Архивы яңалык - Tatar Today - татар яңалыклары.

Казанда танылган татар мәктәбе директоры эшеннән китә, кем киләсе билгеле [кайнар хәбәр]

Рамиля Валиахметова — Wed, 05 Aug 2020 12:32:41 +0000

Аның урынына Казанның 13нче татар гимназиясе мөдире Рамил Гайнуллин билгеләнәчәк.

Камәрия Хәмидуллина Казанның Шиһабетдин Мәрҗани исемендәге 2нче татар гимназиясе мөдире вазифасыннан китә. Бу хакта Азатлыкка үз чыганаклары хәбәр итте. Аның урынына башкаланың 13нче татар гимназиясе мөдире Рамил Гайнуллин килә.

Камәрия Хәмидуллина гимназияне 1993 елдан бирле җитәкләде.

Ул һөнәри эшчәнлеген 1971 елда Казанның 13нче мәктәбендә математика укытучысы буларак башлый. Казан шәһәр думасы депутаты, Татарстанның халык укытучысы исеме иясе.

Гимназия соңгы елларда Казанда фәннәрне тулысынча татарча укыткан бердәнбер мәктәп буларак билгеле. Гимназиясенең үз балалар бакчасы бар. Уку йортын зурайту өчен янкорма төзү карары кабул ителгән иде.

Рамил Гайнуллин Казан дәүләт университетының татар филологиясе һәм тарихы факультетын тәмамлаган. Шиһабетдин Мәрҗани исемендәге тарих институтында аспирантурада белем алган. 2013 елда урыс төркемнәре өчен татар телен укыту курсын узган. Казанның 13нче татар гимназиясен бер ел җитәкләгән.

Кәмәрия Хәмидуллина

Кәмәрия Хәмидуллина - Казанның 2нче татар гимназиясе мөдире.

1949 елның 5 ноябрендә Татарстанның Саба районы Шекше авылында туган.

Казан дәүләт педагогия иниститутын тәмамлап "математик" белгечлеге алган. 1971-1990 елларда Казанның төрле мәктәпләрендә тәрбияче, укытучы булып эшләгән.

1990 елдан Казанның 2нче татар гимназиясендә математика һәм информатика укытучысы, 1991 елдан мөдир урынбасары, 1993 елдан 2020 елга кадәр мөдир булып эшләгән.

Татарстанның атказанган укытучысы (1992), Татарстанның халык укытучысы (2014) исеме иясе.

Чыганак: Азатлык Радиосы сайты

Запись Казанда танылган татар мәктәбе директоры эшеннән китә, кем киләсе билгеле [кайнар хәбәр] впервые появилась Tatar Today - татар яңалыклары..

Башкортстанда активистлар урман кисүчеләр белән көрәшә [видео]

kadria — Tue, 04 Aug 2020 20:13:12 +0000

Башкортстандагы Куштауны яклаучы активистлар 3 августта җыелып тауга менде һәм анда урманны кисү эшләрен туктатты.

Башкорт сода ширкәтенә сода җитештерү өчен чимал алу урыны буларак бирелгән бу шиханда урманны кисү хәбәре узган атна ахырында, Корбан бәйрәме көннәрендә үк таралган иде. Әмма ул чакта киселгән урманны күрүчеләр урман кисүчеләрне очрата алмаган. Тауны чималга бирүгә каршылар эшнең дүшәмбе ныклап башланачагын сизеп алып 3 августта урман кисүчеләр янына барган.

Активистлар урман кисүчеләрнең нинди ширкәттән һәм кемнәр булуын ачыкларга теләгән, урманны кисү өчен рөхсәт кәгазьләрен күрсәтүне таләп иткән. Нәтиҗәдә активистлар полиция чакырган һәм урман кисүчеләр эшләрен ташлап китеп барырга мәҗбүр булган.

Азатлык шиханны яклаучылар белән анда булган хәлләр турында сөйләште. “Башкорт” төркеме җитәкчеләренең берсе Фаил Алчынов без шалтыратканда Куштау түбәсендә иде.

