– Зәлилә, синең белән әңгәмә алу көне үзенчәлекле булды дисәк тә була, чөнки иртә белән кар яуган иде. Син ничек кабул иттең бу вакыйганы? Син кышка әзерме? Беренче карны кайда күргән идең?

– Башымда гел бер шигырь йөри: “Иртә белән тышка чыксам, тараканнар кар көри”. Сентябрь азагында кар яву, сез әйткәндәй, тарихи вакыйга булды сыман. Чөнки, халык әйтмешли, беренче кар яуганнан соң 40 көн үткәч, кар ята. Димәк, октябрь азагында кыш килә дигән сүз. Һәм көтелмәгән вакыйгаларга һәрвакыта әзер булырга кирәк. Беренче карны туган ягымда күрдем. Минем өчен беренче кар бәйрәм белән күзаллана. Ул миндә тылсымлы хисләр уята.

– Тылсым дигәннән, тылсымга ышанасыңмы син?

– Ышанам. Мине әни: “Очма һавада, төш җиргә”, – дип ачулана иде. Ә бит һавада очмасаң, иҗат итү кыен. Җир кешесе булу – бастыра.

– Белгәнебезчә, синең чын исемең Зәлилә түгел. Ә чын исемең кем синең?

– Минем чын исемем – Рузилә. Зәлилә – миңа продюсерым, Рәшит Ваһапов фондының җитәкчесе Фәттахов Рифат Әхмәтович биргән исем.

– Рәшит Ваһапов фестиваленә килеп керү, клиплар төшерә башлау болар синең хыял идеме?

– Кечкенә чакта әлеге концертларны телевизордан караганда, минем дә шул сәхнәдә җырлыйсы килә иде, һәм 7-8 яшьтән үк мин артист булырга хыялланып йөрдем.

– Мактаучыларны, сүгүчеләрне ничек кабул иттең? Мәктәптә игътибар итәләр идеме?

– Бөтен кешегә дә ярап бетеп булмый. Дөресен генә әйткәндә, мәктәптә мине яратмаучылар күбрәк булды. Кечкенәдән җырларга бик ярата идем. Әни мине хореографиягә бирде. Хореография дәресләрендә касетадан музыка куеп, зал уртасында җырлый торган идем. Шуннан соң мине хореография укытучысы вокал укытучысына тәкъдим итте. Җыр сәнгатенә кереп китүем шулайрак башланды.

– Синең бу көдрәләреңне клипта күреп, Эльмира Кәлимуллинага да охшатканнар иде. Чәчләреңнең бөдрә тарихы ничегрәк?

– Чынында минем чәчәләрем туры. Ләкин мин бөдрә чәчләр турында бик хыялланам.

– Син чая кызмы? Күп егетләрнең йөрәкләрен яуладыңмы?

–Бу сорауга җавап биреп булмый(көлә). Минем уйларым иҗатта гына. Мин электән иҗатка гашыйк. Мин-карьеристка.

– Йолдызлыгың буенча син кем?

– Үлчәү.

– Димәк, синең тиздән туган көн. Татар эстрадасын беләсеңме? Кайчаннан белә башладың? ⠀

– Татар эстрадасын тыңлаганым юк. Кемнәр бар икәнен дә белмим. Миңа калса, эстраданы тыңласаң, үзеңне башкалар белән чагыштыра башлыйсың. Хәзерге татар эстрадасында мәгънәсез җырлар күбрәк һәм аларны тыңламасаң яхшырак

– Синең тиздән туган көн. Нинди буләк көтәсең? Ничек үткәрергә җыенасың?

– Мин үзем буләк ясамакчы булам. Әлегә әйтмим, сюрприз булып калсын. Мин ничектер бу бәйрәмгә тыныч карыйм, шау-шу итеп үткәргәнем юк. Мин тыныч кеше һәм шау-шу булган җирдә, үземне тынычландырырга тырышам. Һәрвакыт тыныч калсаң, нерваларың да саклана, үзеңә дә җиңел була дип саныйм мин. Бәлки миңа китаплар укуым шулай тәэсир итәдер.

/ДӘВАМЫ БАР/

Запись “Сарман”нан җырчы Зәлилә: “Хәзерге татар эстрадасында мәгънәсез…” [видеоинтервью] впервые появилась Tatar Today - татар яңалыклары..

Узган атнада Ваһапов фестивале йолдызлары Азат Абитов белән Гөлсирин Абдуллинаның туйлары булып узды. 

Әлеге туйның күңелле узуын, андагы җылы атмосфераны туйда булмаган кешеләр дә фото-видеолар аша күзәтте.  Гөлсирин Абдуллина үзенең инстаграм битендә урнаштырган чираттагы видео моны тагын бер кат дәлилли. Әлеге видеода Азат Абитов ишекне тибеп ачып, кайтып керә дә хатыныннан: “Ашарга кая?”- дип сорый.

https://www.instagram.com/p/Bz7dBcEnWlo/?utm_source=ig_web_copy_link

Мәгълүмат Гөлсирин Абдуллинаның инстаграм битеннән

Запись Азат Абитов үз туенда хатыныннан ашарга сорый впервые появилась Tatar Today - татар яңалыклары..

