Әйтик, актер кинода төшкән өчен – эш хакын, рәссам картинасын сатканнан кергән сумманы хәйриячелеккә күчерергә мөмкин. Һәм алар шулай итәләр дә.

Ә менә Американың 51 яшьлек популяр моделе Донна  Д’Эррико мохтаҗ кешеләргә, мохтаҗ оешмаларга ярдәм итүнең үз юлын тапкан. Чибәр ханым йолдызлар хәйриячелек максатыннан катнаша торган фотосессиядә – Painted  Princess Project проектында катнашкан. Аның ние бар дисезме? Эш шунда – Донна анадан тума чишенгән һәм зифа буй-сынын кып-кызыл буяу белән манчыган. Шушы рәвештә модель кара фонда фотога төшкән. Съемканың авторы – Америка фоторәссамы Ник Саглимбени.

Актрисаның фотолары сурәтләнгән постерларны проект сайтында күреп була. Ә сатудан кергән акчаны дөнья буенча кешеләр белән сәүдә итүгә каршы көрәш алып баручы оешма ихтыяҗларына юллаячаклар.

Мәгълүмат Өмет газетасы

Запись Чишенеп… ярдәм иткән впервые появилась Tatar Today - татар яңалыклары..

Уфадагы бер оешма яңа ел корпоративыннан баш тартып, инвалидка ярдәм иткән. Бу акчаларга оешманың җитәкчесе инвалидка бик кирәкле пандус куярга мөмкинлек биргән.

Маргиз Сафаров исемле инвалид егет бу вакыйгага куанып бетә алмый. “Дөньяда яхшы кешеләр юк түгел икән. Минем күпмедер дәрәҗәдә елыйсым да килгән иде”, дип сөйли ул.

Егет 20 яшендә егылып, умыртка сөягенә зыян китергән. Элек ул гаиләсе белән 3 катта яши. Аның олы яшьтә булган әти-әнисенә улларын урамга чыгарырга шактый кыенга туры килгән. Шуңа күрә Маргиз урамга айга бер генә чыга торган була.

5 ел буе алар гаиләләре белән беренче катта урнашкан фатирга акча җыйганнар. Әмма яңа фатирга күчкәч тә проблемалар бетмәгән. Бу йорттагы пандус Маргиз өчен бик уңайсыз булган. Әмма егет бирешергә теләмәгән. Шуннан башлап, ул үзенең фатирыннан урамга чыга алырлык итеп, балконына ук пандус урнаштырырга тели. Бу корылма 350 мең сум тора. Гаиләнең бу кадәр акчасы булмый, бер өлеше белән ярдәм итәләр, әмма ул акчалар аз була. Шул сәбәпле алар 200 меңгә кредит алырга мәҗбүр булалар.

Бу кредитны түләргә насыйп булмый, чөнки аноним оешма аның бер өлешен каплый, ә җитеп бетмәгән өлешен шул оешманың җитәкчесе түләп бетерә. Бу оешма үзенең исемен ачарга теләми. Шунысы гына билгеле: оешма хезмәткәрләре яңа ел корпоративыннан баш тартып, бу егеткә ярдәм иткәннәр.

Хәзер инде Маргиз үзе теләгән вакытта урамга чыга ала.

View this post on Instagram

A post shared by ТОК⚡️ (@tok_media)

Мәгълүмат Tok_Media

Запись Аноним оешма инвалидка ничек ярдәм иткән? впервые появилась Tatar Today - татар яңалыклары..

Азат Фазлыев әнисен яман чирдән дәвалауга җыелган акчаларны авыру балаларга тараткан. Бу хакта ул 13 февральдә шәхси инстаграм битендә хәбәр итте. Хәзерге вакытта әнисен алар кредит акчаларына дәвалыйлар икән. Хәйрия концертларыннан кергән, карталарга күчерелгән акчалары ул балаларга таратырга карар иткән. Шунысын да әйтергә кирәк, Азат бу балалар һәм аларның әти-әниләре белән шәхсән күрешеп аралашкан.  

