бик күп инде. Әмма минем иҗатымны популяр иткәне шул “Су буенда учак яна” җыры. Бездән соң да бу җырлар җырланачак.”

Фирдүс Тямаев: “Тавышың да, моңың да, үзеңнең энергетикаң да бар” – дип әйтә иде ул миңа. Бу сүзләрне ишеткәч миңа рәхәт булып китә иде. Һәрбер композиторның тарихка кереп калган җыры бар. Бүгенге көндә Зөфәр абыйның җырлары булмаган булса, нәрсәдер җитмәгән кебек булыр иде.”

Зөфәр абый җиде йөздән артык җыр иҗат иткән икән. Бер җыр озынлыгы өч минут булса, бөтен җырын тыңлап бетерергә якынча 2100 минут кирәк булачак. Кыскасы, 35 сәгать тоташ Зөфәр Хәйретдинов җырлары! Концертта шушы җиде йөз җырның кырык бере генә яңгырады.

Зөфәр Хәйретдинов татар эстрадасына яшәү чыганагы булып торган автор. Эстраданың яшәү көче булсын өчен берсеннән-берсе матур җырлар иҗат итеп торырга кирәк. Алга таба да татар эстрадасында нәкъ менә аның кебек авторлар булсын иде.

Запись Җырчылар Зөфәр Хәйретдинов турында нинди фикердә? [видео] впервые появилась Tatar Today - татар яңалыклары..

Татарстанның атказанган артисты Лилия Муллагалиеваны Казанның Уникс залындагы күренешләр борчуга салган. Ул бу хакта инстаграмында хәбәр итте.

Лилия Муллагалиевага беркөнне Уникстагы күренешне күзәтергә туры килгән. “Идән юучы ханым берүзе зур Униксның галәмәт зур фойесын юа, ә теге ишек төбендә утырган “сакчылар” пыр тузып ләчтит саталар. Өстәлнең ике башына утырганнар, башта талаштылар, аннан көлештелэр, әле бер, әле икенче темага кереп китәләр. Берәр сәгать уткәндер, идән юучы ханым өске этажны юуны тәмамлап, чистый хәлдән таеп, идән суырткыч белән ишек төбендәге келәмнәрне чистарта башлады. “Сакчылар” идән юучы ханымның эшләгәненә карап, идән суырткычының төрләре, модельләре турында пыр тузып, узышып-узышып сөйләшеп алдылар. Ханым өске этажны тәмамлап каядыр юкка чыкты. Ике сәгать узгандыр, без эшебезне тәмамлап китәргә җыендык. Мин көзге эзләп аскы этажга төшеп киттем. Төшсәм, мескенкәем теге идән юучы ханым, аскы этажда (анда тагы 3 этаж) алдагы көнне булган концертка килгән 1000 нән артык кеше таптаган идәнне, алар кулланган бәдрәфне узе, берүзе юып маташа. Нинди хәл соң бу? Уникс залының бер көнлек арендасы 160 мең. Күз алдына китерегез, көн дә концерт. Зур Уникска бер идән юучы. Гыйбрәт. Ул көн дә кергән 160000 кем кесәсенә китә микән соң? Шул акчадан этаж саен берәр идән юучыга хезмәт хакы чыкмый микән? Көндез ул ике “сакчы” нигә кирәк икән? Аның берсе дә житәр иде… Кыскасы, менә шундый хәлләр, дуслар. Кемнәрдер кемнәрнеңдер хезмәте аркасында баеп ята”, – дип яза җырчы бу күренешкә исе китеп.

Мәгълүмат Лилия Муллагалиева инстаграмыннан

Запись Лилия Муллагалиева: “Кемнәрдер кемнәрнеңдер хезмәте аркасында баеп ята” впервые появилась Tatar Today - татар яңалыклары..

View this post on Instagram

A post shared by ⚡️TATAR TODAY агентлыгы⚡️🌍 🔊📺 (@tatar_today)

Запись Лилия Муллагалиева: “Елый-елый кайттым” [видео] впервые появилась Tatar Today - татар яңалыклары..

“Укыдым да шаккаттым. Каян чыккан, кем уйлап тапкан нәрсә бу? Бер тапкыр күренер өчен, ярар Иске яңа елда тагын бер күрсәтерләр инде. Узган ел бер акча сорап баш катырдылар, инде быел ике тапкыр кыйммәтрәк ясаганнар. Гомер гомергә Яңа ел концерты бушка булды. Артистлар акча бастыра дип уйлыйсызмы әллә?” дип яза җырчы.