Ваһапов фестивале лауреатлары Азат Абитов белән Гөлсирин Абдуллина туйларын бәйрәм итә. Бүген туйларының беренче көне. Азатның сеңлесе дус кызлары белән бергә туйга бик үзенчәлекле бүләк әзерләгән. Бу хакта Азат Абитов үзенең инстаграм битендә яза.

Запись Азат Абитов белән Гөлсирин Абдуллинаның туе гөрли, беренче видеолар впервые появилась Tatar Today - татар яңалыклары..

Быел фестивальдә билгеле җырчылар белән беррәттән яшь башкаручылар бәйгесе финалистлары да катнашты. Фестивальне оештыручылар бу бәйгене ике елга бер мәртәбә үткәрә. Кырыктан артык башкаручы арасында быел гран-при иясе табылмады.

Беренче урыннарны күбрәк Башкортстан сәнгать көллиятләре укучылары алды. Гала-концерты тагын ниләр белән истә калды соң?

Концертта Казакъстанның халык артисты Роза Рымбаева катнашты һәм Флера Сөләйманова ререптуарыннан “Әниемә” җырын казакъ телендә башкарды. Әтиле-кызлы Гөлназ һәм Рөстәм Асаевлар дуэт белән чыгыш ясап гаилә көне белән котлады. Фестивальнең даими кунагы – Илһам Вәлиев бу юлы да бар иде. Италиянең иң абруйлы театрлары белән хезмәттәшлек иткән Рузил Гатин “Кара пулат” операсыннан ария башкарды.

Азатлык опера артисты Рузил Гатин белән сөйләште. Артист мондый чаралар туган телне популярлаштыра дигән фикердә:​

— Ваһапов исеменең танылганнан-таныла баруы, аның репертуарының даими өйрәнелүе татар кешесенә чынлап та бәйрәм инде ул. Аның исемен йөрткән фестиваль 15нче ел бара, вакыт шулкадәр тиз узган, моңа ышанып та бетә алмыйм. Үзем катнашмасам да, дусларым, коллегаларым катнашты, мин бу чара белән һаман кызыксынып, күзәтеп бардым. Яңа исемнәр ачылды, бу юлы да бик матур тавышлы берничә конкурсант бар. Димәк, телебез исән, моңыбыз онытылмый – бу иң мөһим әйберләрнең берсе.

Бу юлы тагын бер үзенчәлеккә игътибар иттем: яшьләр Ваһапов репертуары белән беррәттән соңгы елларда иҗат ителгән классик музыка үрнәкләрен башкара. Әйтик, “Кара пулат” (Эльмир Низамов музыкасы) операсы арияләрен. Димәк, фестиваль сәхнәдә урын таба алмаган әсәрләрне дә онытырга ирек бирми.

Жюри рәисе Ренат Ибраһимовтан “татар теле мәктәпләрдә авыр хәлдә калган вакытта мондый фестивальләр ни дәрәҗәдә ярдәм итә?” дип сорадык:

— ​Теләсә нинди мәдәни чара халыкның зәвыгын күтәрә, белемен арттыра. Рухи яктан бай кеше туган телнең кирәклеге турында сорауны күтәрми дә, моңа шикләнми дә. Ул әлеге мәсьәләнең бөтен тирәнлеген аңлый һәм телне саклау турында сөйләү белән генә чикләнмичә, билгеле бер гамәлләр кыла башлый. Фестиваль – шуның бер үрнәге.

Яшьләрнең әзерлек дәрәҗәсенә килгәндә, монда тавыш мөмкинлекләренә генә түгел, белем дәрәҗәсенә дә игътибар ителә. Алар инде беркайчан да “татар җыры” дигән тусовкага барып кермәячәкләр. “Татар җыры” – минем өчен татар үзешчәнлеге ул. Ул элек клуб үзешчәнлеге дип йөртелә иде. Хәзер аңа югары мәдәният статусы бирделәр, гәрчә чеп-чи үзешчән сәнгать булса да. Бәлкем шул төркемнең 10 процентын аерып профессионал артистлар әзерләү юнәлешендә эшләп буладыр, ә калганнары турында әйттем инде.

Татарстан Дәүләт шурасы рәисе Фәрит Мөхәммәтшин фестивальне унбиш еллыгы һәм гаилә көне белән котлады. Мондый чарага гаилә белән җыелып килергә чакырды. “Соңгы елларда татар эстрадасының дәрәҗәсе күтәрелде дип уйлыйм. Республика җитәкчелеге ярдәме белән махсус чаралар оештырыла. Дәүләт Советының милли мәсьәләләр комитетында милли мәдәниятне, сәнгатьне үстерү һәрвакыт көн үзәгендә тора”, диде Фәрит Мөхәммәтшин. Фестивальне оештыручы Рифат Фәттахов исә Фәрит Мөхәммәтшинны шушы чараның “рухи атасы” дип атады. Ул иң беренче фестивальгә хәер-фатиха биргән булган икән.

Ваһапов фестиваленең бәйгесе ике елга бер мәртәбә үткәрелә. Ике ел элек катнашырга теләк белдерүчеләр 125 булса, быел 157 гариза кабул ителгән булган. Шуларның 1-3нче урыннарны алучылары концертта катнашты. Иң кызыгы – күпчелек номинациядә беренче урыннарны Башкорстаннан килгән студентлар алды. Әйтик, академ вокал номинациясендә беренче урынны Айзат Адылгәрәев һәм Камилә Шакирова алды. Алар икесе дә Башкортстанның Октябрьски музыка көллияте шәкертләре. Эстрада җыры номинациясендә беренче урын бирелмәде. Икенче урынны Октябрьски музыка көллияте укучысы Эдуарда Марченко алды. Вокал ансамбль номинациясендә дә беренче урында Башкортстан вәкилләре — “Караван” төркеме. Халыкчан башкаруда беренче урын Казан дәүләт консерваториясе студенты Булат Закировка бирелде.