“Кадерле дуслар! Табибларның әнигезгә тиз арада операция кирәк дигән сүзе дөньябызның астын-өскә китерде. Нишләргә дә белмичә калдык. Әнә шул чакта без сезгә, хөрмәтле дусларыбызга, мөрәҗәгать иттек.

Гаиләбезгә килгән бу кайгыны үзенеке кебек кабул итүчеләр күп булды. Безне хөрмәт итүчеләр күплегенә күңел сөенде. Һәркем өчен ӘНИ иң якын кеше. Безгә гомер биргән, өчебезне дә аякка бастырган газиз кешебезне югалтудан курыктык. Ничек кенә булса да яшәтәсебез килде.

Әле дә без Әниебез өчен барысына әзер. Тик ул яшәсен, авыртмасын, сызланмасын гына!
Белгәнегезчә, әни Төркиягә барып кайтты. Организмындагы ялкынсыну процессын бетереп булды. Чит ил табиблары аңа химия бирде. Әлегә ул өч ай шуны эчә.

Әнигә зур сумма кирәк булгач, хәйрия чаралары узды, картага акча күчерүчеләр булды. Кызганыч, өч баласының берсе дә донор буларак туры килмәдек. Әле дә әнигә донор эзлиләр. Үзебез бурычка алган миллоннарны әни өчен тотабыз. Ә инде халыктан җыелган акчаны без бүген авыр хәлдә булган балаларга таратырга булдык. . “Ватаным Татарстан” газетасы язмышлары бәян ителгән балаларны тәкъдим итте. Барысы да ярдәмгә мохтаж аларның. Мин үзем һәр гаиләдәге сабыйны күрдем, аларга чынлап та ярдәм кирәклегенә инандым. Бу адымга мин бик озак килдем. Кешедән җыйган акчаларның авыру балаларга ярдәме тисен, дидем.

Әле бит акча җыю гына түгел, Аллаһы Тәгалә алдында алар өчен җавап та тотасы бар. Әлеге акчаларда өлеше булган һәркемгә Ходай савабын бирсен, эшләгән игелекләрегез меңе белән әйләнеп кайтсын! Газиз кешеләрегез, якыннарыгыз, балаларыгызга авырырга язмасын! .

Барыгыз алдында башыбызны иябез Ярдәм иткән балалар @gulnaziarullina7847 @gulziraminnullina @timfazliev Миронов Владислав Дмитриевич, @leisan1231@tazetdinova51 @dianashagieva2015“, дип уртаклашкан Азат Фазлыев.

View this post on Instagram

A post shared by ⚡️TATAR TODAY агентлыгы⚡️🌍 🔊📺 (@tatar_today)

Әлеге пост астында Азат әфәнденең бу гамәлен хуплап, уңай фикерләр калдырганнар, әнисенә сәламәтлек, озын гомер теләгәннәр.

Запись Азат Фазлыев авыру әнисе, җыелган акчаларга бәйле көтелмәгән карарын әйтте. Өсләрендә миллионлаган бурыч впервые появилась Tatar Today - татар яңалыклары..

26 сентябрьдә Тимур Фазлыевка ярдәм итү максатыннан уздырылган хәйрия концерты малайның шушы өметле сүзләре белән башланып китте. Белгәнебезчә,Тимурның хәзерге көндә буынын алыштырырга кирәк. Әнисе Светлана бу сорау белән чит ил хастаханәләренә мөрәҗәгать итә. Бәхетенә, Германиядән җавап хаты килеп  ирешә. Операция өчен барлыгы 49 мең евро кирәк буласын белгәч, гаилә төшенлеккә бирелә. Мондый чыгымны үзләре күтәрә алмау сәбәпле, кешеләрдән ярдәм сорарга җәмбүр була алар. Шулай итеп, олы йөрәкле кешеләр тарафыннан акчалата ярдәм күрсәтелә башлый. җырчылар катнашында уздырылган концерт та әлеге максат белән оештырыла. Аңа үзләренең өлешләрен кертүчеләрнең һәрберсе дә сәхнәдә Тимурның талантлы егет икәнен әйтеп уздылар. Татарстан Республикасы  Дәүләт Советы рәисе урынбасары Татьяна Ларионова сүзен чарада катнашучы һәркемгә рәхмәтен җиткерүдән башлады. Шулай ук залда утырган сәламәтлекләре чикләнгән балаларга да игътибарны юнәлтте. Залда, чыннан да, авыру балалар шактый күренде. Аларның барысы да концертта яңгыраган җырга моңланды яки, киресенчә, көйсезләнеп дә алдылар. “Благодарение” фонды директоры Рүзилә Шәймәрдәнова фонд оештыручысы Сәлихов Ирек исеменнән рәхмәт сүзләре җиткерде. Шулай ук әлеге чараны берничә тапкыр оештыруларын да искәртте.