Фаил Алчынов Куштауны яклаучы активистлар белән

Алчынов Азатлыкка белдерүенчә, дүшәмбе тау башына шиханны яклаучы 30лап активист күтәрелгән һәм урманны кисүчеләр өчен тау башыннан аска таба юл ачу эше башланганлыгын ачыклаган. Моның өчен 30 метрлап киңлектә агачларны кисеп аска таба төшә башлаганнар. Алчынов әйтүенчә, гадәттә таудагы урманны астан өскә таба кисеп менәләр, әмма бу юлы эшне оештыручылар астан кисә башлау халыкта зур шау-шу кубарыр дип куркып эшкә тау башыннан керешкән. Алчынов урманның тоташ түгел, ә урыны-урыны белән киселгәнлеген күрүләрен әйтә. Урман кисүчеләр шул рәвешле ике тау кушылган урында Үрнәк авылына якын бер җиргә төшеп юл ачарга тели, ди ул.

Куштауда киселгән агачлар

Активистларның шактые тау итәгендәге Үрнәк авылында яшәүчеләр. Элек Стәрлетамакта яшәгән, пенсиягә чыгып әлеге авылган күченгән Рим Абдулнасыров тыныч тормыш эзләп шәһәрдән авылга күченгән идем, язмаган ахыры ди.

Рим Абдулнасыров

“Алар һәрвакыттагыча бу юлы да халык бәйрәм иткәндә тыныч һәм астыртын рәвештә эш итте, кешеләр бәйрәм итүдән файдаланып урманны кисүгә кереште. Әмма дүшәмбе инде без аларга эшләү мөмкинлеге бирмәдек. Без алардан бу урманны кисү өчен рөхсәт кәгазен таләп иттек. Ә Куштаудагы урман тыюлык санала, аны кисәргә рөхсәт ителгән урманнар рәтенә бары Русия авыл хуҗалыгы министрлыгы карары нигезендә генә күчереп була. Әмма әлегә андый карар юк. Тәмам оятсызларча эш итәләр. Моны бандитизм дип атарга була һәм без дүшәмбе бандитларны туктаттык дип әйтер идем”, ди Абдулнасыров.

Аның әйтүенчә, урман кисүне туктату өчен әлегә 30 кешенең җыелуы җиткән, әмма кешеләр социаль челтәрләр аша аралашып тора, кирәк булса мең кеше дә җыела ала.

Куштауда урманның киселгән өлеше

Урманны юк итәргә теләсәләр, моңа безнең җәсәдләребез аша гына ирешә алачаклар, монда җыелганнарның күбесе өлкән яшьтәге кешеләр ди Абдунасыров. Аңа хәзер 64 яшь. Шулай ук Үрнәк авылында яшәүче икенче бер активист Рәис Мусаваровка 70 яшь.

Рим Абдулнасыровның күршесе, Куштауны яклаучы өлкән яшьтәге тагын бер активист Любовь Ануфриевага 81 яшь. Июль уртасында Любовь Ануфриева өенә экстремизмга каршы көрәш бүлеге хезмәткәрләре килгән. Бу хәлдән соң Абдулнасыров Ануфриева белән полиция бүлегенә барган һәм ахыр чиктә полиция хезмәткәрләре гафу үтенергә мәҗбүр булган.

Ануфриева 40 еллап гомерен Башкорт сода ширкәтендә эшләп уздырган. Хәзер исә ул Куштауны яклап көрәшүче иң өлкән активистларның берсе.

“31 июльдә Куштау итәгендә башкортлар белән татарлар пылау пешереп Корбан бәйрәме уздырды. Монда яшәүчеләр дә катнашты, Уфадан да 15ләп машина белән кешеләр килде. Анда җәядән ук ату, шашка уеннары һәм башка шундый ярышлар узды. Аннан соң шунда ук мөселманнар намаз укыды. Намаздан соң ашарга утырдык, ә кайберәүләр тауга менеп китте. Тауга менсәләр, йөзләп агач киселгән. Ягъни тауның бер ягында намаз укып Аллаһтан шиханны саклауны сорыйлар, ә шул ук вакытта шундый ук башкортлар тауның икенче ягында кыргыйларча кыйммәтле агачларны кискән. Моның ни кадәр кызганыч хәл булуын һич аңлатып бетерерлек түгел. Мин анда бердәнбер урыс кешесе идем, мин бернинди милләткә карамыйча бөтен кеше белән дус. Безнең өчен бу биредә тиздән эш кайный башлаячагы турында беренче ишарә булды”, ди Ануфриева.