Без жюри әгъзасы, Татарстан дәүләт җыр һәм бию ансамбле хормейстеры Венера Гәрәевадан, “кырыкка якын финалистның кайсыларын исегездә калдырдыгыз?” дип сорадык:

— ​Сөмбел Заһидуллинаны аерып әйтер идем. Мин аны Әлфия Авзалованың дәвамчысы итеп күрәм. Ни дәрәҗәдә моң бит бу балада. Аннан Булат Закиров бик өметле егет. Моңы да бар, белеме дә тирән. Киләчәктә без аны чын халык җырчысы итеп күрәчәкбез әле. Аңа училищеда укыган вакытында ук әйткән идем. Берзаман күңеле дә сүрелгән иде аның. “Йолдызлык” фестивалендә катнашкан да, үткәрмәннәр икән үзен. “Энем-җаным, алар бик каты ялгышканнар. Киләчәк беренче урын алган бу кыз бала кулында түгел, синең кулыңда”, дидем. Мин хәзер инде ышанмыйм, ди. Ышан энем, татар милләтенең чын йөзе булачаксың, дидем. Чынлап та эшләр шуңа бара бит. Затлы, аңлап башкара.

Мине бүген иң борчыганы – көйләрне дөрес итеп башкармау. Әгәр хәзерге буын дөрес башкарырга өйрәнеп калмаса, киләчәктә матур җырларыбыз бозылачак. Ә җыеп әйткәндә, финалистларның һәрберсе ошады миңа. Халык җырларын җиренә җиткереп башкаралар. Ваһапов фестиваленең төп максаты шушы бит инде аның. Тагын бер проблем – Ваһаповта җырлаган җырчылар телевизорда бик күренми. Аңлыйм, эфир акча белән бәйләнгән. Мин исә худсовет ясар идем дә, эфирны чистартып, бу балаларны экранга чыгарыр идем. Монда эстрада җырчылары да, халыкчан башкаручы да, академ башкаручылар да бар. Чөнки халыкның тәрбиясен күтәрергә кирәк. Бу яктан бик күпне югалттык. Залга игътибар итсәгез, күбесе өлкән яшьтәгеләр. Бу буын да үтеп беткәч, татар җырын тыңларга кеше калмаячак.

Тамашачының күпчелеге чакыру билеты белән килгән иде. Сатуга куйган билетларның уртача бәясе 1000-1500 сум. Фестиваль тамашачыны зәвыклы концертларга ияләштерү юлларын эзләргә кирәклеген тагын бер мәртәбә раслады.

Запись Ваһапов фестивале гала-концерты ниләр белән истә калачак? [зур фото-видеорепортаж] впервые появилась Tatar Today - татар яңалыклары..

Ваһапов фестиваленең Татарстан Мәдәният миинистрлыгында үткән матбугат конференциясендә Рөстәм Асаев кызы Гөлназның фестивальдә катнашкан вакытта җиңмәвенә шат булуын әйтте.

2006 елда әлеге фестивальдә үзе дә катнашып, лауреат исеме алган булган. “Соңрак кызым да катнашты. Әле ярый аңа беренче урын бирмәдегез” ди Рөстәм Асаев.

“Артистларның балалары катнашып, беренчелекне яулагач, халыкта тискәре фикер туа, тикшеренә башлый,”- дип аңлатып китте ул үз фикерен. Шулай итеп, Рөстәм Асаев һәм Гөлназ Асаева фестивальнең торле еллардагы лауреатлары. Алар кунак буларак, юбилей концертында катнашачаклар.

Ваһапов фонды рәисе Рифат Фаттахов хәбәр итүенчә Ваһапов фестиваленең гала-концертында антракт ифтар сәгатенә туры китереп ясалачак. Фестивальнең 15 еллыгына багышланган гала-концерт 15 майда С.Сәйдәшев исемендәге Дәуләт зур концертлар залында узачак. Юбилей концерты Рамазан аена туры киләчәк һәм оештыручылар моңа игьтибар итмичә кала алмыйлар. Рифат Фәттахов әйтүе буенча, концерт көнне Зур концертлар залында намаз бүлмәсе дә әзерләнәчәк. “Буфетта исерткеч эчемлекләр дә булмаячак дип сөйләштек”, – диде ул.

Фото: Татар-информ

Запись Әтисе Гөлназ Асаева турында: “Әле ярый аңа беренче урын бирмәдегез” впервые появилась Tatar Today - татар яңалыклары..

13 апрельдә II нче бөтенрусия “Дуслык күпере” татар-башкорт җыр фестивале старт алды. Беренче концерт Казанның “Пирамида” тамаша залында узды.