View this post on Instagram

A post shared by Тимур Фазлиев (@timfazliev)

Диагнозы буенча, Тимур сөйләшергә дә тиеш булмаган 

Концерт Тимур һәм Дилә Нигъмәтуллина дуэты белән башланып китте. Җырның беренче куплеты башлану белән залда утырган тамашачылар, күңелләре тулып, күзяшьләрен сөрттеләр. Чөнки алар җырлаган “Яшәр идем” җыры да Тимурның уй-кичерешләрен ачып салган кебек тоелды. Аның аякка басу теләге – һәр авазны сузып әйтүендә чагылып торды. Дилә Тимур белән еш аралашып торганнарын сөйләгәндә егетнең нечкә куңелле булуын, ә иң мөһиме тормышны яратуына басым ясады. “Тимур белән безне бер нәрсә аера – ул хыяллана белә. Без күргәнне күрмәсә дә, ул үзенең хыялларын күреп яши. Аны йөрергә өйрәтергә иде”, – дип тәмамлады сүзен Дилә.Тимур, чыннан да, бик иҗади һәм сәләтле бала. Ул Ресбуплика һәм Русия күләм уздырылган вокал бәйгеләрендә катнашып, дәрәҗәле урыннарга да лаек булган.

View this post on Instagram

A post shared by Тимур Фазлиев (@timfazliev)

Алып баручы Алмаз Мирзаянов әйтүенчә, Тимурның диагнозы буенча, ул бөтенләй сөйләшергә тиеш булмаган. Әлеге сынауны җиңәргә Фазлыевлар гаиләсенә логопед Лариса ярдәм иткән:

-Без барыбыз да Тимурның иҗатына кечкенә өлешебезне кертергә тырыштык. Минем эшем дә бик кечкенә генә ярдәм булды дип саныйм, – дип башлады ул сүзен. Лариса баланы бикләнгән тартмачык белән чагыштырды. Һәр ата-ана да әлеге тартмачыкның дөресен тапкан очракта гына, баланы якты киләчәк көтәсен әйтте. Тимурга игътибар итсәң, үз ачкычын тапкан дияргә дә була. Чөнки ул нинди хыяллар белән генә яшәмәсен, үз максатларына туры барырга тырыша. Ә иң мөһиме, аның үз аякларында йөрисе, күрәсе, һәм әлбәттә, яшисе килә. Бигрәк тә сәхнәгә кечкенә кыз чәчәк алып менеп биргәч, үзен бәхетле тойгандыр егет. Чәчәк белән менгән кыз да Тимурга сәламәтлек теләп, малайның кәефен күтәрде.

“Минем якын дустым ул Тимур”

Сәхнәгә Рифат Зарипов чыгасы игълан ителгәч, тамашачы бигрәк тә дулкынлану белән көтте. Чөнки Рифат инстаграмындагы битендә аның белән җырлап төшкән видеоны урнашытырып, Тимурның сәләтен күрсәткән иде инде. Алар бу юлы да “Сабырлык” җырын башкардылар. Рифат өч көн элек салкын тидерү сәбәплеме, Тимур белән җырлау күңеле тулгангамы, Тимурга кушылып барды. Аннары соң танышу тарихын сөйләде:

-Тимур белән быел җәйдә таныштык. Узган язда интернетта “Җырларыңнытыңлыйм”, – дип язган иде ул миңа. Шуннан соң Миләүшә Сафина җәй көне безне очраштырып, 3-4 сәгать сөйләшеп утырдык. Әлеге концертка да киләм дип вәгъдә иттем, авырып китсәм дә, килергә тырыштым. Чөнки Тимур – якын дустым ул минем. Рифат телгә алган Миләүшә Сафинаның әлеге хәйрия концерында өлеше шулай ук зур. Ул сәхнәдә популяр татар җырчыларны җыйган. Алар: Эльмира Гыйлфанова – Рафаэль Җәләлиев, Люция Мусина, Казан егетләре, Гүзәлия, Хәким, Алия Исрафилова, Рамил –Рамилә Хәйретдиновлар, Алсу Вәлиуллина, Нурзадә, Рамиль Шарәпов, Гөлназ – Илсур   Шәрипҗановлар.