Куштау итәгендә активистларның Корбан бәйрәме

Өлкән яшьтә булу сәбәпле дүшәмбе ул шиханга менә алмаган. “Мин тау итәгендә калган идем, тауга менүче урман кисүчеләрне туктатып тирә якка күз салуларын сорадым, Башкорт сода ширкәтенең Стәрлетамак тирәсен ничек агулап бетергәне һавадан да күренә дип аңлаттым, чыннан да суларлык түгел иде һава”, ди ул.

12 июльдә Куштауны яклау флешмобында 500ләп кеше катнашты

12 июльдәге флэшмобтан соң экстремизмда гаепләргә маташуга бик нык рәнҗүен әйтә Ануфриева.

“Экстремистлар дигән тамганы безгә Радий Хәбиров такты. Ул безнең белән очрашмый да, сөйләшми дә, без аның өчен берни түгел. Ул безне акча өчен эшләүчеләр, экстремистлар һәм маргиналлар дип атый. Мин — Ленинград блокадасын кичергән кеше, өч сугышны узган, Берлинга барып җиткән солдат кызы. Мин үземне экстремист дип атарга рөхсәт итмәячәкмен.

Минем өйгә подполковник, майор һәм өлкән лейтенант килде. Мин андый кунакларны каршыларга әзер түгел идем. Безнең флэшмоб 12 июльдә узды, ә ике-өч көн узуга алар килеп төште. Мине уратып алып хакимият белән килештерелмәгән ул чараның төп оештыручысы булуда гаепли башладылар. Көн бик кызу иде, шулай итеп кояшта мине 40 минутлап кыздырдылар, яшем зур булса да, бик кыздырып бетерә алмадылар. Гәрчә артымдагы койманың кояшта ничек кызуыннан тиздән инде тормышның чиге якынлашуын сизә башлаган идем. Алар ниндидер протокол тутыра башлады, мин ул протоколны тутырудан баш тарттым”, ди Любовь Ануфриева.

Активистлар әйтүенчә, 4 август иртәсендә урман кисүчеләр тагын тау башына менәргә теләгән, әмма төне буе сакта торган активистлар аларның машиналарын туктаткан һәм юл буенда озак кына кайнар, әмма көч кулланусыз сөйләшүләр булган.

Куштау – Башкортстандагы известь яткылыгына бай иң зур тау-шихан. 2017 елда анда геологик эзләнүләр уздыруга рөхсәт бирелгән иде. Узган елның августында аны эшкәртү өчен дә рөхсәт бирелде. Ул рөхсәт 2039 елга кадәр бирелгән.

Җәмәгатьчелек Йөрәктау һәм Торатауга табигать һәйкәле буларак саклау статусы бирелгән кебек, Куштауны да саклап калу өчен көрәшә. Башкортстан башлыгы Радий Хәбиров Куштауның эшкәртеләчәге турында күп тапкыр кабатлап, “Мин меңнәрчә кешене эшсез калдыра алмыйм. Ул ил өчен стратегик тармак. Мине сындыру, журналистларны, милләтчеләрне сатып алу файдасыз”, дигән иде.

Чыганак: Азатлык Радиосы сайты

Запись Башкортстанда активистлар урман кисүчеләр белән көрәшә [видео] впервые появилась Tatar Today - татар яңалыклары..