“Дуслык күпере”н “төзергә” алынучылар – татар-башкорт сәхнәсенең танылган җырчы-артистлары, дәүләт ансамбльләре. Концертта Гүзәл Уразова, Айдар Галимов, Илсөя Бәдретдинова, Әнвәр Нургалиев, Элвин Грей һәм башка популяр җырчылар белән берлектә, Ваһапов фестивале яшьләре Гөлсирин Абдуллина, Азат Абитов, Ранис Габбасов катнашты.

Кичәгә шагыйрьләр, җәмәгать эшлеклеләре, композиторлар да чакырылган иде. Тамашачылар рәтендә Роберт Миңнуллинны, Индус Таһировны һәм башка татарның билгеле шәхесләре тамаша кылды.
“Дуслык күпере” 13 апрельдә старт алып, 29 апрельдә Уфада йомгакланыр дип көтелә. Тамашалар Пенза, Төмән, Сургут, Чаллы кебек шәһәрләрдә үтәчәк. Халык артистлары, татар шәхесләре, фестивальне оештыручылар проектның дәвамлы булуын теләүләрен әйтте.

Рәшит Ваһапов фонды фотолары

Запись Гүзәл, Элвин, Әнвәр, Азат&Гөлсирин…200дән артык артист “Дуслык күпере”ндә [ШӘП ФОТОЛАР] впервые появилась Tatar Today - татар яңалыклары..

Монысында да буш урыннар күренмәде. Әмма соң­гысына эләккән тамашачылар бу көнне ике гаилә барлыкка килүнең шаһитлары булды.

Бу концертның үзен­чә­леге шунда: биредә моңлы җырлар колакны иркәли, инде онытылып баручы көй­­ләр­­гә яңача җан өрелә. Рәнис Габбасовның Илһам Шакиров, Рәшит Ваһапов репертуарыннан булган җыр­­ларын тамашачы алкышларга күмде. Сәхнәгә оялып кына килеп кергән кәләпүшле егет бүген үзен иркен тота. Җае чыкканда мактанып та алды әле. Ваһапов исе­мен­дәге бәй­ге­дә катнашып, иң зур бүләк – машина эләк­тер­гәнен дә, Азаттан алдан өй­ләнүен, инде хәзер дүрт ай буена бәхетле әти икәнен дә яшермәде. Әгәр Айсылу Габ­­динова вакыт-вакыт “уры­нына утыртып” алмаса, Рәнис әллә ниләр сөйләп ташлар иде. Тик аның сөйләве дә кү­ңелгә ял бирә бит. Рәхәт­ләнеп, гади итеп, нәкъ без­неңчә сөйли ул! Менә шул вакытта дус егете дә түзмәде, сәхнәгә менеп, микрофон сорады. Алты ай гына очрашып йөргән сөй­гәнен үз янына чакырып: “Мин сиңа бик тиз ия­лән­дем, хисләрем ташый, чык миңа кияүгә!” – диде. Тамашачы бу кыю егетне алкышларга күмде. Әле кон­церт ахырында ниләр көткәнне күпләр белми иде.

Айсылу үзенә генә хас иркен тавышы белән залда утыручыларны моңга күм­де. Уйландырды да, күзгә яшь тә китерде, күңелне дә җилкетте аның җырлары. Азат исә, сәхнәгә чыгуга, тамашачыга: “Гөлсирин белән минем арада – иҗади дуслык, бергә эшлибез”, – дигән булды. Шыгырданнан килгән бер автобус авылдашы, туганнары янында әнә шулай дип сөйләнеп торган булды. Алар башкаруында “Ак­кошлы күл” җыры йө­рәкләргә үтеп керде. Бик ос­та итеп, гашыйк парларны уйнады алар. Азатның Гөл­сириннең биленнән җы­лы итеп кочаклап торуы, җыр тәмамлангач та аерылыша алмаулары бераз күңел­гә шик кертте кер­түен. Җит­мә­сә, Азатның әти-әнисе икесе­нә дә матур чәчәкләр бүләк итте. Иң соңгы номер вакытында Азат җырлап торучы дусларын туктатты.

– Гөлсирин, беләсең бит инде, мин сине яратам. Әмма матур сүзләрне күп ка­батлау – минем өчен түгел. Сиңа булган хисләрем “Аккошлы күл” җырын­да­гыча. Чык ми­ңа кияүгә, – диде. Гөлсирин яшьләрен тыя алмады. “Мин риза”, – ди­гәне генә ишетелде дә, Азат­ның куенына сыенды. Тамашачылар арасында, алдыйсыз, юри эшлисез, дип тә кычкыручылар булды. Хәтта Мамадыш райо­нының Урта Кирмән авылыннан тамаша кылырга кил­гән Гөл­си­риннең әти-әнисе дә бу хакта берни белмичә калган.

– Мин моны концерт сценарие буенча кирәкле әйбердер дип белдем. Карасам, хатыным Ләйлә елап утыра. Шуннан соң гына чын икәненә ышандым, – ди әти­се Ришат.

– Мин үзем дә болай булыр дип көтмәгән идем, – ди, сүзгә кушылып, Гөлси­рин. – Нәкъ менә шушы көн­не тәкъдим ясар дип башыма да килмәде. Безне продюсерыбыз Рифат абый Фәт­тахов кавыштырды. 2015 елда без бергә эшли башладык. Ул вакытта Азат­ның – йөргән кызы, минем егетем бар иде. Озак та үт­мәде, Рифат абый безгә “Әл­лә нинди язмыш булды” дигән җырны бирде. Бу җыр араны якынайтты. Баш­та дуслар гына идек, аннан соң бер-бе­ре­безне ошатканыбызны аң­ладык. Хисләр мәхәб­бәткә әйләнде.