Рәфидә Галимҗанова // Tatar-today порталы

Запись Дилә Нигъмәтуллина, Рифат Зарипов һәм башка җырчылар Тимур Фазлыевка аякка басырга ярдәм итә впервые появилась Tatar Today - татар яңалыклары..

22 августта узачак концертын классик музыка концерты дип атады ул. “Кичәдә операдан арияләр, үземнең яраткан әсәрләрем яңгырая­чак. Рояльдә Юлия Әхмәт­динова уйнаячак. Кон­церт вакыт ягыннан зур түгел, сәгать ярымлык булачак”, – дип планнары белән бүлеште җырчы.

Кызның музыкаль кичә оештырасын социаль чел­тәрдәге афишасын күреп белдек. Илүсәнең бу га­мә­лен хуплыйлар. “Килә­чәк­мен!” – дип вәгъдә бирүче тамашачылар да күренә.

Концерт Аксенов музей-йортында узачак. Илүсә бу музейда беренче генә чыгыш ясамый икән инде. “Бу музей белән без күптәнге дуслар, миңа ул ошый. Андагы залны яратам. Аннан, рояльнең булуы да бик мөһим. Менә дигән җылы, өйдәгечә мохит бар бу музейда. Концертымны да бернинди пафоссыз үт­кә­рергә телим. Аренда ягына килсәк, биредә үткәрү матди яктан отышлырак чыга”, – дип аңлатты Илүсә Ху­җина.

Җырчының концертына һәркем килә ала, керү бушлай. Чара хәйрия максатыннан үткәрелгәч, килгән ке­шеләр булдыра алганча акчалата ярдәм күрсәтә алачак. “Без теләсә нинди суммага да шат булырбыз”, – ди Илүсә. Җыелган акчаны хәйриягә тотуларына шик юк. Акча ДРКБның “Яхшы кешеләр шәһәре” фондына күчерелә­чәк, онкология авыруларыннан интеккән балаларны сә­ла­мәтләндерү өчен тотылачак.

Игелекле эшнең иртә­се-киче юк аның. Илүсә Ху­җи­на оештырачак классик музыка концертында ике куянны берьюлы тотарга була: рухи ләззәт алырга, шунда ук яхшылык эшләргә дә менә дигән мөмкинлек бу.

Чулпан Гарифуллина, Ватаным Татарстан

Запись Җырчы Илүсә Хуҗина пафоссыз концерт оештырып, акчалата ярдәмгә өметләнә впервые появилась Tatar Today - татар яңалыклары..

Яшь композитор һәм аранжировкалар остасы Илдар Ногманов гаиләсе дәвалануга 1,5 миллион сум акча сарыф итә. Ләкин тагын да көчлерәк, кыйммәтлерәк дарулар кирәк. Бер курс дәвалану өчен 500 мең сум акча таләп ителә. Ногмановларның ул кадәрле акча табу мөмкинлеге юк.

Ләлә – ике кыз әнисе. Киләчәккә ышанычын, өметен югалтмый. Аның кызларының аякка басуын күрәсе, якыннары янәшәсендә буласы, тормыш иптәше янәшәсенә басып, өздереп иң матур, иң моңлы җырларын җырлыйсы килә.

Илдар Ногманов – җырлар авторы. Аның җырларын Салават Фәтхетдинов, Фирдүс Тямаев, Әнвәр Нургалиев, Рифат Зарипов, Вадим Захаров, Илназ Минвәлиев һ.б.лар башкара.