“Матбугат.ру” хәбәрчесе ТНВ телеканалы генераль директоры Илшат Әминовтан әлеге постка карата фикерен белеште: “Яңа ел кичәләрен төшерүдә катнашу бушлай булачак. Бүгенге көндә исемлектә 38 кеше бар. Әлбәттә, теләүчеләр бик күп. Алар барысы да “огонекта” бушлай катнаша. Ә акчага килгәндә, мондый инициатива реклама бүлегеннән чыккан. Әмма аларны да гаепли алмыйм. Һәр кеше үз эшен эшли”, – дип белдерде “Матбугат.ру”га Илшат Юныс улы.

Мәгълүмат: matbugat.ru

Запись ТНВ башлыгы Илшат Әминов Лилия Муллагалиева үпкәсенә җавап бирә впервые появилась Tatar Today - татар яңалыклары..

Татарстанның атказанган артисты Лилия Муллагалиева Казанның 18 нче хастаханәсенә флюорография үтәргә баручыларны һәм барырга җыенучыларны кисәтә.

Лилия Муллагалиеваның апасы әлеге хастаханәдә эшләүче Р.Ф. Раимова исемле табибның ялган тасвирлама язып бирүе аркасында харап була язган. Бу хакта җырчы инстаграмда хәбәр итә.

Лилиянең язылучылары да бу хәлгә битараф калмый. Әлеге язма астында кайбер табибларның белем дәрәҗәләре түбән булуга басым ясалган комментарийлар язып калдыралар. “Министерствога мөрәҗәгать итәсегез бар иде инде”, – дигән эчтәлектәге фикерләр дә калдыручылар бар. Лилия Муллагалиева министерствога да хат язган. Ләкин кешегә мәгълүмат тизрәк барып җитсен өчен, инстаграмда да бу турыда хәбәр итәргә карар кылган ул.

“Шушы табиб аркасында күпме кеше харап булды икән?” – ди җырчы һәм халыкны сак булырга өнди.

View this post on Instagram

A post shared by ЛИЛИЯ МУЛЛАГАЛИЕВА (@lilia_mul)

Мәгълүмат Лилия Муллагалиеваның инстаграмыннан

Запись Лилия Муллагалиева Казан хастаханәсендә эшләүче табиб турында: “Күпме кешегә зыян салды икән?” впервые появилась Tatar Today - татар яңалыклары..

Күптән түгел дүртенчегә әни булган Лилия Муллагалиева Инстаграмда балаларының фотосын урнаштырды. Әлеге фотода кечкенә Илһамның йөзе дә аңлашыла. “Көннәр буе кайнашабыз аның янында. Рәхәт. Аллага шөкер. Дүртенчебез”, дип язган җырчы. 

Лилия Муллагалиеваның язылучылары әлеге фото астында балаларына матур теләкләр теләгән һәм төпчекләрен әтисенә охшаган, дигән фикерләрен калдырган.

View this post on Instagram

A post shared by ЛИЛИЯ МУЛЛАГАЛИЕВА (@lilia_mul)

Запись Лилия Муллагалиева төпчек улын күрсәтте. Кемгә охшаган? [фото] впервые появилась Tatar Today - татар яңалыклары..

– Баланы табып була, үстерүе кыен, диләр бит. Сез инде болай да күп балалы гаилә. Тагын берне алып кайтасы булгач, күңелегездә,  ничек үстерербез, дигән курку булмадымы? 

– Андый курку бөтен кешедә дә буладыр, мөгаен. Ул ничек  яшәүгә дә бәйле түгел. Тормыш катлаулы. Безне дә ул уйлар борчымый түгел. Төрле хәлләр була. Илсур бизнесмен кеше, акчалы чагы да, акчасыз чагы да бар. Бүгенге көндә тормышыбыз Аллага шөкер итәрлек анысы, үзебез дә булганына канәгать булып яшәүчеләр. Һәр бала үз ризыгы белән туа, диләр, Аллаһы Тәгалә киләчәктә дә ярдәменнән ташламасын.

– Бераз гына җайсызрак сорау булса да, бирми кала алмыйм. Дүртенчесен дә алдан планлаштырып алып кайттыгызмы, әллә ул Аллаһы Тәгаләнең көтелмәгән бүләге булдымы? 

– Көтелмәгән бүләге булды дисәм, дөресрәктер. Тагын бәләкәчебез булыр дип планлаштырмаган идек планлаштыруын. Белгәч, төрлечә уйлап карадым. Әллә соң… дигән уй да кереп чыккалады. Ләкин ул адымга барырга бөтен җаным-тәнем каршы булды. Мин ул адымга бара алмадым. Ниндидер бер көч мине бу уйдан этәрде. Илсур белән, балалар белән киңәшләштек тә, Аллаһы Тәгалә язганына риза булыйк, дидек.