Азат исә тәкъдим ясау турында бик озак уйланган. Аның әти-әнисе, туганнары да бу көнне киленле буласыларын белеп килгән икән. “Тормыш кору – уен эш түгел. Гөлсирин еш кына, әле кияүгә чыгарга иртә, дип әйтә иде. Әзер түгел­леген дә җит­кер­де. Шуңа да баштарак уйланып калдым. Әмма хисләрем нык булгач, тәкъдим ясадым. Сәхнәдә сөйгәнемнең кулын сорау –хыялым иде”, – ди ул.

Яшьләр өчен бар кеше дә сөенде ул көнне. Әти-әни­ләре, туганнары гына түгел, тамашачылар да изге теләк­ләрен теләде. Киенү бүлмә­сендә чират торганда, хәер­ле сәгатьтә булсын, сөенеп яшәргә язсын, бәхетле парлар булып гомер итсеннәр, дип теләп торучылар булды. Инде хәзер йөзләгән тамашачы алдында гаилә корырга риза булган яшьләр никахка әзер­ләнә. Туйны җәйгә уздырасылар икән. Азат ул көнне Гөлсиринне сәхнәгә, буташтырган булып, Абитова дип тә чакырып чыгаргалады. Әмма, хикмәт, фами­лиядә түгел бит, иң мөһиме – җырларындагыча аккошлар мәхәббәте телик аларга!

(Гөлгенә ШИҺАПОВА/“Ватаным Татарстан”, /№ 33, 02.03.2019/)

Запись Гөлсириннең әтисе: “Карасам, хатыным елап утыра. Шуннан соң гына ышандым” впервые появилась Tatar Today - татар яңалыклары..

20 ноябрь көнендә Габдулла Тукай исемендәге Татар дәүләт филармониясе залында алар тулы залга концерт куйды. Концерт буласы көнне кассада өч кенә билет калганлыгы турында хәбәр иткән иде оештыручылар. Шул ук көнне февраль аенда өстәмә концерт куюлары турында да билгеле булды.

Ә концерт карарга кил­гән халык Ваһапов фестивале җырчыларын тамашага керер алдыннан ук сыный башлады инде. “Рәнис фәлән җырын җырлармы икән?”, “Гөлсирин белән Азат чыннан да йөриләрме?”, “Айсылу яңа җырын башкарсын иде” – халык менә шундый кызыксыну белән җыелды. Концерт бераз гына соңарып башланса да, җырчыларның сәхнәдә каушаулары сизелсә дә, халык аларны кичерде. Егет-кызларның моңнары аларга мондый гадәти җи­тешсез­лекләрдән мең кат кадер­ле­рәк булып чыкты. Алар, үзлә­ре әйтүенчә, иҗат­та Хәйдәр Бигичев, Илһам Шакиров, Рәшит Ваһапов кебек олпат шәхесләргә таяна, аларның мирасын халыкка җиткерүне изге бурыч итеп саный. Шуңа да популяр җырлар белән беррәттән, халык җырларын да яңгыратты егет-кызлар. Яңа иҗат җимешләрен дә ишетеп булды.

Ваһапов фестивале җыр­чылары бу кичтә җырлап кына калмады, концертны алып та барды. Кон­цертның сценарие аларның тормыш вакыйгаларына нигезләнгән иде. Егет-кызларның алып баручы буларак сәләтләре әле ачылып кына килә икән шул. Сөйлисе сүзләре ятланган булуы сизелеп торды. Алып бару эшен иң җиңел башкарып чыгучы Айсылу Габдинова булгандыр. Аны без телеви­дениедә дә, бүтән концертларда да алып баручы буларак күргән идек, шу­ңа да теле чарланган, тәҗ­рибәсе дә юк түгел кызның.

Азат Абитов белән Рәнис Габбазов, мәсәлән, бер-бер­ләренә төрттереп, янәсе, узышып яшәүләренә басым ясады. Рәнис исә Азаттан күп нәрсә белән өстенрәк булып чыкты: Рәшит Ваһапов фес­ти­валендә гран-при иясе дә ул, дүртесе арасында гаилә корып яши башлаучыларның да беренчесе, әти кеше дә! Үзенең ул атасы булуы һәм тормышында яңа этап башлануын кат-кат искәртте Рәнис. Азат та төрттерә белеп төрттерә: “Исемем дә, гәүдәм дә Рә­нис­тән матуррак!” – ди.

Азат Абитов белән Гөл­сирин Абдуллина мөнәсәбәт­ләренә дә бу кичтә ачыклык керде кебек. Сәхнәдән Азат болай диде:

– Без Гөлсирин белән бер-беребезне яратабыз… дип уйлый күрмәгез инде! Без – иҗатташ дуслар.

Азатның бу сүзләре генә халык арасындагы имеш-мимешләрне туктатмады, бил­­геле. Тамашачыда алар­ның бергә булачакларына өмет барыбер калды. Парлап мәхәббәт турында җырлар башкарып, бу өметне тагын да көчәйтте төсле алар.