Хәлебездән килгәнчә ярдәм итсәк иде. Бергә булганда барысын да җиңеп була! Изге Рамазан аенда янәшәдәгеләр борчуына битараф калмыйча, изгелекләр кылып яшик!

Терел тизерэк жаныыым???

Публикация от ildar (@ildarmuz) 31 Мар 2018 в 12:47 PDT

Хәйрия концертында катнашалар: Фирдүс Тямаев Филүс, Кагиров, Эльмира Сөләйманова, Фирзәр Мортазин, Рифат Зарипов, Ризидә Шәрәфиева, Рөстәм Закиров, Люция Мусина, Алия Исрафилова, Вадим Захаров, Гөлнара Габидуллина, Сәйда Мөхәммәтҗанова, Ришат-Айгөл Шәйхетдиновлар, Булат Нигъматуллин, Венер Салимов, Гузәлия-Хәким, Алина Давыдова, Кызлы йорт, Фидарис-Рузалия Мортазиннар, Рамил-Рамилә Хәйретдиновлар, Ризат-Зинира Рамазановлар, Раил Садриев, Мунча ташы, Рәвешләр. Баянда – Илфат Шәехов һәм Илнур Ганиев. Концертны Булат Бәйрәмов һәм Айсылу Лерон алып бара. Билетлар сатуда.

Шэп концерт булачак. Ин шэп артистлар. Билетлар бар. Шалтыратыгыз. 89179221247

Публикация от ildar (@ildarmuz) 4 Май 2018 в 8:38 PDT

Запись «Изгелеккә бер адым…» – Казанда зур хәйрия хәйрия концерты була впервые появилась Tatar Today - татар яңалыклары..

– Бәла аяк астында дип белми генә әйтмиләр. Без дә көтеп алынган улыбызның туган көне һәм алдагы тормышы сагыш-сынауга уралыр дип уйламадык. 2016 елның 28 апреле яшь гаиләбез өчен иң куанычлы көн – улыбыз дөньяга килгән көн иде. Тик бәхет “мичкәбез”гә язмыш бу көнне үк кашыклап-кашыклап де­гет салды… Улыбыз бик авырдан туды. Баштан ук тулгакларым сирәк, көчсез булды. Нидер си­зенгән кебек, баламның да дөнья­га туасы килмәде. Соңрак табиблар вакуум-экстракция ысулын кулланып карады. Бер түгел, берничә тапкыр кулландылар. Ярдәм тимәгәч, мине, ни­һаять, ашыгыч рәвештә кесарь кисүенә җибәрделәр. Мең газап белән туган баламның башында шаккаткыч зурлыкта гематома иде. Апгар шкаласы буенча аның хәлен 2 баллык дип билгелә­де­ләр: тугач та сабый кычкырмады гына түгел, хәтта сулый да алмады. Күп кан йоткан, хәле бик авыр дип улымны ДРКБга җи­бәрделәр. Үземнең дә хәлем бик мөшкел иде. 2 атнадан соң гына көчкә аякка бас­тым.

Табиблар улыбызның авыру бала булачагын алдан ук ки­сәттеләр. Алар фикеренчә, сабыйга зыян вакуум ысулын кулланганда килгән. Сагышлы хәбәр бә­гырьне телде, тик бирешәсе кил­мәде, чөнки безнең очракта савыгуга өмет бар иде. 4 айга кадәр балада тайпылышлар сизелмәде, көчле тонус кына бар иде. Ә 1 яшьтә “ДЦП, спастический тетрапарез тяжелой степени, дубль-атетоз, отставание в развитии высших корковых функций, эпи-активность” дигән катлаулы диагноз куйдылар. Улыбызда тайпылышлар сизелә башлауга, гаи­ләбез белән мөмкин­челе­гебездән чыгып төрле массаж, ЛФК, массажга, бассейнга, остеопатларга йөртә башладык. Казандагы “Беренче адымнар”, “Логос”, “Атлант” кебек тернәкләндерү үзәкләрендә булдык. Мондый дәвалануларның күбесен һәр 2-3 ай саен кабатлап торырга кирәк, ә бәяләр бик югары (1 тапкыр массаж ясату уртача 1300 сум, ЛФК – 1000, бассейн 800 сум). Чиләбедә яшәүче энәләр кадап дәвалаучы табибка 4 ай саен дәваланырга барабыз. Бәясе – 38 мең сум. Шуңа өстәп төрле белгечләрнең консультацияләре кирәк. Бушка дәвалану мөм­кинлекләрен дә калдырмыйбыз. ДРКБда hәм 8 нче номерлы балалар хастаханәcендә берничә дәвалану курсы алдык. Өй шартларында физкультура ясату өчен махсус җайланмалар сатып алабыз. Дөресен әйткәндә, безнең бар хезмәт хакы, ике як әби-ба­бай­ларының пенсиясе, үзенең пенсиясе тулаем бу дәвалануларга һәм юлга тотылып бетеп бара.