Зөл-хиҗҗә аеның 9 (30 июль) көнендә ураза тотуның саваплары

kadria — Wed, 29 Jul 2020 19:04:37 +0000

// Татар Тудей // Татар Эстрадасы //

Пәйгамбәребездән (Аллаһның аңа сәламе һәм рәхмәте булсын) Гарәфә көнендә ураза тоту турында сорадылар һәм ул әйтте:
“Бу көн уразасы үткән һәм киләчәк ел гөнаһларының кәффарәте булып тора”.(Мөслим риваяте).Гарәфәт көне ул Зул-хидҗә аеның тугызынчы көне булып тора.
Бу көнне хаҗ кылучылар, Гарәфәттә дога кылып, хаҗ гамәленең бер әркәнен үтиләр. Хаҗга бара алмаучыларның да Аллаһның рәхмәтенә ирешергә зур мөмкинчекләре бар – бары әлеге көнне гыйбадәттә үткәрү мөһим. Бу көндә Аллаһ ризалыгын алыйм дип, шушы хәдис белән дәлилләнеп гамәл кылсак, Аллаһ Тәгалә безнең үткән елдагы гөнаһларыбызны да һәм киләчәк елдагы гөнаһларыбызны да гафу итәчәк. Бу кече гөнаһларга кагыла. Ә зур гөнаһларыбызның гафу ителүен теләсәк, безгә тәүбәгә килү тиеш. Искиткеч: авыр да түгел, бары тик бер генә көн ураза тотарга кирәк, ә нәтиҗәдә, күпме гөнаһларның гафу ителүенә сәбәп булып тора ул. Мондый форсатны да кулдан ычкындырсак, кызганыч, бик зур мөмкинчеклекне югалткан булырбыз.

Запись Зөл-хиҗҗә аеның 9 (30 июль) көнендә ураза тотуның саваплары впервые появилась Tatar Today - татар яңалыклары..

Корбан бәйрәмен турыдан-туры эфирда Казанның Галиев мәчетеннән “Хозур ТВ”, ТНВ, “Россия1” телеканалларында һәм мөфтият сайтында карап булачак

kadria — Wed, 29 Jul 2020 14:50:58 +0000

// Татар Тудей // Татар Бүген //

Бу елның 31 июлендә дөньядагы барлык мөселманнар иң олы бәйрәмнәрнең берсен – Корбан гаетен каршылый. Бәйрәм рухы һәр йортка керсен һәм милләттәшләребез дин кардәшләргә кушылып гает куанычын тоя алсын өчен, Казан шәһәренең Галиев мәчетеннән Корбан бәйрәменең турыдан-туры трансляциясе оештырылачак. Татарстан мөселманнарының башлыгы, мөфти Камил хәзрәт Сәмигуллинның бәйрәм вәгазен һәм мәчеткә килгән мөселманнарның җәмәгать белән укыган гает намазын туры эфирда “ТНВ Татарстан», «ТНВ Планета» һәм “Хозур ТВ” телеканалларында, шулай ук ТР МДН-ның dumrt.ru сайтында һәм «Хозур ТВ»-ның YouTube-каналында күзәтеп булачак.

Республиканың гает хөрмәтеннән узган төп чаралары Галиев мәчетеннән торып 31 июльдә иртәнге сәгать 3.30-ан күрсәтелә башлаячак. Бу вакытта Коръән укуны ишетеп булачак. 3.45-тә мөфти Камил хәзрәт Сәмигуллин гадәттәгечә Татарстан өммәтенә гает вәгазе белән мөрәҗәгать итәчәк. Аңа ияреп җәмәгать белән укылган гает намазын иртәнге 4.15-тә карап булачак.

Корбан гаетенең трансляциясен шулай ук кабатлау рәвешендә дә карарга мөмкин. 31 июль көнне «ТНВ Татарстан» каналында ул 15.05 сәгатьтә, «ТНВ Планета» каналыда 12.20 сәгатьтә күрсәтеләчәк. Моннан тыш, Галиев мәчетендә узган гаетнең язмасын “Россия 1” телеканалында сәг. 9.00-дә карап булачак.

Чыганак: ТАТАРСТАН РЕСПУБЛИКАСЫ МӨСЕЛМАННАРЫНЫҢ ДИНИЯ НӘЗАРӘТЕ

Запись Корбан бәйрәмен турыдан-туры эфирда Казанның Галиев мәчетеннән “Хозур ТВ”, ТНВ, “Россия1” телеканалларында һәм мөфтият сайтында карап булачак впервые появилась Tatar Today - татар яңалыклары..

Элекке имамга мәктәп баласына өйләнгәне өчен колония хөкеме чыгарганнар?

kadria — Thu, 23 Jul 2020 11:54:26 +0000

20 апрельдә Рәсүл Салихов 4,5 елга ирегеннән мәхрүм ителгән. Июльдә Татарстан Югары мәхкәмәсе хөкем карарын йомшарткан.