“Кияүгә кайчан чыгасың?” – Айсылу Габдиновага менә шушы сорауны еш бирәләр икән. “Шушы сорауны бирү­челәргә: “Кияүгә чыктым!” – дип әйтәсе килә минем. Үз янымда акыллы, тырыш, юмор хисе булган кеше кү­рергә телим. Филармония залында андый егет бармы?” – дип сорады ул сәхнәдән. Бу җәһәттән махсус “Өйлән, давай” исемле җыр да иҗат ит­кәннәр әле.

Рәшит Ваһапов фонды җитәкчесе, продюсер Рифат Фәттахов яңа концерт программалары уңышлы бара дигән фикердә.

– Концертларыбыз Рә­шит Ваһаповның 110 еллыгына багышлана. Алар­ның төп уңышы – 100 процент аншлаг булуда. Бу инде Ваһапов фестиваленең халыкка кирәк булуын дәлил­ли. Яшьләребез өчен дә моны зур уңыш дип саныйм. Бүген тамашачы җыю авыр. Безнең концертыбыз халык тарафыннан җылы кабул ителде, – дип әйтте ул.

(Чулпан Гарифуллина, “Ватаным Татарстан”, /№ 170, 24.11.2018/)

Запись Айсылу Габдинова: “Кияүгә чыктым!” дип әйтәсе килә впервые появилась Tatar Today - татар яңалыклары..

“ТНВда яңа гына ” Болгар радиосы”ның “Кайнар хит” парады тәмамланды. Анда безнең Гөлсирин Абдуллина белән Азат Абитов та “‘Аккошлы күл” җыры белән катнашты. 15 меңнән артык тавыш җыеп, җиңүчедән бераз гына калыштылар. Беренчедән, Гөлсирин, Азат! Сезгә әфәрин! Котлыйм сезне ихлас күңелдән! Икенчедән, безнең Азат һәм Гөлсирин өчен тавыш биргән тамашачыларга бик зур рәхмәт! Һәм – иң мөһиме! Без бу ай нәтиҗәләрен гадел һәм дөрес түгел, дип саныйбыз! Чөнки тавыш бирүнең бер юлы – атна буена СМС тавышлар бирү мөмкинлеге дә бар иде. Без, безнең теләктәшләребез бу юлны бик актив файдаландык. Әмма… Сайтта һаман ноль дә ноль иде. Ачыклый башладык… « Цифровая технология” системасында… техник проблемалар бар икән! Менә сиңа мә! Бик тырыша торгач, 99 тавышны кайтара алдык. Һәм… Тагын тавышлар югала башлады. Теләктәшләребез шалтырата, Азат белән Гөлсирин өчен 200 тавыш бирдек, кая безнең тавышлар?, диләр. Без бу сорауны “Болгар радиосы” баш мөхәррире Илфар Кәримовка да юлладык. Җавабы шул ук: “Системада техник проблемалар”. Димәк, безнең йөзләгән, бәлки, меңләгән тавыш югалды, урланды. Гаделсезлекнең иң югары чиге! Атна буе тавыш җыю системасы эшләмәгән икән, димәк, аның нәтиҗәләре дә дөрес түгел! Шуны истә тотып, без ноябрь ае «Кайнар хит» нәтиҗәләрен законсыз дип таныйбыз һәм аларны гамәлдән чыгаруны таләп итәбез! Ә Гөлсирин белән Азатка борчылмаска киңәш итәм, чөнки реаль чынлыкта җиңүче – сез! Бу һәркемгә мәгьлүм! Сезгә яңа иҗат уңышлары телим! Җиңүченең кем икәнен вакыт күрсәтер!” – дип язган Рифат әфәнде үзенең инстаграмында.

View this post on Instagram

A post shared by Рифат Фаттахов (@r_fattakhov_)

“Бу техник кимчелекнең тавышларны кабул итүче цифровые технологии компаниясенә бер катнашы юк. Юллаган тавышлар бер кая китмәде, җыелып барды. Ә “Болгар радиосы” сайтында техник кимчелекләр булу сәбәпле, безнең сайтыбызда күренмәде генә. Тик безнең сайтның тавышларга бернинди йогынтысы юк бит. Анда бары тик килгән тавышлар статистикасы гына күренеп бара”, дип аңлаткан Илфар Кәримов.

“Син, Илфар, баштарак сөйләшкәндә нәкъ менә “цифровая технология” турында сүз алып барган идең… Бу гаделсезлек эчендә үзегез дә буталып беттегез бугай”, ди фонд җитәкчесе. Рифат әфәнденең сүзләрен Лилия Муллагалиева да хуплый. “Безнең дә “Әниләр һәм бәбиләр” проекты катнашкан атнада шул ук хәл булды. Дөреслек юк Рифат әфәнде…Кызганыч…”, дип яза җырчы.

“Рифат Әхмәт улы, сез һәм Гөлсирин белән Азатның җанатарлары атна дәвамында юллаган смс тавышлар беркая да югалмады, техник сәбәпләр аркасында, безнең сайтыбызда гына күренмәде. Кабатлап әйтәм, моның тавышларга бер йогынтысы юк иде. Атна дәвамында җыелган барлык тавышлар да бүгенге тавышларга кушылды. Кызганыч, бу ярыш. Ә ярышта җиңүче һәм җиңелүче була. Тик, Гөлсирин белән Азатны җиңелде дип әйтеп тә булмый, чөнки алар бик күп тавыш җыйды. Тик беренчелеккә әз генә җитмәде. Гөлсирин белән Азатның иҗатын һәм Ваһапов фестиваленең эшчәнлеген хөрмәт итәбез. Сезгә киләчәктә дә иҗади уңышлар һәм тамашачының бүгенгедәй чиксез мәхәббәтен телим. Хөрмәт белән Илфар Кәримов”, дип язган “Болгар радиосы”ның баш мөхәррире.