Тиздән Даниярга, Алла боерса, 2 яшь тула. Тик бүген ул утырмый, йөрми, шуышмый, сөй­ләшми, вак моторика үсеше артка кала, кулына әйберләр тота алмый, гәүдә авырлыгы җитми, начар ашый, сыек азык кына йота ала. Шундый авырлыклар белән очрашкач, сә­ла­мәтлекнең, бала­ның кадерен тагын да ныграк аңлыйсың. Кеч­кенә генә өметкә дә ябышып яшисең. Диагнозы катлаулы булса да, Да­ни­ярның интеллекты сакланган, эмоциональ үсеш күзәтелә. Ул якыннарын таный, елмая, үз телендә сөйләшә, хәрәкәтләнергә тырыша. Дәва­ланулар үткәннән соң бармакларын үзе ачып яба башлады, яткан җирдән әкренләп тәгәри, аякка бастырып карасаң, гәүдәсен тотарга, алга атларга тырыша. Табиблар, өмет бар, диләр, тик бала белән даими рәвештә бик күп эшләргә кирәк. Ни кызганыч, безнең диагноз белән Россиядә тиешле дәрәҗәдә дәвалану алып булмый.

Бүгенге көндә Чехиянең Янские Лазни шәһәрендә урнашкан “Весна” санаторие махсус безнең төр диагноз куелган балаларны дәвалау белән шөгыльләнә. Лә­кин дәвалану бәясе 300 мең 659 сум тора. Бу бәяне безнең гаи­ләбез генә күтәрә алмый. Шуңа күрә без битараф булмаган, олы җанлы, киң күңелле кешеләрдән ярдәм сорыйбыз! Зинһар, безнең улыбызга савыгырга булышыгыз! Тамчыдан күл җыела, ди халык. Зинһар, Даниярга аякка басарга ярдәм итегез!

Мөхетдинова Алсу Мөдәррис кызы исемендәге Саклык банкы картасы:

4276620045180357

Яндекс деньги: 410016553291076
Телефон номеры: 89178654389

Запись “Нидер си­зенгән кебек, баламның да дөнья­га туасы килмәде” впервые появилась Tatar Today - татар яңалыклары..

Бу концерт 28 ноябрьдә УНИКСта узган “Мең рәхмәт” хәйрия фестиваленең дәвамы. Проектның авторы – журналист Рөстәм Исхаков. 
Концертка катнашырга теләк белдергән Уфа һәм Казан җырчылары ике як арасындагы дуслыкның нык булуын искәртеп үтте. Күптән түгел Ирек Габдрахмановның Башкортстанда иҗат кичәсе үткән иде, анда катнашкан берничә артист Казанга да килде. Илнур һәм Алия Сәхбетдиновлар әнә шундыйлардан. 

– Ирек абыйның җырлары күңелгә ятты, үзенә интернет аша чыгып, сөйләшеп, бергә иҗат эшебезне башладык, – ди алар. 
Җырлар язуны иҗади гаилә үзеңнән соң эз калдыру чарасы кебек күрә. “Җырлар иҗат итү йөрәктән чыккан эш, матди ягы да, рухи ягы да, әлбәттә, мөһим”, дигән фикердә Сәхбетдиновлар. 

Ирек Габдрахмановның дәртле җырларын башкаручылар рәтендә Римма Никитина да бар. Ул иҗат кичәсенә үз концертын кичектереп килүе турында әйтте. 