Татарстанның Чирмешән районы Лашманка авылында элек имам булып торган Рәсүл Салиховны Татарстан югары мәхкәмәсе дүрт ел төрмәгә хөкем иткән. Чирмешән районы мәхкәмәсе 20 апрельдә чыгарган карарында аңа 4,5 ел төрмә һәм биш елга балалар белән эшләүне тыю җәзасы биргән булган. Имамның адвокаты бу карарны шикаять иткәннән соң, 3 июльдә Татарстан Югары мәхкәмәсе хөкемне йомшартып, Салиховны колониягә дүрт елга җибәрергә, 3,5 елга балалар белән эшләүне тыярга дигән карар чыгарган. Бу хакта медиага 22 июльдә генә билгеле булды.

30 яшьлек Рәсүл Салихов Русия җинаять кодексының 134нче санлы “16 яшькә җитмәгән зат белән җенси яки башка төрле сексуаль сыйфаттагы гамәлләр кылу” маддәсе нигезендә гаепле дип табылган. Бер ел элек Салихов дин өйрәнү дәресләрендә танышкан 14 яшьлек кыз белән никахка кергән. Кызның ата-аналары моңа ризалыгын биргән. Ләкин кызга 16 яшь тулмаганлыктан, авыл советы бу никахны рәсмиләштерүдән баш тарткан. Соңрак Салиховка карата җинаять эше ачылды.

Танылган адвокат Руслан Нәгыев бу җинаять эше кысаларында зыян күрүче дип табылган кыз баланы һәм аның әнисенең мәнфәгатьләрен яклаган. Ул Азатлыкка сөйләгәнчә, элеккеге имамны кайсы колониягә озатачаклары әлегә билгеле түгел. Хәзергә ул Чистайда тикшерү изоляторында тотыла диде Нәгыев.
Адвокат сүзләренчә, кызның әнисенә дә җинаятьтә катнашуда гаеп белдерелгән булган, тикшерүче аны хәтта кулга алырга таләп иткән. Ләкин адвокат тырышлыгы белән мәхкәмә бу ханымга карата читкә китмәү шарты кую белән чикләнгән, ә соңрак аның өстеннән барлык гаепләр дә алынган. “Бу хәлләр гаиләгә начар тәэсир итте, кыз балага психологик зыян салынды, чөнки аларның өенә мәктәптән дә, опека оешмаларыннан да вәкилләр килделәр. Шулай да, гаиләне яклап булды”, диде Нәгыев.

Адвокат Салиховның җәзасы берникадәр киметелүен искәртте. “Аны авыр җинаятьтә гаепли иделәр – 14 яше тулмаган зат белән җенси мөнәсәбәткә керүдә” дип аңлатты адвокат.
Русия Җинаять кодексына ярашлы, 12 яшьтән узган, ләкин 14 яше тулмаган зат белән җенси мөнәсәбәткә кергән өчен өч елдан алып 10 елга кадәр төрмә, 15 елга кадәр аерым бер төр шөгыльдән тыю, ике алга кадәр ирекне чикләү җәзасы яный.

Татарстан мөселманнары диния назәрәте Салиховның рәсми рәвештә имам булмавын, мөфтият аттестациясен узмаганын белдерде.

Фото Азатлык Радиосы сайтыннан

Запись Элекке имамга мәктәп баласына өйләнгәне өчен колония хөкеме чыгарганнар? впервые появилась Tatar Today - татар яңалыклары..

“Карамалы-Гобәй” җыры кемнеке? – “урланган”диючеләргә Ришат Төхвәтуллин Татар тудей аша җавап бирде

Julia Julia — Thu, 22 Nov 2018 17:00:18 +0000

//Юлия Насыбуллина//Tatar Today//

“Tat_plagiat” үзенең инстаграм битендә Ришат Төхвәтуллинның әнисе иҗат иткән “Карамалы-Гобәй”нең NEK &CLAUDIA & DEMARCD башкаруындагы “Orice Mi-ai Cere Tu” җырының күчерелмәсе булуын раслаучы видео урнаштырган.

View this post on Instagram

A post shared by Тат Плагиат (@tat_plagiat)

Чит ил һәм рус эстрадасындагы җырларны урлап, үзгәртеп, халыкка үзләренеке дип тәкъдим итүче татар-башкорт җырчыларын инстаграм дөньясына фаш итү белән шөгыльләнә башлаган “Tat_plagiat” аккаунтының Элвин Грейны җыр үзләштерүдә гаепләве һәм башка җырчыларны кисәтүе хакында әле күптән түген генә язган идек.