– Әле Ильясыгыз да бәләкәй. Нәни энесеннән көнләшер дип уйлыйсызмы? Баланы бу яңалыкка алдан әзерли тормадыгызмы? 

– Ильясны беренче көннән үк бу яңалыкка әзерләргә тырыштым. Бәләкәй бәби була дип, фотолар күрсәттек. Ахыргы көннәрдә ул бигрәк тә көтте. Бәби типсә, хәрәкәтләнсә, бик куана, хәзер яныма килеп, башын эчемә тери. Аңа күңелле булсын дип, мин шыпырт кына: «Абый!» – дим. Янәсе, аңа бәби эндәшә. Әй сөенә балакаем, үзе дә бәби белән сөйләшә башлый: «Әйдә, чык-чык», – ди. Алар өчен бу зур яңалык инде, Ильясы өчен генә түгел, олылары өчен дә. Көнләшмәс дип уйлыйм, ләкин алдагысын Алла гына белә.

– Безнең халыкта бәби туганчы бер әйбер дә алырга ярамый дигән ышану яши. Сез моңа ышанасызмы? Әллә инде бәбигә киемнәрне үзегез әзерләп калдырдыгызмы? 

– Андый ырымнарга ышанмыйм. Әзерләми генә булмый. Алдан ук әзерләп куярга кирәк дип уйлыйм хәтта. Караватларны җыеп, киемнәрне үтүкләп, барысын да әзерләп калдырдым.

– Бәләкәй улыгызга бик матур исем сайлагансыз. Кем тәкъдим итте аны? Нинди вариантлар арасыннан сайлап алдыгыз? 

– Күңелдә бер-ике исем бар иде барын. Беркөнне үзем турында газета-журналларда чыккан язмаларны барлап утырганда, берсенә күзем төште. Данил тугач, иң беренче биргән интервьюларымның берсе булган. «Безнең улыбыз туды, Данил исемен әтисе кушты, минем Илһам дип кушасым килгән иде», – дигәнмен. Шушыны укыдым да, Илсурга әйтәм: «Менә бит, безгә шушы исем кирәк булганга, Аллаһы Тәгалә дүртенчесен биргән инде», – дим. Мин аны бер билге дип кабул иттем. Бик матур исем шул Илһам. Илһамлы бала булсын.

– Сез – тәҗрибәле әни. Бала багуның әллә нинди серләрен беләсездер. 

– Әллә нинди серләрен белмим. Бәләкәйләрнең эче авыртучан була. Андый очракта мин биләүсәне җылытып, эченә куеп торам, аннары сәгать теле уңаена эчен ышкыйм, теземә яткырып карыйм. Башта халык кулланган ысулларны кулланасың, ул да булышмаса, медицинага мөрәҗәгать итәсең…

– Сез монда булганда, балаларыгызны кем карап торды соң? Ярдәмчеләрегез бармы? 

– Казанда бертуган Әлфия апам яши. Ильясны да бер-ике көн ул карады. Без кайтышка өйне әзерләшергә дә бүген ул килде. Атна буе малайлар гына булган өйне күз алдына китеререгез инде. Туганнарым бик ярдәмчелләр. Апаларым киләбез дип кенә торалар, чакыр гына. Әни дә шундый, автобуска чыгып утыра да, килә дә җитә.

…Менә инде ничә  көн рәттән күктән ишеп-ишеп ак кар ява. Карлар түгел, дөньяга яңа туган сабыйлар өлешенә дигән ак бәхет ява. Илһамлы бәхетегез белән котлыйбыз сезне, Лилия һәм Илсур! Исән-сау үстерергә язсын!

Сөембикә

Запись Дүртенчегә әни булган Лилия Муллагалиева: “Әллә соң… дигән уй да кереп чыккалады” [әңгәмә] впервые появилась Tatar Today - татар яңалыклары..

23 февральдә Казанда Лилия Муллагалиева дүртенче бәбиен алып кайтты. Бу яңалыгы белән җырчы үзе Инстаграмында уртаклашты. “Илһамчигыбыз туды! АЛЛАГА ШӨКЕР! БАРЫГЫЗГА РӘХМӘТ МИНЕМ БЕЛӘН БУЛГАН ӨЧЕН!!!”, дип язган бәхетле әни.

Сабыйның авырлыгы 3680 грамм, озынлыгы 54 сантиметр. Ире Илсур белән аларның ике улы һәм кызлары бар.

View this post on Instagram

A post shared by ЛИЛИЯ МУЛЛАГАЛИЕВА (@lilia_mul)

Запись Лилия Муллагалиева дүртенчегә әни булды. Матур исем кушмакчылар впервые появилась Tatar Today - татар яңалыклары..