– 2016 елда Ирек абый “Инстаграмнан эзлим сине” дигән җыр тексты тәкъдим итте, миңа ошады ул, бераз эшкәртеп, көен яздык та, аудиториягә чыгардык. Яшьләр арасында шактый популярлашты ул, мине таныткан җыр дисәм дә, ялгышмам, – диде Римма. – Хәйрия концертларында теләп катнашам. Үзең өчен дә савап бит ул. Бөтен командам белән җыелып бүген дә килдек. 

УНИКСта куелган концертта катнашкан җырчыларны да күрергә мөмкин иде бу кичәдә. Фәрид Мифтахов, Рәсим Низамов, Гүзәлия, Гөлнара Габидуллина әнә шундыйлардан. Илназ Гарипов исә сәхнәгә ут кую эшендә ярдәм күрсәтте. 

Фәрид Мифтахов белдергәнчә, мондый чараларда катнашкан һәркем зур савап эшли, шул ук вакытта хәйрия чаралары тәрбия ысулы да. “Без бирегә килеп бер-беребез белән дуслашабыз, аралашабыз, фикердәшләрне табабыз. Битараф булмаган кешеләр генә җыела монда”, дип саный ул. 

“Йөрәгеңә үтеп керермен” җыры белән чыгыш ясаган Рәсим Низамов исә, “ТМТВ”, “Татар җыры”, “Болгар”радиосы” премияләре булган кебек үк, “1000 рәхмәт” премиясен дә булдырырга кирәк, дип саный. “Монда исә хәйрия чараларында күп катнашкан кешеләр, артистлар бүләкләнер иде”, дигән фикердә җырчы. 

Гөлназ Сираева Ирек абый белән күптән түгел генә хезмәттәшлек итә башлавын әйтте. “Композитор буларак, Ирек абый бик матур җырлар яза, шәхсән үземә ошый. Берничә күңелгә хуш килгән җыры да бар, алга таба алары да дөнья күрер”, диде җырчы. 

Иҗат кичәсендә шулай ук ярминкә гөрләде: китап, чәй, тәм-томнар сатылды.

Чулпан Гарифуллина

Запись Тинчурин театрында «Җырлы язмыш» концерты гөрләде [фото] впервые появилась Tatar Today - татар яңалыклары..

“Без Радик белән күптәннән таныш булсак та, 2008 елда гына гаилә корырга булдык. Кызыбыз Сәйдә көттереп кенә дөньяга килде. Авырлы вакытта кыен булмады. Дөрес, ике тапкыр хастаханәдә ятып чыккан идем. Әмма табиблар карынымдагы баланың сау-сәламәт икәнен әйтә килде. Шулай булса да, баланы авыр таптым. Кызым туганда җәрәхәт алган, – дип сөйли Сәйдәнең әнисе. – Үзе сулый алмагач, аны тиз арада реанимация бүлегенә алып киттеләр. Икенче көнне ул имә башлады. Тик бәхет озакка бармады, кызымның хәле янә авырайды. Шул чакта табиблар балада ДЦП диагнозы булу ихтималы бар, диделәр. Минем аяз күгемне болыт басты. Нишләргә дә бел­мә­дем. Елап кына хәлебез җиңеләй­мәсен аңлый идем. Ярый әле ирем терәк булды”.

 Сәйдәгә өч ай тулгач, Эльвира аның белән үзе шөгыльләнә башлый. Интернеттан мәгълүмат җыя, күренекле табиблардан дәресләр ала. Ике елга якын Сәйдә белән бер көн дә калмыйча гимнастика ясыйлар. “Безнең бит генетик авыру түгел. Балага туганда авырлык килү аркасында зыян килгәнен аңладым, – дип сөйли Эльвира. – Шуңа икенче баламны көткәндә үземне тыныч тоттым. Хәтта олы баламны күтәреп йөрү дә авыр булмады, ничектер җайландык. Энҗе кызыбызны тапканда алдан сөй­ләшеп, кесеров кисүе ясауларын со­радым. Табиблар каршы килмәде, бу юлы балам сау-сәламәт туды. Икенче бала булгач, Сәйдәне дәвалау авырлаша башлады. Әле ярый әниләр ярдәм итә. Балаларыбызны ирем белән бергә карарга тырышабыз. Дәвалану өчен күп кредит алдык. Якын танышларыбыз, дусларыбыз булышты. Туганнарга да рәхмәт. Сәйдәне инде дүр­тенче ел дәвалануга йөртәбез. Безгә хәйрия фондлары да ярдәм итә. Әле дә ярый мәрхәмәтле кешеләр бар, дип күңелем тула”, – ди Эльвира.