“Без бәйсез музыка экспертлары. Татар-башкорт эстрадасында плагиат очраклары күп булуын сизеп алдык. Җырчыларның кеше җырларын үзләренеке итеп күрсәтеп тамашачыны алдалауларын теләмибез”, дип аккаунтны алып баручы кеше “Tat_plagiat”ның эшчәнлеге турында аңлатма бирде.

– Моның өчен җырчыларга нәрсә булачак? – дигән сорауга: “Үзегез күрерсез”, дип җавап кайтарды.

Ришат Төхвәтуллинның “Карамалы-Гобәй” җыры чыннан да урланганмы, юкмы икәнен белү өчен җырчының үзе белән элемтәгә кердек.

“Бу җыр мин студент чагында иҗат ителде, әле ул вакытта популяр җырчы түгел идем. Әйе, “Карамалы-Гобәйнең” көе төрекнеке. Мин моны бер вакытта да яшермәдем, үземнеке дип тә күрсәтмәдем. Сүзләрен әнием Розалия Төхвәтуллина иҗат итте. Мин монда бернинди урлау, плагиат очрагын да күрмим. Хәзерге вакытта чит ил җырларының көйләренә сүзләр яздырып, җыр иҗат итү белән шөгыльләнмим. Бүгенге көндә без профессиональ композиторлар белән генә эшлибез”, диде Ришат Төхвәтуллин.

Запись “Карамалы-Гобәй” җыры кемнеке? – “урланган”диючеләргә Ришат Төхвәтуллин Татар тудей аша җавап бирде впервые появилась Tatar Today - татар яңалыклары..

“Сөембикә” операсында төп рольне башкарган Гульнора Гатина юл һәлакәтенә очраган

Julia Julia — Wed, 14 Nov 2018 07:09:22 +0000

Гульнора әнисе белән була. Алар утырган такси машинасы һәлакәткә очрый. Гульнораның әнисен ашыгыч ярдәм машинасында хастаханәгә алып китәләр.

Һәлакәт кичә кич Казанда була. Гульнора белән әнисе утырган таксига зур тизлектә икенче машина килеп бәрелә. Рульдәге ир исерек була. Ашыгыч ярдәм машинасы килеп җиткәнен дә көтмичә һәлакәт урынын ташлап китә. Җырчының әнисенә зыян килә, ул артта утырган була.

Запись “Сөембикә” операсында төп рольне башкарган Гульнора Гатина юл һәлакәтенә очраган впервые появилась Tatar Today - татар яңалыклары..

Сөенечле хәбәр: “Казан кичләре” концерты кире кайта, тик филармониягә түгел[интервью]

Julia Julia — Tue, 13 Nov 2018 17:07:03 +0000

//Юлия Насыбуллина //

Исегезгә төшерәбез, быел май аенда “Мәйдан” ТНВга кушылганнан соң, телеканалның күп тапшырулары ябылуы хакында Эдуард Үтәгәнов сөйләгән иде. Шул исәптән, меңләгән тамашачы үз итеп өлгергән “Казан кичләре” проекты да кыскартуга эләгеп зәңгәр экраннардан төшеп калды. “”Казан кичләре” проектының авторлары белән сөйләшкәннән соң бу тамаша яшәргә тиеш, дигән фикергә килдек. Үзебез өчен яңа иҗат мәйданы таптык, “Казан кичләре” хәзер “Ленин” мәдәният сараенда узачак”, дип Фәнил Вакказов Татар тудейга сөйләде.

“Беренче концерт 2019 елның 30 гыйнварына планлаштырылган. Җырчыларның исемлеген барлап бетергәч, тагын берничә көннән билетлар сатуга чыгачак”, диде Айгөл Набиуллина.

– Фәнил, белүемчә, проект авторлары барысы да диярлек “Мәйдан”нан китте. Хәзер концертны кем оештырачак?
– Оештыручылар һаман шул ук, “Мәйдан” каналында эшләгән иҗат командасы.