Әлеге мәсьәләгә тамашачыларның фикере төрле. Берәүләр Азат белән Гөлсиринне яклый, икенчеләре Рифат Фәттаховка шелтә белдерә.

“Сезнең уегыз һәрвакыт кемнедер тәнкыйтьләүдә, хурлауда һәм гаепләүдә булды инде. Башка артистлар бер дә болай итмәде. Азат белән Гөлсиринне кыен хәлгә куймагыз зинһар”, дип яза бер ханым.

“Ай-һай, сөйләгән кеше бар да дөрес. Карачурина ямьсез җырлый мени?” – дип язып калдырган Галия туташ.

Запись “Карачурина ямьсез җырлый мени?” Кайнар хит нәтиҗәләре Ваһапов фонды җитәкчесенең ачуын чыгара[бәхәс куба] впервые появилась Tatar Today - татар яңалыклары..

Әлфия Авзалованың фестивале турында тискәре фикерләр күп булды. Гала-концертны, мәсәлән, халыкара “солянка”га әйләнде дип тә сөйләделәр. Бәйгенең жюри рәисе Венера Ганиева бу сүзләр белән килешмәде. Ул безгә акча артыннан кумавын, чын күңелдән иҗат, шәкертләрен укыту белән шөгыльләнүен сөйләде.

– Халыкара “солянка” дип әйтү дөрес түгел. Бу безнең тар күңелле булуыбызны күрсәтә. Әлегә кадәр республикабызда узучы бер бәйге турында да уңай фикер ишеткәнем булмады. “Татар моңы”, “Үзгәреш җиле”, Ваһапов фестиваль-концертыннан соң да “менә ичмасам шәп узды” дип язмадылар. Бәйге булгач фикерләр дә төрле була, моны дөрес аңларга кирәк,  дип башлады сүзен Әлфия Авзалова фестиваленең жюри рәисе.

– Венера ханым, ни өчен мәшһүр татар халык җырчысы фестивалендә әллә ни билгеле булмаган чит ил кешеләрен чакыртып җырлату, биетү кирәк иде?

– Конкурсның нигезләмәсе әзер булгач, Әлфия апаның кызы белән кияве Зөлфия һәм Равил Нигъмәтҗановлар, бәйгенең дәрәҗәсен күтәрү ниятеннән Европа ассоциациясенә мөрәҗәгать иттеләр. Европада узучы конкурсларда катнашу өчен бөтен дөньядагы музыкантлар, җырчылар һәм биючеләр шушы ассоциация аша анкета тутыра. Чит илдән килгән катнашучыларыбыз да безгә әнә шулай үзләре теләк белдереп килделәр. Килешәм, безнең биюләр белән аларныкын чагыштырып та булмый. Махсус шушы бәйге өчен барлык чыгымнарны үзләре күтәреп Һиндстаннан, Американың Монтана штатыннан килгән катнашучыларны гала-концертта күрсәтмичә кире борып кайтару безнең тарафтан матур булмас иде. Читтән килгән кунакларны ачык йөз белән каршы алып, мең еллык Казаныбызның истәлекле урыннарын күрсәтеп, тиешле дәрәҗәдә кунак итеп озатып җибәрә алуыбыз белән без бәхетле.

– Алып баручылар Салават Фәтхетдиновны да жюри әгъзасы дип әйтте, Салават әфәнде безгә, минем монда бернинди катнашым юк диде. Моны ничек аңларга?

– Конкурсның генераль продюсеры итеп Салават Зәки улының кулы куелды һәм ул җюри әгъзасы булып билгеләнде. Аның килү-килмәве миннән тормый. Шуңа күрә кеше өчен җавап бирә алмыйм. Бәйгегә килмәгәч, жюрида утырмагач нәрсә дисен инде? Әлбәттә катнашым юк, дип әйтәчәк. Минемчә, продюсер ул бик зур вазыйфа. Әлеге фестивальгә ул да үзенең өлешен кертә ала иде. Бәлки, соңгы нәтиҗәләргә йогынты да ясаган булыр иде. Ләкин ул килмәде.

– Венера ханым, Әлфия Авзалова фестивале сезнең укучылардан торган “йолдызлар фабрикасы”на охшап калды дигән фикерләр әйттеләр. Моңа бит җирлек бар, катнашучылар, җиңүчеләр арасында сезнең укучылар балкыды!? Нигә сез гел үзегезнең укучыларны гына үстерү яклы?