 Йокысыз төннәр, түгелгән күз яшьләре, тырышлыкның файдасы юк түгел. 4 яшьлек Сәйдә сөйләшергә өйрәнгән. Тер­нәк­лән­дерү курсла­рының берсе дә бушка китмәгән. Баштарак куллары хәрәкәтләнә башлаган, соң­рак утырырга өйрән­гән. Хәзер үрмәләп йөри. Алда атлап китү максаты тора. “Сәйдәнең йөреп китүен көтәбез. Быел шул хыял тормышка ашар төсле тоела. Тик менә соңгы араларда өянәге булып, куркытты. Әллә инде еш дәвалану ярамаганмы дип тә уйлыйм. Гел юлда йөреп арыды микән? Аптырадым. Минем кебек авыру бала тәрбия­ләүче әниләр 5–7 яшь­ләрдә өя­нәк күзәтелә дип тынычландыра. Кызым белән бар да әйбәт булсын дип телим”, – ди Эльвира.

 Сәйдәне карап торышка бер дә авыру бала димәссең. Әйт­кән­не аңлый, сөйләшә дә, үзе ашый, эчә. Янында бөтерелүче сеңлесе Энҗе аңа бер дә моңаерга ирек бирми. Апасын кочаклап кына тора. Сәйдә әйтерсең безнең килүне көтеп торган! Әнисеннән урындыктан төшерүен сорап, үрмәләп яныбызга килеп чыкты. Кулында шар. Анысы безгә бүләк икән. Әнә шундый киң күңелле, олы йөрәкле кыз ул. Шуңа аны бакчадагы дуслары да ярата. Үзе дә бакчага илтүләрен сорый икән. Тәрбияче апаларын сагына, ди әнисе.

“Сәйдәне Казанда урнашкан бакчага йөртәм. Анда барысы да үзе кебек балалар. Рәхәтләнеп уйнап кайта”, – ди әнисе. Эльвира безнең белән сөйләшкән арада, ике кызы да янына килеп аңа сарыла. Энҗесе йөгереп килә алса, Сәйдә дә калышмый, әнисенә нидер аңлата. Бары тик яратканын тойгач кына риза булып елмаеп куя. Шул вакытта әниләре күз яшьләрен тыя алмый. Әмма елаганын күрсәтмәскә тырыша. “Балаларымны бик яратам. Алар­ның исән-сау булуларын телим. Әни кеше өчен иң зур бәхет бит бу. Күңелем ышана – Сәйдә, Алла боерса, аякларына басар төсле. Әгәр бу теләк чынга ашса, ирем белән икебезнең күптәнге хыялыбызны тормышка ашырачакбыз. Өченче бала алып кайтыр идем”, – ди Эльвира.

Сәйдә йөреп китсен өчен, дәвалануны өз­мәскә кирәк. Әм­ма акчасыз да булмый. Әнә шуңа да Эльвира изге күңелле ке­шеләрдән ярдәм сорый.

Сәйдәгә булышыр өчен исәп-хисап реквизитлары:

 
Саклык банкы картасы   4276  6200  2189  2785.

Запись «Кызым аякка басса, өченчесен алып кайтыр идем» впервые появилась Tatar Today - татар яңалыклары..

Нияз Мәгасумов исә иҗат кичәсенә чакырып, видеомөрәҗәгать кертте.  Ул да концертта Ирек Габдрахманов иҗат иткән җыр белән чыгыш ясаячак. Килми калмагыз!

https://www.instagram.com/p/Bd-CQVzliTt/?taken-by=magasumov_niyaz

Запись Нияз Мәгасумов Ирек Габдрахмановның иҗат кичәсенә чакыра [видео] впервые появилась Tatar Today - татар яңалыклары..