– Сез эшләгән концертны “Мәйдан” күрсәтәчәкме соң?
– Алар белән бүгенге көндә сөйләшүләр бара, мөгаен, ул шунда күрсәтелер. Тамашачы әлеге проект белән “Мәйдан” каналы аша танышты һәм ул шул каналда кала алса, шәп булыр иде, минемчә.

– Концерт залы үзгәргән икән. Тамашачы филармония залына килергә күнеккән иде…
– Үзебез өчен яңа иҗат мәйданы таптык, “Ленин” мәдәният сараенда бик сыйфатлы ремонт ясалган, сәхнә һәм тамаша залы да бөтен заман тәлапләренә туры килә. “Казан кичләре” проекты белән бу урынны тагын да җанландырып җибәрергә уйлыйбыз, Алла боерса. Бүген анда булып кайттым, юлларны бик уңайлы итеп ясаганнар, Яңа Савин һәм Мәскәү районнары аша бик тиз барып җитеп була, җитмәсә, метро тукталышы да комплексның капка төбендә генә. Тамашачылар кыенлык кичермәс дип уйлыйм.

Запись Сөенечле хәбәр: “Казан кичләре” концерты кире кайта, тик филармониягә түгел[интервью] впервые появилась Tatar Today - татар яңалыклары..

Үги әти белән үскән Дамир Зиннәтуллин нинди кызларны яратуын әйтә

Лэйсирэ — Fri, 27 Jul 2018 11:31:07 +0000

Бүген Дамир Зиннәтуллин исемен “TMTV” телеканалы аша ишетеп була. Ул – корреспондент, алып баручы. Җырчы буларак та танылырга тели. Дамир Акчарлак газетасына интервью биреп, журналист Габдерәхим белән сөйләшеп алган.

– Дамир, син үги әти белән үскәнсең икән. Үз әтиең ташлап киттеме әллә?

– 1994 елда, миңа ике яшь булганда, Кайбыч районында мотоциклда авариягә очрап вафат булган.

– Фотолары бармы?

– Бар.

– Әниең кайчан кияүгә чыкты?

– Әни белән сигез ел Кече Кайбыч авылында тордык, миңа ун яшь тулгач әни кияүгә чыкты.

– Аны әти буларак кабул иттеңме?

– Иттем.

– Ул сине ничек кабул итте?

– Бик яхшы, беркайчан да авыр сүз әйткәне булмады.

– Кыйнамадымы?

– Юк.

– Әниең аның белән ничек танышкан?

– Авылда яшәгәндә Наил әтинең кунакка кайтканы гына хәтердә. Ничек танышканнарын белмим.

– Кызың бармы?

– Әлегә кирәк дип санамыйм.

– Нинди кызларны яратасың?

– Тиктормас, максатына ирешә торган, мөнәсәбәтләр җылы булсын.

– Андыйны ничек табарга уйлыйсың?

– Аралашырга, сөйләшергә, күрешергә кирәк.

– Димәк, мәхәббәт әлегә юк.

– Мәхәббәт бармы соң ул?!

Запись Үги әти белән үскән Дамир Зиннәтуллин нинди кызларны яратуын әйтә впервые появилась Tatar Today - татар яңалыклары..

Татарстанда эшләнгән пилмәннәрдә инфекция табыла

Лэйсирэ — Fri, 18 May 2018 14:59:29 +0000

Уфадагы «Лента» гипермаркетларының берсендә сатылучы пилмәннәрдә листерия бактерияләре табылган.Әлеге ярымфабрикатларның Казанда җитештерелүе мәгълүм, дип яза Мәйдан.

Инфекция табылу белән продуктны партиясе белән сатудан алганнар. Хәзерге вакытта ул изоляцияләнгән урында саклана. Шулай ук инфекциянең продуктка ничек килеп эләгү сәбәпләре ачыклана.

Листериоз — киң таралган куркыныч табигый инфекцион авыру. Ул кешеләрдә һәм хайваннарда очрый. Авыру нәтиҗәсендә үзәк нерв системасы, бавыр, лимфатик система зыян күрергә мөмкин. Табигый шартларда әлеге чир күп кенә кыргый хайваннарда күзәтелә, шул исәптән кимерүчеләр һәм кошларда да очрый.

Запись Татарстанда эшләнгән пилмәннәрдә инфекция табыла впервые появилась Tatar Today - татар яңалыклары..