– Минем укучыларым җырлый белгәнгә мин гаепле түгел бит! Жюри әгъзалары абруйлы шәхесләр. Алар белән ике көн дәвамында сайлап алу турларын үткәрдек. Җиңүчеләрне дә гадел итеп, бер фикергә килеп барладык. Гран-прины бирү буенча гына бераз канәгатьсезлек белдерүчеләр булды. Ләкин минем намусым чиста. Илнар Миранов эстрада жанрында, ә халыкчан җырлау буенча Лилия Хөсәенова гран-прига ия булды. Әлфия апа җырчы булгач, гран-прины да җыр жанрларына бирергә булдык. Үзем жюри рәисе буларак, концертта шәкертем Марсель Вәгыйзов белән җырладым. Конкурста “Элмәлек”не Лилиана Ирназаровадан да яхшырак җырлаучылар булмады. Илнар Мирановны алкышлаган кебек берәүне дә алкышламадылар. Илнар Ялаловка килгәндә, ул триода, ә Раяз Фасыйхов ялгыз җырлады. Алинә Шәрипҗанова жюрида утырды һәм концертта кунак буларак катнашты. Укучыларым яхшы җырлаганга минем гаеп юк. Яхшы укытучы булсаң, шәкертләрең дә яхшы булачак. Җиңүчеләр арасында сезнең укучылар балкыды, дисез. Минем укучыларым бик сәләтле һәм актив. Бу безнең алар белән уртак тырышлыгыбыз нәтиҗәсе. Мин теләгәнгә генә түгел, алар үз тырышлыклары белән сәхнәгә менгән җырчылар. Бүгенге көндә Ваһапов фондында хезмәт куючы җырчыларның дүртесе дә минем укучыларым. Җыр һәм бию дәүләт ансамблендә дә, “Бермәнчек”тә, Опера театрында, Айдар Фәйзрахмановның ансамблендә, Казан шәһәр филармониясендә һәм тагын бик күп дәрәҗәле урыннарда эшли миндә белем алып, тәҗрибә туплап чыгып киткән укучыларым. Шуннан чыгып безнең институтны йолдызлар чыгаручы фабрика дип атарга була. “Йолдызлар фабрикасы” дигән сүз дә минем күңелемә хуш килә.

– Фестиваль дәүләт һәм спонсорлар ярдәме белән үтте. Нигә катнашучылардан 2 мең сум акча җыярга кирәк булды?

– Финанслау бик әз булды. Гомумән, конкурсның чыгымнары күп. Мисал өчен “Татар моңы” конкурсын уздырырга 5 миллион, Ваһапов фондына 12 миллион бирсәләр, Әлфия Азвалова исемендәге бәйгегә нибары 600 мең сум күчерелде. Гомер буе татар җыр сәнгатенә хезмәт иткән олугъ җырчыны шулай түбән бәяләргә ярамый дип саныйм. Конкурс кысаларында Әлфия апага кабер ташын да куярга теләгән идек. Президенттан акча бирелүгә карамастан, таш әлегә кадәр әзерләнеп бетмәде, кызганыч.

– Ни өчен үзегезгә шулкадәр күп авырлык аласыз – “Үзгәреш җиле“, “Сөембикә“ операсы, Әлфия Авзалова фестивале... Жюри рәисе булырга, оештыручы эшләрен үз өстенә алучы башка шәхес юкмы, әллә үзегез теләк белдердегезме?

– Фонд оешты, конкурс уздырасым килә. Әни үлгәч бәйгеләрен уздырырбыз, ярдәм итәрбез, дип вәгъдәләр биргәннәр иде. Оныттылар. Барысы да үз эшләре белән мәшгулъ, дип март аенда Зөлфия ханым аптырап миңа мөрәҗәгать итте. Бәйгеләр уздыру буенча тәҗрибәм дә булгач, бик теләп ризалаштым. Юк, бу бернинди дә авырлык түгел, рәхәтлек кенә. Мәсәлән, Салават “Татар моңы”ның жюри рәисе, Зилә Сөнгатуллина “Йолдызлык” (“Созвездие”) та утыра. Шушы дәрәҗәле конкурсның жюри рәисе булып миңа нигә утырмаска?

Минем күптән укып бетергән шәкертләрем дә бар. Алар күбесе “Үзгәреш җиле” фестивалендә катнаша. Әгәр алар начар җырласа, анда катнашмаслар инде. Чөнки анда начар җырлаган берәүне дә тотмыйлар. Начар җырлаучылар конкурстан төшеп кала бара. Анда алга таба яңа катнашучылар булачак. Мин аларны ел буе барлыйм. Аларга репертуарлар туплыйм, аранжировкага җибәрәм. Минем өчен бу бер рәхәтлек кенә. Мин сәнгатьтә үз урынымны таптым. Файдалы кеше булып яшәргә кирәк. Тегесе начар, монысы начар дип сүз болгатып утыру кирәкми.

Шулкадәр күп авырлык аласыз, дисез. Хезмәт беркайчан да җиңел булмый. Ничек уйлыйсыз, айлар буе гастрольләрдә йөргән Салаватка авыр түгелме?  Тавышым, Аллага шөкер ялтырап тора әле. Гастрольләргә дә йөри алам. Ләкин мин акча артыннан кумыйм, башка юл сайладым. Бүгенге көндә иң зур байлыгым – ике театрда күп көч һәм хезмәт куеп тупланган тәҗрибәмне укучыларыма өләшәм, аларга төпле белем биреп, зур сәхнәгә әзерлим. Бу минем изге бурыч.

Запись Айлар буе гастрольләрдә йөргән Салаватка авыр түгелме? Мин акча артыннан кумыйм, ди Венера Ганиева впервые появилась Tatar Today - татар яңалыклары..